میر واعظ عمر کو نماز جمعہ کیلئے جامع مسجد جانے کی اجازت نہیں دی گئی انجمن اوقاف جامع مسجد کا میر واعظ عمر فاروق کی مسلسل نظر بندی پر اظہار تشویش

سری نگر(پی پی آ ئی) بھارت کے زیر قبضہ جموں وکشمیر میں انجمن اوقاف جامع مسجد سرینگر نے میرواعظ عمر فاروق کی مسلسل غیر قانونی نظر بندی پر گہری تشویش کا اظہارکرتے ہوئے انکی فوری رہائی کا مطالبہ دہرایا ہے۔کشمیر میڈیا کے مطا بق انجمن اوقاف نے سرینگر میں جاری ایک بیان میں کہا کہ میر واعظ عمر فاروق کو نماز جمعہ کیلئے جامع مسجد جانے کی اجازت نہیں دی گئی جو انتہائی قابل مذمت ہے۔ بیان میں کہا گیا کہ میر واعظ کی رہائی کیلئے ہر سطح پر آوازبلند ہو رہی ہے لیکن قابض انتظامیہ نے مسلسل بے حسی کا رویہ اپنا رکھا ہے۔ انجمن نے اپنے بیان میں کہا کہ میر واعظ کی گزشتہ تین برس سے زائد عرصے سے نظر بندی عوام کیلئے انتہائی دکھ اور تکلیف کا باعث ہے لہذا انتظامیہ انکی فوری رہائی عمل میں لائے تاکہ وہ اپنے دینی فرائض انجام دے سکے۔