حروں کے روحانی پیشوا سورہیہ بادشاہ صبغت اللہ شاہ ثانی کا یوم شہادت منایا گیا

مسلم لیگ فنکشنل سندھ کے سیکریٹری جنرل اور جی ڈی اے کے سیکریٹری اطلاعات سردار عبدالرحیم نے امام انقلاب حضرت پیر سائیں صبغت اللہ شاہ ثانی المعروف شہید سورھیہ بادشاہ کی یوم شہادت پر خصوصی پیغام  میں  کہا ہے کہ شہید سورھیہ بادشاہ کو 32 برس کی عمر میں اپنے لوگوں اور دھرتی کی آزادی کے لئے جدوجہد کرنے کی پاداش میں تختہ دار پر چڑھا دیا گیا۔ انگریزوں کے ظلم کے سامنے سورھیہ بادشاہ نے سر نہیں جھکایا اور خوشدلی سے شہادت کو قبول کیا۔سردار عبدالرحیم نے کہا کہ شہید سورھیہ بادشاہ اور ہزاروں حروں کی قربانیوں نے پاکستان کو آزادی دلائی۔ ان کی زیر قیادت شروع ہونے والے جہاد نے انگریز سامراج کو خطے سے بھاگنے پر مجبور کر دیا۔انہوں نے مزید کہا کہ آج بھی حر جماعت کے مجاہد سرحدوں کی حفاظت کر رہے ہیں جس کی وجہ سے ملک کی سرحدیں محفوظ ہاتھوں میں ہیں۔ سردار عبدالرحیم نے عہد کیا کہ ہم شہید سورھیہ بادشاہ کے مشن کی تکمیل تک جدوجہد جاری رکھیں گے۔