اسلام آباد (پی پی آئی)وزیر خارجہ جلیل عباس جیلانی نے کہا ہے کہ سی پیک عالمی نوعیت کا وہ واحد منصوبہ ہے جس کی تکمیل سے خطے میں تعمیر وترقی اورخوشحالی کا سبز انقلاب آجائے گا سی پیک کا سب سے زیادہ فائدہ بلوچستان کو پہنچے گا پاک چین دوستی کی دنیا میں مثالیں دی جاتی ہیں دونوں ممالک عالمی سطح پر قیام امن کے لیے کوشاں ہیں۔پی پی آئی کے مطابق ان خیالات کا اظہار انہوں نے پاکستان پیپلز پارٹی بلوچستان کے صوبائی صدر سابق وفاقی وزیر سائنس اینڈ ٹیکنالوجی میر چنگیز خان جمالی سے گفتگو میں کیا میر چنگیز خان جمالی نے نگران کابینہ میں وزارت خارجہ کا قلمدان سنبھالنے پر انہیں مبارکباد دی اور کہا کہ پاکستان کے لیے آپ کی سفارتی سطح پر خدمات قابل ستائش ہیں جس سے دنیا میں سفارتی سطح پر پاکستان کا امیج نہ صرف بلند ہوگا بلکہ اس کے مثبت سفارتی نتائج بھی برآمد ہوں گے انہوں نے نیک خواہشات کے ساتھ اس امید کا اظہار کیا کہ ان کے  دورہ چین سے نہ صرف پاک چین دوستی مزید مضبوط اور مستحکم ہوگی بلکہ سی پیک کے حوالے سے بلوچستان میں مزید میگا منصوبوں کی منظوری کی راہ ہموار ہوگی وزیر خارجہ نے  چنگیز خان جمالی کو یقین دلایا کہ وہ اپنے دورہ چین کے موقع پر بلوچستان کی تعمیر و ترقی کے لیے سی پیک منصوبوں میں صوبے کی اہمیت کو فوقیت دیں گے اور مزید منصوبوں کے لیے چینی حکومت کو بلوچستان کی اہمیت سے آگاہ کرتے ہوئے صوبیکے لیے مزید میگا منصوبوں کی منظوری حاصل کریں گے

لاڑکانہ (پی پی آئی) پی ٹی سی ایل کے پینشنرز الائینس نے دوسرے صوبوں کے پینشنروں سے رابطہ کا فیصلہ کرتے ہوئے دس رکنی کمیٹی تشکیل دی ہے جو آئندہ کا لائحہ عمل طے کرے گی۔ پی پی آئی کے مطابق کمیٹی میں محمد اعظم قریشی ٹنڈو آدم.اطہر جاوید صوفی کراچی. محمد مسعود فریدی کراچی سرور جاوید بھٹی سکھر ایاز حسین جعفری لاڑکان. امیر بخش بگٹی. محمد اسحاق مگسی،سید ندیم رضازیدی، ملک عبید اللہ طالب حسین ہزارہ کوئٹہ  شامل ہین کمیٹی دوسرے صوبوں  کادورہ کر کے پینشنروں سے ملاقات اور اس اتحاد کو وسعت دینے میں اپنا بھر پور کردار کرے گی قبل ازیں پی ٹی سی ایل کے پینشنرز کا اہم اجلاس ایاز جعفری کے گھر پراطہر جاوید صوفی کی صدارت میں ہوا جس میں سندھ اور بلوچستان سے تعلق رکھنے والے چالیس سے زیادہ چیدہ  چیدہ پینشنرز نے شرکت کی۔پی پی آئی کے مطابق  اجلاس کے اختتام پر باہمی رضا مندی سے پی ثی سی ایل پینشنرز الائنس کا قیام عمل میں لایا گیا۔

کراچی (پی پی آئی) تحریک پاکستان کے رہنما سرسید احمد خان کا206واں یوم پیدائش 17اکتوبر کو منایا گیا۔ ایشین یونین پاکستان کے سربراہ طارق شاداب  نے طلبہ طالبات سے خطاب کرتے ہوئے کہا کہ سرسید برصغیر میں مسلم عروج کے بہت بڑے علمبردار تھے انہوں نے مسلمانوں میں بیداری علم کی تحریک پیدا کرنے میں بہت اہم کردار ادا کیا، سرسید نے مسلمانوں کی اصلاح و ترقی کا بیڑا اس وقت اٹھایا جب زمین مسلمانوں پر تنگ تھی اور انگریز اْن کے خون کے پیاسے ہو رہے تھے۔پی پی آئی کے مطابق  سرسید احمد خان 17 اکتوبر 1817 کوپیدا ہوئے وہ ایک بلند پایہ مفکر اور مصنف تھے جنہوں نے اپنی ادبی تخلیقات سے مسلمانان ہند میں عظیم انقلاب پیدا کیا علی گڑھ تحریک کا کردار قیام پاکستان کا باعث بنا۔