کراچی (پی پی آئی)مسلم لیگ ن نے سانگھڑ کے کامیاب کنونشن کے بعدکراچی اورسندھ میں تنظیمی اور سیاسی سرگرمیاں بڑھانے کی حکمت عملی طے کی ہے۔پی پی آئی کے مطابق پی پی کی پنجاب میں بڑھتی دلچسپی کے پیش نظر مریم نوازسمیت کئی مرکزی رہنماؤں نے سندھ کی اہم سیاسی شخصیات سے رابطے کیے ہیں، ن لیگ نے آئندہ ماہ سے کراچی، حیدر آباد اور سکھر سمیت دیگر شہروں میں کنونشن کے انعقاد پر بھی کارکنان سے رائے مانگی ہے نیزن لیگ  کی مرکزی رہنما مریم نوازکی کراچی و سندھ کے دیگر اضلاع  میں آئندہ ماہ  آمد بھی متوقع ہے۔

کراچی (پی پی آئی)ای او بی آئی پنشنرز کی نمائندہ تنظیم ای او بی آئی پنشنرز  فورم نے ایک کھلے خط میں نگراں وزیر اعظم انعام الحق کاکڑ سے مطالبہ کیا ہے کہ ای او بی آئی کے موجودہ بورڈ آف ٹرسٹیز کی تشکیل  نو کرکے پنشنرز کی دعائیں لے کیونکہ اس بورڈ  کی مدت کار ختم ہوچکی ہے لیکن نیا بورڈ ہنوز تشکیل نہیں دیا جاسکا ہے حالانکہ اس کی اشد ضرورت ہے کیونکہ ای او بی آئی کے لاکھوں پنشنرز محسوس کرتے ہیں کہ ان کی حقیقی نمائندگی نہیں ہوپارہی۔پی پی آئی کے مطابق  ای او بی آئی پنشنرز  فورم نے یاد دلایا کہ وفاقی حکومت میچنگ گرانٹ برسوں سے جمع نہیں کرارہی اس کے اجراء کا اعلان بھی کیا جائے  نیزلاکھوں پیٹرول پمپ، اسکول، چھوٹے اسپتال، کاروباری و تجارتی ادارے  اس میں شامل ہیں جن کے ملازموں کی حق تلفی کا سلسلہ جاری ہے۔ ای او بی آئی پنشنرز  فورم نے توجہ دلائی کہ بسااوقات  ای او بی آئی دفاتر میں عملے کے بعض ارکان پنشنرز کو پریشان کرتے ہیں یا طریق کار سے عدم واقفیت کے باعث پنشنرز کو مشکل پیش آتی ہے اس لئے ہر آفس میں ہیلپ ڈیسک قائم کی جائے اور کم از کم صوبائی سطح پر فوکل پرسن تعینات کرکے اس کا فون نمبر اور آفس ایڈریس مشتہر کیا جائے۔

 اسلام آباد (پی پی آئی) استحکام پاکستان پارٹی کے لیے عقاب کا نشان لینے کی راہ ہموار ہو گئی۔ الیکشن کمیشن نے آل پاکستان مسلم لیگ(سربراہ جنرل ر پرویز مشرف) کی رجسٹریشن منسوخ کردیا ہے جس کے بعد انتخابی نشان “عقاب” کسی دوسری جماعت یا امیدوار کو الاٹمنٹ کے لئے موجود ہوگا۔پی پی آئی کے مطابق الیکشن کمیشن کو موصولہ دستاویزات کے مطابق آل پاکستان مسلم لیگ کے کوئی باضابطہ عہدیداران نہیں۔وہ انتخابی قانون 2017 کی شق 209 اور 210 پر پورا نہیں اترتی،اس لئے غیر مجاز افراد کی جانب سے عقاب کا انتخابی نشان الاٹ کئے جانے دی درخواستوں کو مسترد کیا جاتا ہے۔چیف الیکشن کمشنر سکندر سلطان راجہ کی سربراہی میں تین رکنی بنچ نے یہ 14 صفحات پر مبنی فیصلہ جاری کیا ہے۔پی پی آئی کے مطابق استحکام پاکستان پارٹی نے عقاب کے نشان کے لیے الیکشن کمیشن میں درخواست دی تھی۔استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے کہا تھا کہ استحکام پاکستان پارٹی عقاب کا انتخابی نشان حاصل کرنے کے لیے کوشاں ہے، عقاب ہی آئی پی پی کا انتخابی نشان ہو گا۔