کراچی (پی پی آئی)،آٹو اسمبلرز نے ایک بار پھر موٹرسائیکل، رکشہ، کاروں اور کمرشل گاڑیوں کی قیمتوں میں اضافہ کردیا ہے۔ رپورٹ کے مطابق لکی موٹر کارپوریشن لمیٹڈ نے متعدد ماڈلز کی قیمتوں میں تین لاکھ 50 ہزار روپے تک اضافہ کیا، پیکانٹو آٹومیٹک، اسٹانک ای ایکس پلس، اسپورٹیج اے ڈبلیو ڈی اور اسپورٹیج بلاک (لمیٹڈ ایڈیشن) کی نئی قیمتیں بالترتیب 39 لاکھ 50 ہزار روپے، 62 لاکھ 80 ہزار روپے، 89 لاکھ 20 ہزار روپے اور 96 لاکھ 50 ہزار روپے ہوں گی، جو اس سے قبل 38 لاکھ 25 ہزار روپے، 60 لاکھ 50 ہزار روپے، 88 لاکھ 20 ہزار روپے اور 93 لاکھ روپے میں دستیاب تھی، پی پی آئی کے مطابق یاماہا موٹر پاکستان لمیٹڈ نے بھی بغیر وجہ بتائے موٹر سائیکلوں کے مختلف ماڈلز کی قیمتوں میں 15 ہزار 500 روپے سے 17 ہزار روپے تک کا اضافہ کر کے صارفین کو حیران کر دیا ہے۔

 لاہور (پی پی آئی)معروف اداکار شبیر مرزا کو جھنڈا چیچی پھاٹک والی مسجد میں نماز جنازہ کے بعد  سپرد خاک کردیا گیا۔وہ مختصر علالت کے بعد بدھ کو  انتقال کرگئے تھے۔ پی پی آئی کے مطابق شبیر مرزا کینسر کے عارضے میں مبتلا تھے، گزشتہ ڈیڑھ ماہ سے ان کی طبیعت زیادہ بگڑ گئی تھی۔ شبیر مرزا نے مشہور زمانہ ڈرامہ گیسٹ ہاؤس سمیت مختلف ڈرامہ سیریلزمکی کھڑوں انگلینڈ، آغوش، چن ماڑا چڑیا میں مرکزی کردار اداکئے جبکہ ان کی وجہ شہرت گیسٹ ہاؤس ڈرامے کا کردار تھا، علاوہ ازیں انہوں نے پاکستانی فلموں میں بھی اداکاری کے جوہر دکھائے۔  شبیر مرزا کی نماز جنازہ جھنڈا چیچی پھاٹک والی مسجد میں ادا کی  گئی۔

 ایبٹ آباد (پی پی آئی) خیبر پختونخوا کے ایبٹ آباد  وائلڈ لائف ڈیپارٹمنٹ نے دعویٰ کیا ہے کہ انتہائی نایاب برفانی تیندوے کی چار کھالیں گلگت بلتستان سے اسلام آباد سمگل کرنے کی کوشش ناکام بنا دی گئی ہے جبکہ ملزمان کو گرفتار کر لیا گیا۔پی پی آئی کے مطابق دوران تفتیش گرفتار ملزمان نے بتایا کہ وہ چاروں کھالیں گلگت بلتستان کے ضلع غذر سے لے کر اسلام آباد جا رہے تھے، جہاں پر ان کو مہنگے داموں فروخت کرنا تھا۔محکہ وائلڈ لائف ایبٹ آباد کے ایس ڈی ایف او سردار نواز نے بتایا کہ ملزمان نے دوران تفتیش بتایا کہ انھوں نے یہ چاروں کھالیں 30 لاکھ روپے میں حاصل کی تھیں جبکہ ان کا پروگرام تھا کہ وہ ان کو اسلام آباد میں مزید مہنگے داموں فروخت کریں گے۔ان کا کہنا تھا کہ محکمہ وائلڈ لائف خیبر پختونخوا نے وائلڈ لائف ایکٹ سنہ 2015 کے تحت کارروائی کرتے ہوئے چاروں افراد پر زیادہ سے زیادہ جرمانہ فی کھال تقریباً ایک لاکھ روپے کر دیا ہے۔ جرمانے کی ادائیگی کے بعد ملزمان کو رہا کر دیا گیا جبکہ کھالیں ضبط کر لی گئی ہیں۔