برسبین: آسٹریلیا کے لیٹن ہیوٹ نے سابق عالمی نمبر ایک سوئٹزرلینڈ کے راجر فیڈرر کو شکست دے کر برسبین ٹینس ٹورنامنٹ جیت لیا۔ برسبین میں کھیلے جانے والے فائنل میں فیڈرر اور ہیوٹ کے درمیان دلچسپ مقابلہ ہوا۔ فیڈرر 2013کی ناکامیوں کا ازالہ 2014 میں بھی فتح کے ساتھ نہ کرسکے۔ہیوٹ نے کھیل کا شاندار آغاز کیا اور پہلا سیٹ چھ ایک سے جیت کر برتری حاصل کی۔ دوسرے سیٹ میں فیڈرر کو کچھ مزاحمت کا سامنا کرنا پڑا لیکن سوئس کھلاڑی نے چھ چار سے سیٹ اپنے نام کرتے ہوئے مقابلہ ایک ایک سے برابر کردیا۔فیصلہ کن سیٹ میں ٹاپ سیڈ فیڈرر نے ہتھیار ڈال دیئے۔ ہیوٹ نے ہوم گراونڈ اور ہوم کراوڈ کی موجودگی میں سابق عالمی نمبر ایک راجر فیڈرر کو چھ تین سے ہرا کر ٹائٹل جیت لیا۔ یہ ہیوٹ کے کیرئیر کا29واںاور 2010 کے بعد پہلا ٹائٹل ہے۔

کراچی: قطرمیں تین ملکی ٹورنامنٹ کی تیاری کیلئے قومی خواتین کرکٹ ٹیم کا تربیتی کیمپ شہرقائد میں جاری ہے، کھلاڑی اورآفیشلزایونٹ میں بہترنتائج دینے کیلئے پرامید ہیں۔ کراچی میں جاری تربیتی کیمپ میں 16 کھلاڑی صبح اورشام کے سیشنز پریکٹس میں مصروف ہیں۔ کیمپ میں بولنگ بیٹنگ اورفیلڈنگ کے علاوہ فزیکل فٹنس کوبہتربنانے پربھی خصوصی توجہ دی جارہی ہے۔کپتان ثناءمیراور سینئر بلے بازنین عابدی کے مطابق وہ جنوبی افریقہ اورآئرلینڈ جیسی مضبوط ٹیموں سے مقابلے کے پیش نظرزیادہ محنت کر رہی ہیں۔ کھلاڑیوں کی فٹنس ماضی کے مقابلے میں بہترہوئی ہے، امید ہے سخت مقابلہ ہوگا۔کوچ محتشم رشید کہتے ہیں کہ کھلاڑی تربیتی کیمپ میں سخت محنت کے ساتھ اپنی خامیوں پرقابو پانے کی کوشش بھی کررہی ہیں۔ پاکستان ویمن کرکٹ ٹیم قطر میں جنوبی افریقہ اورآئرلینڈ کیخلاف ون ڈے اورٹی ٹوئنٹی ٹورنامنٹ میں حصہ لیگی۔

لاہور: قومی ٹیم نے مایہ ناز فاسٹ بولر اور سری لنکا کے خلاف ٹیسٹ اسکواڈ میں شامل عمر گل کو مکمل طور پر فٹ نہ ہونے کے باعث متحدہ عرب امارات سے واپس بلا لیا گیا ۔پاکستان کرکٹ بورڈ پی سی بی کے ترجمان کے مطابق عمر گل کو واپس پاکستان بلانے کا فیصلہ ان کی فٹنس کو مد نظر رکھ کر کیا گیا۔ وہ مکمل طور پر فٹ نہیں اور انہیں بولنگ کرانے میں بھی مشکلات درپیش ہیں لہٰذا انہیں ٹیم کے ڈاکٹر کے مشورے کے بعد واپس بلانے کا فیصلہ کیا گیا تاہم عمر گل فٹ ہونے کے بعد ڈومیسٹک کرکٹ کھیل کر ٹیم میں واپس آ سکتے ہیں۔ واضح رہے کہ عمر گل کو ان فٹ ہونے کے باعث سری لنکا کے خلاف سیریز میں ٹیم میں شامل نہیں کیا گیا تھا تاہم آخری 3 ون ڈے میچوں میں قومی ٹیم کا بولنگ اٹیک مضبوط کرنے کے لئے انہیں خصوصی طور پر پاکستان سے متحدہ عرب امارات بلایا گیا تھا۔

نیلسن: نیوزی لینڈ نے ویسٹ انڈیز کو چوتھے ون ڈے میں ڈک ورتھ لوئس قانون کے تحت 58 رنز سے شکست دے کر پانچ میچوںکی سیریز میں دو ایک کی برتری حاصل کرلی۔ نیلسن میں کھیلے جانے والے میچ کا ٹاس نیوزی لینڈ نے جیت کر پہلے بیٹنگ کا فیصلہ کیا۔کیوی ٹاپ آرڈر نے عمدہ بیٹنگ کرتے ہوئے اسکور مقررہ اوورز میں چھ وکٹوں پر285رنز تک پہنچادیا۔ مارٹن گپٹل نے 81 رنز کی شاندار اننگز کھیلی۔ جیسے رائڈر اور ولیمسن نے47,47 رنز اسکور کئے۔ہدف کے تعاقب میں ویسٹ انڈیز کا آغاز مایوس کن رہا۔ اوپنرز کھاتا کھولے بغیر ہی پویلین لوٹ گئے۔ ویسٹ انڈیز نے33اعشاریہ 4اوورز میں پانچ وکٹوں پر134 رنزبنائے تھے کہ میچ بارش کے سبب روک دیا گیا۔ کھیل دوبارہ شروع نہ ہوا اور نیوزی لینڈ کو ڈک ورتھ لوئس قانون کے تحت58 رنز سے فاتح قرار دے دیا گیا۔

سڈنی: انگلش کرکٹ ٹیم کے کپتان الیسٹر کک مسلسل 100ٹیسٹ میچ کھیلنے والے انگلینڈ کے پہلے اور دنیا کے چوتھے کھلاڑی بن گئے ۔کک نے یہ اعزاز آسٹریلیا کے خلاف ایشز سیریز کے پانچویں اور آخری ٹیسٹ میچ میں شرکت کرکے حاصل کیا ۔سابق آسٹریلین کپتان ایلن بارڈر مسلسل 153ٹیسٹ میچ کھیلنے والے دنیا کے واحدکھلاڑی ہیں ۔سابق آسٹریلوی بلے باز مارک وا 107ٹیسٹ میچوں کے ساتھ دوسرے جبکہ سابق انڈین کپتان سنیل گواسگر مسلسل 106ٹیسٹ میچ کھیل کر تیسرے نمبر پر ہیں ۔