لاہور: لاہور میںقومی کرکٹرر وہاب ریاض کے ولیمے کی تقریب کا انعقادہوا۔شادی کے بندھن میں بندھنے کے بعد وہاب ریاض اپنی شریک حیات کے ساتھ ولیمے کی تقریب میں شرکت کے لئے آئے تو زندگی کا نیا سفر شروع کرنے پر دونوں کے چہرے خوشی سے دمک رہے تھے۔مشرقی لباس میں سجی سنوری دلہن اورسوٹ میں ملبوس وہاب ریاض ہنستے مسکراتے چہروں کے ساتھ عزیزو اقارب اور دوستوں کے ساتھ تصاویر بنواتے ر ہے اور کرکٹ اسٹار نے شادی کو اپنے کیرئیر کے لئے نیک شگون قرار دیا۔وہاب ریاض کی دعوت ولیمہ میں شریک کرکٹرز نے بھی ان کے لئے نیک خواہشات کا اظہارکیا۔وہاب ریاض نے ارادہ ظاہر کیا کہ شادی کی مصروفیات سے فراغت کے بعدبہت جلد کھیل کے میدان میں نظرآئیں گے۔

لاہور: دورہ جنوبی افریقہ سے واپسی پرمحمد حفیظ کا کہنا تھا کہ ایک دو میچزمیں خراب کارکردگی پر تنقید کرنا درست نہیں ،عالمی رینکنگ میں آٹھویں نمبرپرہوں ،کارکردگی اتنی بری بھی نہیں ہے۔ دورہ جنوبی افریقہ کے بعد لاہور ائیرپورٹ پر میڈیا سے گفتگو کرتے ہوئے ٹی ٹوئنٹی ٹیم کے کپتان محمد حفیظ کا کہنا تھا کہ ٹی ٹوئنٹی فارمیٹ میں ٹیم کی پرفارمنس بہتر رہی۔ وہ پروٹیز کیخلاف ون ڈے سیریز جیتنے پرقوم کومبارکباد پیش کرتے ہیں۔ ایک سوال پر محمد حفیظ کا کہنا تھا کہ وہ عالمی رینکنگ میں آٹھویں نمبرپرہیں۔ انکی پرفارمنس اتنی بری بھی نہیں،ایک دو میچز میں خراب پرفارمنس پر تنقید کرنا درست نہیں ہے۔ ایک صحافی نے قوم کو خوش کرنے کیلئے محمد حفیظ کو شادی کا مشورہ ہی دے ڈالا جس پر حفیظ کے چہرے کا رنگ اڑ گیا۔

کراچی: معذوروں کے عالمی دن کی مناسبت سے آج (منگل ) وہیل چیئر کرکٹ میچ اصغر علی شاہ اسٹیڈیم میں کھیلا جائے گا۔ وہیل چیئر کرکٹ ایسوسی ایشن الیون کی قیادت محمد ذیشان کریں گے جبکہ اصغر علی شاہ الیون کی قیادت کے فرائض محمد ایوب انجام دیں گے ۔کھلاڑیوں میں سید اعجاز احمد ،محمد بشیر ،شکیل میمن ،ابراہیم ،رضوان ،وسیم ،فرحان ،محمد عابد،محمد عرفان ،صدام ،ندیم چاندنی ،عرفان سلیمان ،ندیم اور سعید شامل ہیں ۔ اصغر علی شاہ الیون ٹیم کے منیجر کوچ اکرام اللہ جبکہ وہیل چیئر ایسوسی ایشن ٹیم کے منیجر کوچ میر نشاط احمد اور کوچ خالد حمید ہوں گے۔

لندن: ڈچز آف کیمبرج کیٹ مڈلٹن کھیلوں کے فروغ کے لیے میدان میں آ گئیں۔ کیٹ مڈلٹن نے سپورٹس چیرٹی ایواڈ میں خصوصی شرکت کی جہاں انہوں نے نوجوان کھلاڑیوں سے ملاقات کی۔ اس موقع پر انہوں نے مستقبل میں کھیلوں کے فروغ کے لیے مالی امداد دینے کا بھی اعلان کیا۔ تقریب میں برطانیہ کی سولہ سالہ شوٹر ایمبر ہل کو اعزازی انعام سے نوازا گیا۔ برطانوی شوٹر اولمپک گیمز 2016 میں گولڈ میڈل جیتنے کے لیے پر امید ہیں۔