حیدرآباد: معاشرے میں سازشی عناصر اپنے مفاد کے خاطر عوام کے درمیان نفرتیں پیدا کرنے میں مصروف ہے ۔ان خیالات کا اظہار متحدہ قومی موومنٹ حیدر آباد زون کے جوائنٹ زونل انچارج عابدغوری نے سیکٹر آئی میں ہونے والے جنرل ورکرز اجلاس سے خطاب کرتے ہوئے کیا ۔اجلاس میںاراکینِ زونل کمیٹی ، سیکٹرو یونٹس کے ذمہ داران و کارکنان نے کثیر تعداد میں شرکت کی۔انھوں نے مذید کہاکہ حق وسچ کےلئے قائم ہونے والے اتحاد اور تحریکوں کے خلاف روزاول سے ہی سازشوں کا سلسلہ جاری ہے اور متحد ہ قومی موومنٹ موجودہ دور میں حق وسچ پرمبنی جماعت ہے جو معاشرے میں قائم ظلم و ناانصافی کا خا تمہ چا ہتی ہے ۔انھوں نے کہاکہ قائد تحریک الطاف حسین اور ایم کیوایم نے ہر سطح پر حق و سچ کا پرچار کیااور یہ ہی طرز عمل ان کا جرم ہے جس کی وجہ سے ان کے خلاف سازشوں کا سلسلہ ہر دور میں جاری ہے مگر متحدہ قومی موومنٹ کے کارکنان الطاف حسین کی تعلیمات پر عمل کرتے ہوئے سازشی عناصروں کے ناپاک عزائم خاک میں ملا دیں گے۔انہوں نے کہا کہ متحدہ قومی موومنٹ ایک نظریاتی تحریک اور انقلابی جماعت ہے اور ماضی میں بھی اس نظریاتی تحریک کوختم کرنے کےلئے ریاستی آپریشن اور اوچھے ہتھکنڈوںکے ذریعے سازشیںکی گئی مگر انہیں ناکامیوں کا سامنا ہوا۔انہوں نے کہاکہ ماضی کی طرح آج بھی قائد تحریک الطاف حسین کی تعلیمات اور نظریہ کی بدولت کوئی بھی سازش مظلوم عوام کے اتحاد کو کمزور نہیں کرسکتی اور انہیں ہر سطح پر رسوائی اور ناکامی کا سامنا ہو گا۔انہوں نے کہاکہ ماضی کی طرف دیکھیں تو ہمیں اپنی تحریک کو پروان چڑھانے کےلئے بے شمار ساتھیوں کا لہو نظر آئے گا جنہوں نے ایک عظیم مقصد کےلئے اپنی جانوں کا نذرانہ پیش کیااور ہمیں اس مقدس لہو سے اس ملک میں انقلاب برپا کرنا ہے تاکہ ہماری آنے والی نسلوں کا مستقبل روشن ہو ۔اجلاس سے دیگر ذمہ داران نے بھی خطاب کیا ۔

کراچی: سابق ناظم کراچی نعمت اللہ خان نے کہا ہے کہ اپنے دور نظامت میںپارکس بنوائے،ترقیاتی کام کروائے اور کراچی کو حقیقتا روشنیوں کا شہر بنایا۔ان خیالات کا اظہار انھوں نے فیڈرل بی ایریا میں پارک کے افتتاح اور اسکول کی تقریب تقسیم انعامات کے موقع پر خطاب کرتے ہوئے کیا۔سابق ناظم کا کہنا تھا کہ کراچی امن اور خوشحالی کا گہوارہ تھا لیکن چند دہائیوں سے اسے ٹارگٹ کلنگ اور بد امنی کا سامنا ہے۔انھوں نے اس خواہش کا اظہار کرتے ہوئے کہا کہ شہر کی رونقیں اور اامن جلدبحال ہونا چاہیے ،اپنے دور نظامت میں شہر کی ترقی کے لیے کام کیا۔ اسکول کے بچوں کو مشورہ دیتے ہوئے ان کا کہنا تھا کہ طلبہ کووطن کی خدمت کے لیے آگے آنا ہے،اپنی تمام تر توجہ تعلیم پر مرکوز رکھیں۔اس موقع پرجماعت اسلامی گلبرگ زون کے امیرسعید عامر موسیٰ اور سابق ٹاﺅن ناظم فاروق نعمت اللہ بھی موجود تھے۔

کراچی: کراچی سائٹ کے علاقے فرنٹئیر کالونی میں واقع رحمانی مسجد کے قریب دو گروپوں میں تصادم کے دوران فائرنگ کا تبادلہ ہوا ،جس کے نتیجے میں 8افراد زخمی ہوگئے۔پولیس نے جائے وقوعہ پر پہنچ کر صورت حال پر قابوپالیا ،پولیس نے فائرنگ میں ملوث کچھ افراد کو گرفتار کرلیا،زخمیوں کو قریبی ہسپتال منتقل کر دیا گیا ۔واقعے کے بعد علاقے میں خوف وحراس پھیل گیا۔

کراچی: کراچی ڈویژنل اور ڈسٹرکٹ انتظامیہ کی جانب سے ناجائز منافع خوروں اور ملاوٹ کے خلاف آپریشن جاری کرگیا ۔ دودھ ، آٹا،دالیں،گوشت، پھلوں، سبزیوں اور دیگر اشیاءمہنگے داموں فروخت کرنے پر 84دکانداروں کا چالان 2لاکھ 98ہزار روپے جرمانہ 7دودھ فروش گرفتارکر لئے گئے ہیں۔ کمشنر کراچی شعیب احمد صدیقی نے کہا کہ کراچی ڈیویژنل اور ڈسٹرکٹ کے جانب سے شہر بھر میں آپریشن جاری ہے۔کمشنر کا کہنا تھا کہ جن علاقوں میں گرانفروشی کے خلاف اقدامات کئے گئے ان میں شاہ فیصل ،بن قاسم ، اورنگی، نارتھ ناظم آباد ، گلبرگ، لیاقت آباد،گلزار ہجری،گلشن اقبال،آرام باغ اور صدرکے علاقے شامل ہیں۔ شعیب احمد صدیقی کا مزید کہنا تھاکہ ناجائز منافع خوروں کو عوام کی جیبوں پر ڈاکا ڈالنے کی اجازت ہر گز نہیںدی جائے گی۔ان کے مطابق گرانفروشوں کے خلاف آپریشن اس وقت تک جاری رہے گاجب تک سرکاری نرخوں پر اشیاءکی فروخت شروع نہیں کی جاتی۔