اسلام آباد (پی پی آئی) انسداد دہشتگردی کی عدالت نے پشتون تحفظ موومنٹ کے رہنما اور سابق رکن اسمبلی علی وزیر کو رہا کرنے کا حکم جاری کر دیا۔پی پی آئی کے مطابق اسلام آباد کی انسداد دہشت گردی عدالت نے تھانہ بھارہ کہو فراڈ کیس میں سابق رکنِ قومی اسمبلی اور پشتون تحفظ موومنٹ کے رہنما علی وزیر ضمانت منظور کی۔پیر کو انسداد دہشت گردی عدالت کے جج ابو الحسنات محمد ذوالقرنین نے کیس کی سماعت کی۔عدالت نے سابق رکنِ قومی اسمبلی علی وزیر کی ضمانت بعد از گرفتاری 20 ہزار روپے مچلکوں کے عوض منظور کر لی۔ علی وزیر کی جانب سے وکیل عطااللہ کنڈی عدالت میں پیش ہوئے۔تین ستمبر کو اسلام آباد کی مقامی عدالت نے تھانہ بھارہ کہو فراڈ کیس میں سابق رکنِ قومی اسمبلی علی وزیر کو ایک روزہ جسمانی ریمانڈ پر پولیس کے حوالے کیا تھا۔ڈسٹرکٹ اینڈ سیشن جج ڈیوٹی مجسٹریٹ شہزاد خان کی عدالت میں پولیس نے علی وزیر کو پیش کیا تھا۔تفتیشی افسر محمد علی نے عدالت کو بتایا تھا کہ علی وزیر سے وصول اور جمع کی گئی رقم اور پراپرٹی کے حوالے سے تفتیش کرنی ہے۔28 اگست کو اسلام آباد کی انسداد دہشت گردی عدالت نے دھمکی، اشتعال اور بغاوت کے کیس میں علی وزیر کو رہا کرنے کا حکم دیا تھا۔

خیرپور(پی پی آئی) سندھ میں ایک جانب ڈینگی نے سر اٹھانا شروع کر دیا ہے تودوسری جانب ملیریا کے پھیلاو میں بھی اضافہ دیکھا گیا ہے۔پی پی آئی کے مطابق ذرائع نے بتایا کہ صوبہ کے ایک بڑے سرکاری ہسپتال میں ایک دن میں ملیریا کے 100 سے زائد کیسز رپورٹ کیے گئے ہیں۔لیکن سرکاری اعداد و شمار حقیقت کی عکاسی نہیں کررہے۔صوبائی دارالحکومت کراچی میں گزشتہ چند ماہ کے دوران ملیریا کے چند سو کیسز رپورٹ ہوئے ہیں، سرکاری اعداد و شمار کے مطابق کراچی میں کسی ہلاکت کی اطلاع موصول نہیں ہوئی۔اعداد و شمار سے یہ بھی پتا چلتا ہے کہ کراچی میں رواں برس اب تک ڈینگی کے کْل 828 کیسز رپورٹ ہوچکے ہیں البتہ کسی بھی متاثرہ شخص کی موت واقع نہیں ہوئی۔

کراچی (پی پی آئی)پاکستان سمیت دنیا بھر میں خود کشی سے تحفظ کا عالمی دن منایا گیا۔ پی پی آئی کے مطابق غربت،مہنگائی اور دیگر سماجی وجوہات کے باعث خودکشی کے واقعات میں تیزی آئی ہے،عالمی ادارہ صحت کے مطابق پاکستان میں سالانہ بنیادوں پرآٹھ ہزار سے زائد افرادخودکشی کرلیتے ہیں جبکہ دنیا بھر میں ہر دوسرے منٹ میں خودکشی کا ایک واقعہ رونما ہوتا ہے۔خودکشی کی روک تھام کے لیے یہ ضروری ہے کہ ایسی اشیا تک لوگوں کی رسائی کم کردی جائے۔ پاکستان میں کی گئی تازہ تحقیق کے مطابق ملک میں خودکشی کے رجحان بڑھ رہا ہے۔