کوئٹہ (پی پی آئی)صوبائی دار الحکومت کوئٹہ میں کانگو کا ایک اورمریض دم توڑگیا ہے۔کانگو وائرس سے دم توڑنے والے کی شناخت 25 سالہ نعمت اللہ کے نام سے ہوئی ہے،  اسے فاطمہ جناح اسپتال لایا گیا تھا۔پی پی آئی کے مطابق مریض کے ٹیسٹ کی رپورٹ میں کانگو کی تصدیق ہوئی تھی کانگو وائرس سے وفات پانے والوں کی تعداد11ہوگئی ہے۔

 نئی دہلی(پی پی آئی)مقبوضہ جموں و کشمیرکی ریاستی حیثیت بحالی کیس کی سماعت مکمل کر کے بھارتی سپریم کورٹ نے فیصلہ محفوظ کرلیا ہے۔بھارتی میڈیا کے مطابق سپریم کورٹ میں مقبوضہط جموں و کشمیر سے آرٹیکل 370 ہٹانے کے فیصلے کو چیلنج کرنے والین پٹیشنز پر 16 دن تک سماعت ہوئی۔درخواست گزاروں کا مطالبہ ہے کہ جموں و کشمیر میں دفعہ 370 کو بحال کیا جائے اور اس کی مکمل ریاست کا درجہ بھی واپس کیا جائے۔ چیف جسٹس ڈی وائی چندر چوڑ کی قیادت میں پانچ ججوں پر مشتمل آئینی بنچ نے آرٹیکل 370 سے متعلق درخواستوں کی سماعت کی۔ بنچ میں چیف جسٹس ڈی وائی چندر چوڑ، جسٹس ایس کے کول، جسٹس سنجیو کھنہ، جسٹس بی آر گوائی اور جسٹس سوریہ کانت شامل تھے۔سینئر وکلاکپل سبل، گوپال سبرامنیم، راجیو دھون، ظفر شاہ، دشینت دبے نے آرٹیکل 370 کو بحال کرنے کے حق میں اپنی رائے ظاہر کی۔ وہیں اٹارنی جنرل آر وینکٹرامانی، سالیسٹر جنرل تشار مہتا، سینئر وکلا  ہریش سالوے، راکیش دویدی، وی گری نے مرکزی حکومت کا  موقف پیش کیا اور دفعہ 370  ہٹانے کے فیصلے کو درست بتایا۔

اسلام آباد(پی پی آئی) سابق وزیراعلیٰ  چوہدری پرویز الہی نے انسدادِ دہشتگردی کی عدالت میں پیشی کے موقع پر صحافیوں سے گفتگو میں انکشاف کیا کہ انہیں تو چوہدری شجاعت نے  پی ٹی آئی میں بھیجا تھا۔پی پی آئی کے مطابق  جوڈیشل کمپلیکس حملہ کیس میں پیشی پر ایک صحافی نے سوال کیا کہ پرویز الہی صاحب آپ اپنی پارٹی میں واپس کیوں نہیں جا رہے، جس کا جواب دیتے ہوئے پرویز الہی نے کہا کہ مجھے چوہدری شجاعت نے خود یہاں بھیجا  تھا۔صحافی نے پوچھا کہ چوہدری شجاعت پھر خود پی ٹی آئی میں کیونکہ نہیں آتے، جس کے جواب میں سابق وزیراعلیٰ نے کہا کہ چوہدری سالک کی وجہ سے نہیں آتے اس کو وزیر بننے کا شوق تھا۔ عدالت پیشی کے موقع پر صحافی نے چوہدری پرویز الہیٰ سے سوال کیا کہ چوہدری صاحب کوئی پریس کانفرنس کرنے کا ارادہ تو نہیں ہے؟۔جس کا جواب دیتے ہوئے صدر پی ٹی آئی نے کہا بالکل نہیں۔عدالت میں صحافیوں سے غیر رسمی گفتگو کرتے ہوئے انہوں نے مزید کہا کہ مجھے رات بھر تھانہ سی آئی اے میں رکھا گیا ہے، مجھ سے کسی نے کیا ملاقات کرنی، میں ہی کسی سے ملاقات نہیں کرناچاہتا،پرویز الٰہی نے کہا کہ آصف زرداری اور شریف برادران اپنا پیسہ لے آئیں تو ملک کے مالی حالات ٹھیک ہو جائیں۔