لاہور(پی پی آئی) استحکام پاکستان پارٹی کی مرکزی سیکرٹری ڈاکٹر فردوس عاشق اعوان نے کہا پٹرولیم قیمتوں میں اضافہ عوام کو کانٹوں پر گھسیٹنے کے مترادف ہے۔پی پی آئی کے مطابق فردوس عاشق نے پٹرولیم قیمتوں میں اضافے پر ردعمل میں کہا سوئی ہوئی عوام پر ایک بار پھر پٹرول بمباری کی گئی ہے، پٹرولیم مصنوعات کی قیمتوں میں اضافہ کسی صورت قبول نہیں، نگران حکومت تمام مشکلات کے باوجود عوام کو ریلیف دینے کی کوشش کرے۔مرکزی سیکرٹری استحکام پارٹی نے مزید کہا عوام دوست فیصلوں سے ہی غریب عوام کا دل جیتا جا سکتا ہے، آئی پی پی کا منشور بنیادی عوامی مسائل کے حل کا فارمولا ہے، صرف آئی پی پی تین سو یونٹ فری بجلی اور آدھی قیمت پر پٹرول کی فراہمی کی دعویدار ہے۔ڈاکٹر فردوس عاشق نے کہا مشکلات کا ازالہ کرنے کے لئے استحکام پارٹی کا برسر اقتدار آنا ضروری ہے، آئی پی پی ہی ملک میں امن و استحکام اور معاشی خوشحالی کا مشن لے کر آئی ہے۔

کراچی (پی پی آئی)جوڈیشل مجسٹریٹ نے پاکستان تحریک انصاف کے صوبائی صدر حلیم عادل شیخ کی فراڈ اور دھمکیوں سے متعلق کیس میں ضمانت منظور کر لی۔ پی ٹی آئی رہنما کو 30 اگست کو سندھ ہائی کورٹ کے باہر سے حراست میں لیا گیا تھا، انہوں نے اپنے وکیل کے ذریعے ضمانت کی درخواست دائر کی تھی۔پی پی آئی کے مطابق     درخواست گزار اور شکایت کنندہ کے ساتھ ساتھ پراسیکیوٹر کی نمائندگی کرنے والے وکلا کے دلائل سننے کے بعد جوڈیشل مجسٹریٹ احمد علی نے ایک لاکھ روپے کے ضمانتی مچلکوں کے عوض ان کی ضمانت منظور کر لی۔تاہم حلیم عادل شیخ کو فی الحال رہا نہیں کیا گیا کیونکہ ایڈووکیٹ رحمٰن مہیسر نے بتایا کہ انہیں 9 مئی کے فسادات سے متعلق مزید 6 مقدمات کا سامنا ہے۔28 اگست کو میمن گوٹھ پولیس نے حلیم عادل شیخ کے خلاف پراپرٹی ڈیلر محمد امان اللہ کی مدعیت میں مقدمہ درج کیا تھا، ایف آئی آر کے مطابق پی ٹی آئی رہنما نیشکایت کنندہ سے اپنے بھائی عظیم عادل شیخ کے ساتھ ہاؤسنگ سکیم کے حوالے سے معاہدے پر دستخط کرنے کو کہا تھا۔شکایت کنندہ نے کہا کہ انہوں نے نومبر 2019 میں معاہدے پر دستخط کیے اور اسکیم میں شامل تقریباً 400 پلاٹوں کے لیے 6 کروڑ روپے کی رقم ادا کی۔بعدازاں شکایت کنندہ کو معلوم ہوا کہ کوئی ہاؤسنگ اسکیم سرے سے موجود ہی نہیں ہے اور درحقیقت عظیم عادل شیخ نے ان کے ساتھ دھوکہ دہی کا ارتکاب کیا ہے۔ایف آئی آر میں کہا گیا کہ 28 اگست کو عظیم عادل شیخ نے شکایت کنندہ کو میمن گوٹھ میں واقع اپنے فارم ہاؤس پر بلایا جہاں درخواست گزار اور ان کے بھائیوں نے اسے گن پوائنٹ پر سنگین نتائج کی دھمکیاں دیں۔