کراچی: شارجہ میں آئی لینڈرزکو دھول چٹانے کے بعد پاکستانی کرکٹ ٹیم کے کھلاڑی اور آفیشلزوطن واپس پہنچ گئے۔ کپتان مصباح الحق کا کہنا تھا کہ جیت پوری ٹیم کے جان لڑانے سے ممکن ہوئی۔ اس فتح سے کوچ ڈیو واٹموراچھی یادوں کےساتھ رخصت ہوں گے۔قومی کرکٹرز دو حصوں میں وطن پہنچے۔ ایک ٹولی میں کپتان مصباح الحق، شارجہ ٹیسٹ کے ہیرو اظہر علی ، محمد حفیظ ، احمد شہزاد ، عبدالرحمن ، محمد طلحہ ، سعید اجمل ، راحت علی اور کوچ ڈیو واٹمور کے ہمراہ لاہور پہنچے۔میڈیا سے گفتگو میں مصباح کا کہنا تھا کہ فتح ٹیم ورک کا نتیجہ ہے ، تاریخی فتح سے حوصلے بلند ہوگئے۔مصباح الحق کا کہنا تھا کہ ڈیوواٹمور نے لڑکوں پر بہت محنت کی۔ جس کی وجہ سے بھارت ، جنوبی افریقہ اور سری لنکا کو سیریز ہرائی۔۔ آخری میچ جیت کر انھیں اچھی یادوں کےساتھ رخصت کریں گے۔اظہر علی کا کہنا تھا کہ میدان میں صرف جیت کا جذبہ لے کر اترے تو اللہ نے لاج رکھ لی۔کراچی پہنچنے والی دوسری ٹولی میں وکٹ کیپر سرفرازاحمد ، اسد شفیق، خرم منظوراورمنیجرمعین خان شامل تھے۔ معین خان کا کہنا تھا کہ ہار پر اتنا افسوس نہیں ہوتا جتنا ٹیسٹ جیت کر سیریز برابر کرنا اہم تھا۔اس موقع پرسرفراز احمد نے کہا کہ سیریز بہت اہم تھی۔ کپتان نے جس طرح کہا اسی طرح کھیلا۔

میلبورن: آسٹریلین اوپن ٹینس ٹورنامنٹ میں ٹاپ کھلاڑیوں کی عمدہ کارکردگی کا سلسلہ جاری ہے۔ راجرفیڈرر،رافیل نڈال، اینڈے مرے اوروکٹوریا آزرینکا ایونٹ کے کوارٹر فائنل میں پہنچ گئے۔میلبورن میں جاری سال کے پہلے گرینڈ سلم میں عالمی نمبر ایک رافیل نڈال کی عمدہ کارکردگی کا سلسلہ جاری ہے، نڈال ٹورنامنٹ کے پری کوارٹر فائنل میں چین کے کے نیشی کوری کو اسٹریٹ سیٹ میں شکست دے کر کوارٹر فائنل میں جگہ بنائی۔برطانیہ کے اینڈے مرے نے فرانس کے اسٹیفنی روبرٹ کو سخت مقابلے کے بعد تین کے مقابلے ایک سیٹ سے شکست دے کر کوارٹر فائنل کے کوالیفائی کیا۔ سابق عالمی نمبر ایک راجر فیڈرر نے پری کوارٹرفائنل میں فرانس جو ولفریڈ سونگا کو باآسانی چھ تین، سات پانچ اور چھ چار سے ہرا آخری آٹھ کھلاڑیوں میں پائی۔کوارٹر فائنل میں فیڈرر کا مقابلہ ایونٹ فیورٹ اینڈے مرے سے ہوگا۔ ویمنز مقابلوں میں دفاعی چیمپیئن وکٹوریا آزرینکا بھی کوارٹر فائنل میں پہنچ گئی جہاں ان کا مقابلہ پولینڈ کی ایگنسکا رڈوانسکا سے ہوگا۔

سڈنی: آسٹریلوی کرکٹ بورڈ نے جنوبی افریقہ کے خلاف ٹیسٹ سیریز کے لئے 15 رکنی اسکواڈ کا اعلان کردیا۔آسٹریلیا اور جنوبی افریقہ کے درمیان تین میچوںکی ٹیسٹ سیریز کا آغاز آئندہ ماہ 12 فروری سے سینچورین میں کھیلے جانے والے ٹیسٹ سے ہوگا، طویل دورانئے کی سیریز کے لئے آسٹریلیا نے پندرہ رکنی اسکواڈ کا اعلان کردیا ہے۔انگلینڈ کے خلاف ایشیز سیریز میں مایوس کن پرفارمنس کے باعث جارج بیلے کو ڈراپ کردیا گیا ہے، شان مارش اور ایلکس ڈولن اسکواڈ میں جگہ بنانے میں کامیاب ہوگئے، ٹیم کی قیاد ت مائیکل کلارک کریں گے، بریڈ ہیڈن ان کے نائب ہوں گے۔

میلبورن: آسٹریلین اوپن ٹینس کا کوارٹر فائنل میں پاکستان کے ٹینس اسٹار اعصام الحق مکسڈ ڈبلزمیں بھارتی ٹینس کھلاڑی ثانیہ مرزا کے مدمقابل آئیں گے ۔دلچسپ مقابلے میں اعصام الحق کا ساتھ جرمن کی جولیا گورجیس دیں گی جبکہ ثانیہ مرزا رومانیہ کے ہویاٹیکاﺅ کے ہمراہ ہوں گی ۔ اعصام اورجولیا گورجیس کی جوڑی نے دوسرے راﺅنڈ میں بیلا روس کے میکس مرنی اور آندریا ہلاواکووا کو چھ تین اور چھ چار سے شکست دی تھی ۔واضح رہے اعصام الحق اور ان کے بھارتی پارٹنر روہن بھوپننا تیسرے راﺅنڈ میں شکست کے بعد مینز ڈبلز ایونٹ سے پہلے ہی باہر ہوچکے ہیں جبکہ ثانیہ مرزا ویمنز ڈبلزکے کوارٹر فائنل میں شکست سے دوچار ہوئی تھیں۔

کراچی: کسٹم کرکٹ اکیڈمی کے ہیڈ کوچ جلال الدین کی نگرانی میں جاری فاسٹ بولنگ کیمپ میں شہر بھر سے15نوجوان کرکٹر حصہ لے رہے ہیں۔ کیمپ میں موجود کھلاڑیوں کی عمر13 سے 21سال کے درمیان ہے۔ کیمپ کے دوران کھلاڑیوں کو لائن اور لینتھ کے علاوہ ان سوئنگ اورآﺅٹ سوئنگ کے گر بھی سکھائے جارہے ہیں۔ہیڈ کوچ جلال الدین کا کہنا ہے کہ کیمپ میں صرف بولنگ ٹیکنیک ہی نہیں بولرز کو پچ ریڈنگ بھی بتائی جارہی ہے، نوجوان کھلاڑیوں نے کہاکہ ا س کیمپ سے انکی صلاحیتوں میں بے پناہ اضافہ ہوا ہے۔خصوصی طور پر کیمپ میں شامل کی جانے والی خاتون کھلاڑی نے کہا کہ کوچز نے فٹنس کے حوالے سے بھی ٹپس دی ہیں۔ شرکا کا کہنا ہے کہ صرف بولنگ نہیں بلکہ کرکٹ کے دیگر شعبوں کو نکھارنے کے لئے اس طرح کے کیمپوں کا انعقاد ہونا چاہیئے ۔