گلگت  بلتستان (پی پی آئی)گلگت بلتستان میں موبائل انٹرنیٹ سروسز بند کر دی گئی ہیں اور صرف 2 جی سروس چل رہی ہے گلگت بلتستان کے علاقے چلاس میں مشتعل مظاہرین نے اسکردو سے تعلق رکھنے والے ایک مذہبی رہنما کے مبینہ طور پر متنازع ریمارکس پر  ان کی گرفتاری کا مطالبہ کرتے ہوئے شاہراہ قراقرم اور بابوسر پاس روڈ کو 3 روز تک بند رکھا تھا۔استور، گلگت میں بھی مظاہرے کیے گئے، تاہم مذہبی رہنما آغا باقر الحسینی کے خلاف ایف آئی آر کے بعد مظاہرے ختم کر دیے گئے۔اس کے ردعمل میں اسکردو میں بازاروں اور ٹرانسپورٹ کی ہڑتال کی گئی اور مظاہرین نے جگلوٹ-اسکردو روڈ سمیت اہم سڑکوں کو بھی بلاک کردیا۔پی پی آئی کے مطابق  محکمہ داخلہ گلگت بلتستان نے فوری طور پر غیر قانونی اجتماعات اور سڑکیں بلاک کرنے پر دفعہ 144 نافذ کر دی ہے دریں اثنا اسپیشل کمیونیکیشن آرگنائزیشن (ایس سی او ایم) نے کہا کہ گلگت بلتستان میں موبائل انٹرنیٹ سروسز بند کر دی گئی ہیں اور صرف 2 جی سروس چل رہی ہے۔

کراچی (پی پی آئی)دنیا کے دس سب سے سستے شہروں کی  فہرست میں اسلام آباد اور کراچی شامل ہیں؛ ہانگ کانگ اور سنگاپور مہنگے ترین شہر قرار پائے ہیں۔ پی پی آئی کے مطابق عالمی سروے میں ہانگ کانگ، سنگاپور اور زیورخ کو دنیا کے تین مہنگے ترین شہر بتایا گیا ہے۔سوئٹزرلینڈ کے مزید تین شہر جنیوا، باسل اور برن بالترتیب چوتھے، پانچویں اور ساتویں نمبر پر ہیں۔سروے میں شامل شہروں کی اشیا اور مصنوعات کی قیمتوں کا موازنہ کیا گیا۔ سروے کے مطابق نیویارک شہر عالمی سطح پر چھٹے نمبر پر ہے جو امریکہ کا سب سے مہنگا شہر ہے۔ دیگر مہنگے ترین شہروں میں بالترتیب تل ابیب، کوپن ہیگن اور ناساو شامل ہیں۔ سروے میں دس سستے ترین شہروں کی بھی فہرست دی گئی ہے جس کے مطابق پاکستانی شہر اسلام آباد پہلے اور کراچی دوسرے نمبر پر سستا ترین شہر  ہے۔ دیگر سستے ترین شہروں میں بالترتیب ہوانا، بشکیک، دوشنبے، ونڈہوک، انقرہ، ڈربن، تیونس اور تاشقند شامل ہیں۔

لاہور(پی پی آئی)استحکام پاکستان پارٹی کے سربراہ جہانگیرترین کے بھائی عالمگیر ترین کی موت کی وجوہات سے متعلق فارنزک رپورٹ سامنے آ گئی ہے۔رپورٹ میں بتایا گیا ہے کہ ابتدائی تحقیقات میں  عالمگیر ترین کی موت بظاہر خودکشی ہے اور ان کی موت کی کوئی دوسری وجہ سامنے نہیں آئی۔عالمگیر ترین کے فون کال ڈیٹا میں منگیتر سے گفتگو کاریکارڈ مل گیا۔ پی پی آئی کے مطابق63 سالہ عالمگیر ترین اپنے گھر میں مردہ پائے گئے تھے۔ ان کی منگنی ہوئی تھی اور وہ رواں برس دسمبر میں شادی کرنے والے تھے۔اس وقت پولیس ذرائع نے کہا تھا کہ عالمگیر ترین نے پستول سے اپنے سر میں گولی ماری تھی۔