اسلام آباد (پی پی آئی) پاناما جے آئی ٹی رپورٹ کا والیم 10 جاری کرنے کیلئے دائر درخواست سپریم کورٹ میں سماعت کیلئے مقرر کر دی گئی۔ براڈ شیٹ کمپنی کی جانب سے پاناما جے آئی ٹی کا والیم 10 جاری کرنے کی درخواست پر سماعت چیف جسٹس عمر عطا بندیال کی سربراہی میں 2 رکنی بنچ 22 اگست کو کرے گا،پی پی آئی کے مطابق سپریم کورٹ نے اس حوالے سے اٹارنی جنرل سمیت دیگر فریقین کو نوٹسز جاری کر دیئے ہیں۔ براڈ شیٹ کمپنی کا مؤقف ہے کہ شریف خاندان کی غیر ملکی جائیدادوں کی تلاش میں نیب کی معاونت کی لیکن نیب نے جائیدادوں کی تلاش کا معاوضہ ادا نہیں کیا، براڈ شیٹ نے برطانیہ کی عدالت میں نیب کے خلاف واجبات کے حصول کیلئے مقدمہ دائر کیا تھا اور براڈ شیٹ نے پاناما جے ا?ئی ٹی کا والیم 10 فراہم کرنے کا حکم جاری کرنے کی استدعا کی تھی،براڈ شیٹ کمپنی والیم 10 کو برطانوی عدالت میں بطور ثبوت پیش کرنا چاہتی تھی۔یاد رہے کہ جولائی 2017 میں جسٹس آصف سعید کھوسہ کی سربراہی میں جسٹس اعجاز افضل خان، جسٹس گلزار احمد، جسٹس شیخ عظمت سعید اور جسٹس اعجاز الاحسن پر مشتمل 5 رکنی لارجر بینچ نے پاناما کیس میں سابق وزیراعظم نواز شریف کو تاحیات نااہل قرار دیتے ہوئے انہیں پارٹی صدارت سے بھی فارغ کر دیا تھا۔

 اسلام آباد (پی پی آئی)پاکستان تحریک انصاف کے استعفوں کے معاملے پر درخواست سپریم کورٹ میں سماعت کیلئے مقرر کر دی گئی۔پی پی آئی کے مطابق چیف جسٹس عمر عطا بندیال کی سربراہی میں 2رکنی بنچ 21اگست کو سماعت کرے گا،وکیل شاہد اورکزئی نے  استعفوں سے متعلق درخواست دائر کی تھی۔

باکو /کراچی (پی پی آئی)آذربائیجان کی قومی فضائی کمپنی20ستمبر سے پاکستان کیلئے باقاعدگی سے پروازیں شروع کریگی۔ یہ پروازیں اسلام آباد، لاہور اور کراچی کیلئے چلائی جائیں گی۔ پی پی آئی کے مطابق باکو سے اسلام آباد کیلئے پروازیں بدھ اور ہفتہ، لاہور کیلئے پیر اور جمعتہ المبارک اور کراچی کیلئے جمعرات اور اتوار کے روز روانہ ہوا کریں گی۔ترجمان نے بتایا کہ ان پروازوں سے سیاحت اور آمدورفت کو فروغ ملے گا اور پاکستان اور آذربائیجان کے درمیان سفارتی تعلقات مضبوط ہوں گے۔