کراچی (پی پی آئی)بڑھتی مہنگائی اور کم تنخواہوں سے ملازمت پیشہ طبقہ ناخوش ہے، دراصل غیر منصفانہ یا ناکافی اجرت کی وجہ سے بد دل ملازم اپنے کام کی جگہ پر متحرک نظر نہیں آتے۔تاہم نوکریوں کی گھٹتی ہوئی تعداد کے پیش نظر ایسے ملازم خاموشی سے دلجمعی کی بجائے بد دلی کیساتھ دفتری امور نمٹاتے ہیں۔پی پی آئی کے مطابق ایک سروے میں شامل 59 فیصد کا کہنا تھا کہ وہ اپنے کام کی جگہ پر فعال نہیں رہے کیونکہ انہیں کام میں لگاؤ نہیں رہا۔ یہ رجحان کمپنیوں کے لیے بھی بڑا مسئلہ ہے کیونکہ بد دل ملازمین کی وجہ سے پیداوار متاثر ہوتی ہے۔ماہرین کا کہنا ہے کہ کمپنیوں کو چاہیے کہ ملازمین کے لیے کام کی جگہوں پر حالات میں بہتری لائیں ورنہ ان کے اکثر ملازمین اس وقت تک بددلی سے کام کرتے رہیں گے جب تک انہیں کوئی نئی نوکری نہیں مل جاتی۔ ایک تحقیق کے مطابق مارکیٹ میں نوکری تلاش کرنے والوں کی تعداد بڑھ چکی ہے اور نئی ملازمتوں میں کمی آ ئی ہے ایک بڑی تعداد ایسے لوگوں کی بھی ہے جو نوکری چھوڑنا تو چاہتے ہیں لیکن غیریقینی معاشی صورت حال  کے سبب فوری طور پرایسا رسک لینانہیں چاہتے کیونکہ مارکیٹ میں نئی نوکریاں نہ ہونے کے برابر ہیں۔

گڈانی (پی پی آئی)سعودی ولی عہد شہزادہ محمد بن سلمان کو ان کی 38ویں سالگرہ پرپاکستان میں دلچسپ اور انوکھے اندازمیں خراجِ تحسین پیش کیا گیا ہے۔پاکستان کے صوبہ بلوچستان کے ساحل گڈانی بیچ پر سعودی ولی عہد شہزادہ محمد بن سلمان کی 38 ویں سالگرہ کے موقع پر ان کی 70 فٹ لمبی تصویر بنائی گئی۔ پی پی آئی کے مطابق ساحل پرریت سے فن پارے بنانے والے ہنرمندوں کے گروپ نے یہ تصویر سعودی ولی عہد کو خراج تحسین پیش کرنے کے لیے بنائی۔بلوچستان سے تعلق رکھنے والے 19 سالہ ساحلی آرٹسٹ سمیر شوکت نے عرب نیوز کو بتایا کہ ’ہم ولی عہد کو ان کی 38 ویں سالگرہ پر مبارکباد دینا چاہتے تھے، لہذا ہم نے گڈانی ساحل پر ان کی 70 فٹ لمبی تصویر بنائی ہے‘۔

لاہور(پی پی آئی)مسلم لیگ ن کے رہنماعطا محمد تارڑ کا کہنا ہے کہ چیئرمین پی ٹی آئی نے عالمی عدالت میں جانے کے لیے غیرملکی وکیل جیفری رابرٹسن کو ہائرکیا ہے جو اسلام مخالف ہے۔لاہور میں پریس کانفرنس کرتے ہوئے مسلم لیگ ن کے رہنما عطا تارڑ نے کہا ہے کہ جیفری رابرٹسن کے اسرائیل سے روابط رہے ہیں اور وہ ملعون سلمان رشدی کا وکیل رہا ہے۔ یہ وکیل اسلام مخالف پروپیگنڈے میں بھی شامل رہا ہے۔ جیفری رابرٹسن نے ناصرف ملعون سلمان رشدی کی وکالت کی بلکہ اسے اپنے گھر میں پناہ بھی دی۔رہنما ن لیگ نے کہا کہ چیئرمین پی ٹی آئی کو اپنی وکالت کے لیے ملعون سلمان رشدی کا ہی وکیل ملاہے جس کے ذریعے انسانی حقوق کا مقدمہ بنا کرعالمی عدالت سے مدد لی جا رہی ہے جبکہ عالمی عدالت میں مقدمات دو ممالک کے درمیان تنازعات کے جاتے ہیں۔عطا تارڑ نے کہا کہ مقدمہ عالمی عدالت میں لے جانے کا مقصد پی ٹی آئی ریاست کے خلاف عالمی عدالت جا رہی ہے۔ کوئی اپنی سیاست کی خاطر اس حد تک بھی جا سکتا ہے؟ دشمنوں نے اپنے ٹی وی شوز میں کہا کہ ہمیں چیئرمین  پی ٹی آ ٓئی سوٹ کرتا ہے۔رہنمامسلم لیگ ن نے کہا کہ چیئرمین پی ٹی آئی نے ملکی اداروں کے خلاف کام کیا۔ انھوں نے نو مئی کے واقعات، سائفر، توشہ خانہ ملک دشمنوں کوخوش کرنے کے لیے کیے۔ جو کیسز بھگت رہے ہیں یہ آپ کا ہی کیا دھرا ہے۔ توشہ خانہ کی چوری ڈکیتی اربوں روپے میں ہے۔ کیا سائفرکا کیس ہم نے بنایا؟ ہم نے کہا تھا سائفر لہرائیں؟

لاہور(پی پی آئی)انسداد دہشت گردی عدالت لاہور نے پی ٹی آئی کے  رہنما اسد عمر کو پانچ مقدمات سے ڈسچارج کر دیا۔دورانِ سماعت پولیس نے عدالت کو بتایا کہ اسد عمر 5 مقدمات میں مطلوب نہیں ہیں۔پی پی آئی کے مطابق اسد عمر نے تھانہ سرور روڈ کے تین، تھانہ ریس کورس اور گلبرگ کے ایک ایک مقدمہ میں عبوری ضمانتیں دائر کی تھیں۔مقدمہ نمبر 852/23 ریس کورس، مقدمہ نمبر 1283/23 گلبرگ مقدمہ نمبر 97/23، 103/23، 108/23 سرور روڈ میں درج ہیں جبکہ 5 مقدمات میں نو مئی کو توڑ پھوڑ اور ہنگامہ آرائی کرانے کا الزام تھا۔دوسری جانب انسداد دہشتگردی عدالت میں ماڈل ٹاؤن میں مسلم لیگ ن کا آفس جلانے سے متعلق بھی کیس کی سماعت ہوئی۔