کراچی (پی پی آئی)پاکستان میں ہر پانچ منٹ میں ایک شخص ٹریفک حادثے کا شکار ہو جاتا ہے، عالمی ادارہ صحت کے مطابق ملک میں ٹریفک حادثات کے باعث سالانہ 28 ہزار سے زائد افراد ہلاک ہوتے ہیں۔روڈ سیفٹی کے حوالے سے پاکستان کا شمار بد ترین ممالک کی فہرست میں نمایاں ہے،  اسی لئے مرحوم عبدالستار ایدھی نے تمام اہم شاہراہوں پر حادثات کے شکار افراد کیلئے اسپتالوں کے قیام کی تجویز پیش کی تھی نیشنل ٹرانسپورٹ ریسرچ کی رپورٹ کے مطابق پاکستان میں زیادہ تر ٹریفک حادثات انسانی غلطی کی وجہ سے ہوتے ہیں، جس میں ڈرائیورز کی غفلت سب سے نمایاں ہے۔ پی پی آئی کے مطابقسب سے زیاد ہ ٹریفک حادثات خیبر پختون خوا، اس کے بعد پنجاب اسلام آباد اور پھر سندھ میں رپورٹ ہوتے ہیں، مگر اندرون سندھ میں حادثات کی بڑی وجہ سڑکوں کی خستہ حالت ہے یہی سبب ہے کہ ابتدائی طبی امداد نہ ملنے کی وجہ سے بھی زخمیوں کی بڑی تعداد لقمہ اجل بن جاتی ہے سندھ بھر میں 40 فی صد جان لیوا حادثات انڈس ہائی وے پر جامشورو سے سیہون راستے پر ہوتے ہیں، اس روڈ کو سندھ بھر میں ’شاہراہ موت‘ کے نام سے پکارا جاتا ہے۔ٹریفک پولیس کے مطابق کراچی میں 65 فی صد حادثات ہیوی گاڑیوں کی وجہ سے ہوتے ہیں، جن کا سب سے زیادہ شکار موٹر سائکل سوار بنتے ہیں۔ ایدھی فاؤنڈیشن کے مطابق 2022 میں ٹریفک حادثات میں 781 افراد ہلاک ہوئے تھے۔نیشنل روڈ سیفٹی کے اندازے کے مطابق 2020 میں پاکستان میں سڑکوں پر ہونے والے حادثات 77 فی صد تک بڑھے تھے، اگر حادثات کو روکنے کی کوئی حکمت عملی پیش نہ کی گئی تو پاکستان میں ان حادثات کی تعداد 2030 میں 200 فی صد تک بڑھنے کا خدشہ ہے۔

کراچی (پی پی آئی)کنٹونمنٹ بورڈ کلفٹن (سی بی سی) کی جانب سے مکینوں کے پراپرٹی ٹیکس میں ضافے پر سندھ ہائی کورٹ نے سی بی سی اور ڈیفنس ہاؤسنگ اتھارٹی کو رہائشیوں کے خلاف کوئی بھی زبردستی کارروائی کرنے سے روک دیا جنہوں نے عدالت میں 2 درخواستیں دائر کر رکھی ہیں۔ پی پی آئی کے مطابق  ڈی ایچ اے اور کلفٹن کے کچھ رہائشیوں نے سندھ ہائی کورٹ میں درخواست دائر کی تھی کہ  اسسٹنٹ ڈائریکٹر جنرل ملٹری لینڈ اینڈ کنٹونمنٹ بورڈز راولپنڈی کے جاری کردہ خط کو مسترد کیا جائے، ان کا مؤقف تھا کہ اس طرح کے خط کے ذریعے غیر قانونی، حد سے زیادہ اور من چاہا ٹیکس لگایا گیا ہے جسٹس محمد جنید غفار کی سربراہی میں 2 رکنی بنچ نے کیس کی سماعت کی، ایڈووکیٹ زہیم حیدر اور سی بی سی کے ڈپٹی چیف ایگزیکٹو آفیسر ضمیر حسین عدالت میں پیش ہوئے۔تاہم کنٹونمنٹ بورڈ کراچی (سی بی کے) کی جانب سے کوئی بھی حاضر نہیں ہوا اور بنچ نے دوبارہ سی بی کے کے ساتھ ساتھ ایڈووکیٹ جنرل کو 20 ستمبر کو ہونے والی آئندہ سماعت کے لیے نوٹس جاری کردیا۔ایک درخواست میں درخواست گزاروں کی نمائندگی کرتے ہوئے ایڈووکیٹ سعادت یار خان نے درخواست گزاروں کو جائیداد اور دیگر ٹیکسوں کی ادائیگی کے لیے جاری کیے گئے چالان کے حوالے سے عبوری حکم امتناع کی استدعا کی۔

کراچی (پی پی آئی)علمی ادبی و ثقافتی تنظیم انجمن گلستان ادب پاکستان جمعہ 8ستمبر کو یوم نفاذ اردو منائے گی۔ پی پی آئی کے مطابق  اس سلسلے میں انجمن کا خصوصی اجلاس دن گیارہ بجے  گلستان جوہر میں منعقدہوگا جس میں سپریم کورٹ آف پاکستان کے اردو کے نفاذ کے فیصلے کے حوالے سے مقررین اظہار خیال کریں گے۔

کوئٹہ (پی پی آئی)کوئٹہ کے نواحی علاقہ اغبرگ میں مبینہ مقابلے میں 4 دہشتگرد مارے گئے۔پولیس کے مطابق  اغبرگ میں کاؤنٹر ٹیرارزم ڈیپارٹمنٹ (سی ٹی ڈی) کا دہشتگردوں سے فائرنگ کا تبادلہ ہوا۔پی پی آئی کے مطابق ہلاک ہونے والے تمام افراد کا تعلق کالعدم تنظیم سے ہے۔مارے جانے والے دہشتگرد پولیس اور قانون نافذ کرنے والے اداروں کی ٹارگٹ کلنگ میں ملوث تھے۔سی ٹی ڈی نے ملزمان کے زیراستعمال مکان سے خودکش جیکٹ، 5 دستی بم اور دھماکہ خیز مواد سمیت دیگر ممنوعہ اشیا برآمد کرنے کا دعویٰ کیا۔