اسلام آباد(پی پی آئی) ایڈووکیٹ ایمان مزاری کی اپنے خلاف درج مقدمات کی تفصیل فراہمی کی درخواست پر سماعت اسلام آباد ہائی کورٹ میں ہوئی۔ اسلام آباد ہائی کورٹ نے ایمان مزاری کو گرفتار کرکے اسلام آباد سے باہر نہ لے جانے کا حکم دے دیا۔ جسٹس میاں گل حسن اورنگزیب کے روبرو شیریں مزاری کی جانب سے وکیل سلمان اکرم راجا اور قیصر امام پیش ہوئے۔ وکلا نے اپنے دلائل میں کہا کہ ہمیں ایسی درخواست دائر کرنے کی ضرورت نہیں تھی لیکن حالات ہی کچھ ایسے بن چکے ہیں۔ سماعت کے موقع پر ڈاکٹر شیریں مزاری بھی عدالت پہنچیں۔ 2 درخواستیں ایمان مزاری کے خلاف درج ہوئیں، دہشت گردی اور بغاوت کی دفعات لگائی گئیں۔ 2 کیسز میں گرفتاری ہوئی دونوں میں ضمانت پر رہائی ہوئی اور پھر اڈیالہ جیل کے باہر سے ایمان مزاری کو تیسرے مقدمے میں گرفتار کر لیا گیا۔جسٹس میاں گل حسن اورنگزیب نے ریمارکس دیے کہ ہم بڑے مشکل دور سے گزر رہے ہیں۔ ایمان مزاری اس عدالت میں موجود تھی، میں نے کہا اپنی ماں کی زبان کنٹرول کریں۔ ایمان مزاری نے یقین دہانی کرائی، پھر انہوں نے اپنی زبان خود کنٹرول نہیں کی۔ 2023ء آئین اور عدلیہ پر عملدرآمد کے لحاظ سے تاریک ترین سال ہے۔ وکیل نے عدالت میں کہا کہ اگر کسی نے کوئی جرم کیا ہے تو اس کو قانون کے مطابق عدالت دیکھ سکتی ہے۔ یہ جو مقدمہ درج کیا گیا یہ بدنیتی پر مبنی ہے۔ ہمیں بتایا جائے ہمارے خلاف کتنے مقدمات درج ہیں۔ ایمان مزاری کو کسی اور مقدمے میں گرفتاری سے روکا جائے۔ اس وقت ہم نارمل حالات سے نہیں گزر رہے۔ ایمان مزاری کو اسلام آباد سے باہر کسی اور مقدمے میں لے جانے سے روکا جائے۔ عدالت نے استفسار کیا کہ ایڈووکیٹ ایمان مزاری کے خلاف ملک بھر کتنے مقدمات درج ہیں؟ عدالت نے حکم دیا کہ کل تک سیکرٹری داخلہ صوبوں سے رپورٹس طلب کرکے آگاہ کریں۔ اسلام آباد ہائی کورٹ نے آئندہ سماعت تک ایمان مزاری کو گرفتار کرکے اسلام آباد سے باہر لے جانے سے روک دیا اور حکم دیا کہ سیکرٹری داخلہ یقینی بنائیں کہ ایمان مزاری کو گرفتار کرکے اسلام آباد سے باہر نہیں لے جایا جائے گا۔ عدالت نے حکم دیا کہ ایمان مزاری کے خلاف 20 اگست کے بعد کا کوئی وقوعہ ہے تو اس میں گرفتار نہ کیا جائے۔ بعد ازاں عدالت نے کیس کی مزید سماعت کل تک ملتوی کردی۔

لاہور (پی پی آئی) سرکاری سکول کے طلباء کو اگلے تعلیمی سال میں مفت کتابیں نہیں ملیں گی، پنجاب ٹیکسٹ بک بورڈ نے مفت کتابیں دینے سے انکار کر دیا۔ حکومت پنجاب ٹیکسٹ بک بورڈ کی 10 ارب کی مقروض ہے۔ حکومت نے 18 ارب کی کتابیں ٹھیکیداروں سے چپھوائیں جبکہ 18 ارب میں سے صرف 8 ارب ادا کئے۔ اُن کے مطابق بقیہ واجبات کی عدم ادائیگی کی وجہ سے کتابیں چھاپنے میں مشکلات کا سامنا ہے۔ ٹیکسٹ بک بورڈ نے محکمہ سکول ایجوکیشن کو مراسلہ جاری کر دیا۔ مراسلہ کے مطابق رواں سال فنانس ڈیپارٹمنٹ نے مفت کتابوں کیلئے صرف ساڑھے 3 ارب مختص کیے گئے ہیں۔ کتابوں کی چھپائی کیلئے فراہم کیے گئے فنڈز ناکافی ہیں۔ اگر مزید رقم جاری نہ ہوئی تو سال کے آخر تک کتابوں کی چھپائی ممکن نہیں ہوگی۔ مفت کتابیں نہ ملیں تو سکولوں کے اڑھائی کروڑ بچے تعلیم سے محروم ہو جائیں گے۔ پنجاب میں سرکاری سکولوں کے طلباء کو سالانہ فی کس 3 ہزار کی کتابیں مفت ملتی ہیں۔

اسلام آباد (پی پی آئی)چیئرمین پاکستان تحریک انصاف عمران خان کو رہائی کا پروانہ نا مل سکا، عدالت نے سائفر کیس میں مزید 14 روز کا ریمانڈ دے دیا۔ تفصیلات کے مطابق پی ٹی آئی چیئرمین کے خلاف سائفر کیس کی سماعت اٹک جیل میں ہوئی، آفیشل سیکریٹ ایکٹ عدالت کے جج ابو الحسنات ذوالقرنین نے اٹک جیل پہنچ کر کیس کی سماعت کی، آفیشل سیکرٹ ایکٹ کے تحت قائم عدالت نے14روزہ ریمانڈدے دیا، عدالتی فیصلے کے تحت چیئرمین پی ٹی آئی 13 ستمبر تک جوڈیشل ریمانڈ پر ہوں گے۔ چیئرمین پی ٹی آئی کو خصوصی عدالت کے جج ابوالحسنات ذوالقرنین کے روبروپیش کیاگیا اور حاضری لگائی گئی، دوران سماعت جیل کے باہرسیکیورٹی کے سخت انتظامات کئے گئے تھے،چیئرمین پی ٹی آئی کی لیگل ٹیم نے جیل میں ٹرائل کا نوٹیفکیشن غیر قانونی قرار دے کر کالعدم قرار دینے کی درخواست بھی دائر کردی ہے۔ واضح رہے کہ کل اسلام آباد ہائیکورٹ سے توشہ خانہ کیس میں رہائی کا پروانہ ملنے کے بعد عمران خان کو سائفر کیس میں آج تک کیلئے جوڈیشل ریمانڈ پر جیل بھیج دیا گیا تھا، ساتھ ہی ساتھ عدالت نے پی ٹی آئی چیئر مین کو آج ذاتی حیثیت میں عدالت طلب کیا تھا جس پر وزارت داخلہ نے سیکیورٹی خدشات کا اظہار کیا تھا، سیکیورٹی رسک ہونے کی وجہ سے وزارت قانون نے سائفر کیس کی سماعت اٹک جیل میں کرنیکی اجازت دی تھی،وزارت قانون سے اجازت ملنے کے بعد آفیشل سیکریٹ ایکٹ عدالت کے جج ابو الحسنات ذوالقرنین آج صبح کیس کی سماعت کیلئے اٹک جیل پہنچے اور کیس کی سماعت کی۔دوسری جانب پی ٹی آئی نے عمران خان کیخلاف سائفر کیس کی سماعت اٹک جیل میں کرنے کا فیصلہ مسترد کر دیا ہے، ترجمان پی ٹی آئی کی جانب سے جاری بیان میں کہا گیا ہے کہ توشہ خانہ کی طرح سائفر کیس میں بھی بے انصافی کی بنیاد رکھ دی گئی، بند کمرے میں ٹرائل کی قانون میں کوئی گنجائش نہیں ہے اور نہ آئین اس کی اجازت دیتا ہے،چیئرمین تحریک انصاف کے خلاف مقدمہ کھلی عدالت میں چلایا جائے، خفیہ ٹرائل یا اس کے نتیجے میں سنائے گئے کسی فیصلے کی قانونی حیثیت نہیں ہوگی۔

لاہور (پی پی آئی) تاجروں نے امیر جماعت اسلامی کی 2ستمبر کو بجلی بلوں میں اضافے کیخلاف ملک گیر ہڑتال کی حمایت کردی۔ ہڑتال کی حمایت کا اعلان صدر آل پاکستان انجمن تاجران خالد پرویز، محمد اشرف بھٹی صدر انجمن تاجران پاکستان، سابق نائب صدر لاہور چیمبر حارث عتیق اور شیخ عتیق الرحمن صدر بانو بازار انارکلی نے کیا۔ امیر جماعت اسلامی لاہور ضیا الدین انصاری نے تاجر برادری سے ملاقات کی، تاجر برادری کو بھی بجلی بلوں میں اضافے کیخلاف احتجاج میں شرکت کی دعوت دی۔ مزید پڑھیں: بجلی بلوں میں ریلیف کیلئے آئی ایم ایف نے تحریری پلان مانگ لیا وفد میں جنرل سیکرٹری جماعت اسلامی لاہور خالد احمد بٹ، اعجاز تنویر صدر پاکستان بزنس فورم لاہور، ای سی ممبر لاہور چیمبر موجود، عبدالودود علوی سینئر نائب صدر پاکستان بزنس فورم پنجاب، چوہدری محسن بشیر مرکزی ایڈیشنل سیکرٹری جنرل پاکستان بزنس فورم، صدر جماعت اسلامی یوتھ لاہور جبران بٹ، احمد سلمان بلوچ بھی موجود تھے۔