کوٹ رادھا کشن(پی پی آئی) قصور ظفر پھاٹک کے قریب سابق صوبائی وزیر انسانی حقوق اعجاز عالم آگسٹین پر قاتلانہ حملہ ہوا تاہم وہ معجزانہ طور پر محفوظ رہے۔تفصیلات کے مطابق سابق صوبائی وزیر دوست سے ملنے آئے تھے کہ واپسی پر نامعلوم مسلح دو موٹر سائیکل سوار افراد نے گاڑی پر فائرنگ کردی، گاڑی میں صوبائی وزیر اعجازِ عالم سمیت ان کا بھتیجا بھی موجود تھا تاہم دونوں معجزانہ طور پر محفوظ رہے۔پی پی آئی کے مطابقاطلاع ملنے پر پولیس موقع پر پہنچ گئی اور مقدمہ درج کر کے تحقیقات کا آغاز کردیا گیا ہے۔

اسلام آباد (پی پی آئی)پاکستان ریکوڈک میں اپنے حصص سعودی عرب کو فروخت کرنے کے لئے شرائط کا مسودہ تیار کررہا ہے۔ذرائع کا کہنا ہے کہ توانائی ڈویژن سرمایہ کاری بورڈ (بی او آئی) کے ساتھ مل کر ریکوڈک سونے اور تانبے کی کانوں میں وفاقی حکومت کے 25 فیصد حصص کی قیمت کا تھرڈ پارٹی جائزہ لینے کے لیے فنانشل ایڈوائزر (مالیاتی مشیر) کی خدمات حاصل کرنے کے لیے شرائط و ضوابط کا مسودہ تیار کر رہا ہے، تاکہ سرکاری حصص کو سعودی عرب کے پبلک انویسٹمنٹ فنڈ (پی آئی ایف) کو فروخت کیا جا سکے۔ پی پی آئی کے مطابق    جولائی 2023 میں پاکستان کی چار سرکاری پیٹرولیم کمپنیوں او جی ڈی سی ایل، پی ایس او، پی پی ایل اور جی ایچ پی ایل نے گوادر بندرگاہ پر پاکستان کی سب سے بڑی آئل ریفائنری کی تعمیر کے لیے سعودی عرب کے ساتھ مفاہمت کی یادداشت پر دستخط کیے تھے۔

 اسلام آباد (پی پی آئی)عالمی مالیاتی ادارے (آئی ایم ایف) نے فسکل مانیٹر رپورٹ 2023 جاری  کی ہے جس میں خسارہ جی ڈی پی کے 6.5 فیصد کے بجائے 7.6 فیصد رہنے کی پیشگوئی کی گئی ہے،رپورٹ کیمطابق اس سال پاکستان کا مالی خسارہ ہدف سے 1137 ارب زیادہ ہونے کا تخمینہ لگایا گیا ہے۔  رپورٹ میں کہا گیا ہے کہ سال 2024-23 میں خسارہ 8 ہزار42 ارب روپے تک پہنچ جائے گا جبکہ حکومت نے مالی خسارے کا ہدف 6 ہزار 905 ارب روپے مقرر کر رکھا ہے،  پی پی آئی کے مطابققرضوں کی شرح 60 فیصد کے قانونی ہدف کے بجائے 72.2 فیصد رہے گی، اس سال پرائمری سرپلس 0.4 فیصد ہدف کے مطابق 421 ارب رہنے کا امکان ہے۔  اس کے علاوہ  مجموعی محاصل 12.5 فیصد اور  مجموعی اخراجات جی ڈی پی کا 20.1 فیصد رہیں گے۔