ڈھاکا: بھارتی کرکٹ ٹیم کے کپتان مہندرا سنگھ دھونی نے آئی پی ایل میچ اسکینڈل میں بی سی سی آئی سر براکی برطرفی کے بعد چنائی سپر کنگز کی کپتانی اور انڈیا سیمنٹ لمیٹڈ کی نائب صدر سے مستعفی ہونے کی پیش کش کر دی۔دھونی آئی پی ایل میچ فکسنگ میں با رہا الزامات لگائے جانے پر دل برداشتہ ہیں، تاہم دھونی نے ان پر لگائے جانے والے تمام الزامات کی سختی سے تردید کی ہے ۔ دھونی نے انڈیا سیمنٹ کے مالک او ر بر طرف بی سی سی آئی چیف سری نواسن سے ٹیلی فون پر بات کی اور ان سے درخواست کی کہ انڈیا سیمنٹ اور چنائی سپر کنگز کی کپتانی سے دیا گیا ان کا استعفیٰ منظور کر لیاجائے۔ بھارتی ذرائع کا کہناہے کہ دھونی اور سری نواسن کے درمیان مختلف مسائل پر گفت وشنید چل رہی ہے ۔ دھونی کا کہنا ہے کہ آئی پی ایل فکسنگ اسکینڈل میں ان پر لگائے گئے الزامات سے ان کی شہرت داغدار ہوئی ہے جس کا واحد حل یہی ہے کہ دونوں عہدوں سے سبکدوش ہو جاﺅں۔ دھونی کی کپتانی میں چنائی سپر کنگ نے سب سے زیادہ دو دفعہ آئی پی ایل ایوارڑ جیتا ہے جبکہ پانچ دفعہ فائنل کھیلنے کا اعزاز بھی حاصل کیا ، جبکہ دھونی کی قیادت میں بھارتی کرکٹ ٹیم نے ٹی ٹوئنٹی ورلڈ کپ اور ایک روزہ ورلڈ کپ بھی جیتا۔

لاہور: پاکستان کرکٹ بورڈ کی انتظامی کمیٹی کا اجلاس پیر کو لاہور میں ہورہا ہے۔ حکام آئی سی سی میں بگ تھری کی اجارہ داری کے حوالے سے حتمی لائحہ عمل تیار کریں گے۔پی سی بی ذرائع کے مطابق پاکستان کے پاس بگ تھری ایشو پرکوئی کارڈ نہیں ہے۔ اس لئے حمایت کے بدلے بھارت سے دو طرفہ سیریز کی بحالی کے لئے کوشش کی جائے گی۔ آئی سی سی چیف ایگزیکٹیو کمیٹی کا اجلاس 5اور6 اپریل کو ڈھاکا میں ہورہاہے۔جس کے بعد9اور10 اپریل کو دبئی میں ایگزیکٹیو بورڈ اجلاس ہوگا۔جس میں تین بڑوں بھارت، انگلینڈ اور آسڑیلیا کی اجارہ داری پر مبنی مسودے کو حتمی شکل دی جائے گی۔ جنوبی افریقہ اور سری لنکا کی طرف سے تین بڑوں کی حمایت کے بعد ڈرافٹ منظور کیا جا چکا ہے۔ پاکستان کے ووٹ کی صرف اخلاقی حیثیت رہ گئی ہے۔اس صورتحال میں پی سی بی کے پاس حمایت کے سوا کوئی چارہ نہیں ہے۔ پی سی بی حکام دبئی میں اجلاس سے پہلے کوئی ایسا لائحہ عمل تیار کرنا چاہتے ہیں جس سے پاکستان کرکٹ کو کچھ نہ کچھ ہاتھ لگ جائے۔ بورڈ کی انتظامی کمیٹی کا اجلاس پیر کو لاہور میں ہورہا ہے۔ جس میں حکام حتمی موقف تیار کرنے کی کوشش کریں گے۔ذرائع کے مطابق چیئرمین پی سی بی نجم سیٹھی اور چیف آپریٹنگ آفیسر سبحان احمد مختلف کرکٹ بورڈز کے سربراہان سے مسلسل رابطے میں ہیں۔بگ تھری کے معاملے میں تنہا رہ جانے پر پاکستان کے ووٹ کی کوئی اہمیت باقی نہیں رہی۔ پی سی بی کی پوری کوشش ہے کہ اخلاقی بنیاد پر آئندہ سال بھارت کے ساتھ دو طرفہ سیریز بحال کرانے میں کامیابی حاصل ہوجائیں۔

چٹاگانگ: نیوزی لینڈ کے کپتان برینڈن مک کولم نے نیدرلنڈ کے خلاف میچ وننگ اننگز کھیلتے ہوئے ٹی ٹوئنٹی کرکٹ میں 2ہزار رنز بنانے والے دنیا کے پہلے بیٹسمین بن گئے۔ کیوی کپتان نے ورلڈ ٹی ٹوئنٹی میں ہالینڈ کے خلاف شاندار65رنز بنائے اورجب برینڈن نے 21واں رن بنایاتو ٹی ٹوئنٹی کیریئر میں ان کے 2ہزار رنز مکمل ہوگئے۔ میک کولم نے 67ٹی ٹوئنٹی میچز میں دوہزار رنز مکمل کرلئے۔ وہ مختصر فارمیٹ کی انٹرنیشنل کرکٹ میں دو سنچریاں بنانے والے اب تک دنیا کے واحد بیٹسمین ہیں۔انھوں نے 12نصف سنچریاں بھی بنا رکھی ہیں۔ اس طرز کی کرکٹ میں برینڈن مک کولم کابہترین اسکور 123 ہے۔کیوی کپتان ٹی ٹوئنٹی کرکٹ میں 85 چھکے اور ایک سو92 چوکے لگاچکے ہیں۔ٹی ٹوئنٹی ورلڈ کپ کے اہم میچ میں نیوزی لینڈ نے نیدر لینڈ کو 6وکٹوں سے شکست دے دی۔

ڈھاکا: سعید اجمل ٹی ٹوئنٹی ورلڈ کپ میں انڈیا سے ایک اور ٹا کرے کے خواہاں ہیں، سعید اجمل کا کہناہے کہ رواں ورلڈ کپ میں انڈیا کے ساتھ ایک اور میچ ہونا چاہے، انھوں نے کہا کہ گروپ میں ہمارے دو میچ باقی رہتے ہیں اور سیمی فائنل تک رسائی کے لیے ان دونوں میچوں میں کامیابی بہت ضروری ہے۔ انھوں نے کہا کہ اس وقت میری توجہ گروپ کے دو نوں اہم میچوں پرہے ، لیکن میری شدید خواہش ہے کہ اسی ٹورنامنٹ میں بھارتی بلے بازوں کے ساتھ ایک اور ٹاکرا ہو۔ آئی سی سی کی رینکنگ میں ہر طرز کی کرکٹ میں سر فہرست پاکستانی اسٹار آف اسپنر نے کہا کہ پاکستانی ٹیم میں سیمی فائنل تک رسائی کی مکمل صلاحیت ہے اور انڈیا کے ساتھ دوسرا میچ خارج ازامکان نہیں ہے ۔ گروپ میچ میں پاکستان انڈیا سے یک طرفہ مقابلے کے بعد ہار گیا تھا جس میں اجمل کی کارکردگی بھی غیر تسلی بخش رہی تھی لیکن اجمل نے واضح کر دیا کہ بھارتی بیٹسمینوں کے خلاف بولنگ کرتے ہوئے لطف اندوز ہوتا ہوں، اجمل کا کہناتھا کہ ٹی ٹوئنٹی میں کسی بھی بولر کو بہت مشکل ہوتاہے اور بھارت کے خلاف یہ مزید مشکل چیلنج بن جاتاہے کیونکہ انڈیا کے خلاف میچ کا پریشراور جیت کی توقع لگائے بیٹھے عوام کی امیدوں پر پورا اترنا ہوتاہے ، انھوں نے کہاکہ مشکل وقت میں کپتان کی جانب سے ٹیم کے اہم بولر کی حیثیت سے اوور دینے پر کوئی پریشر محسوس نہیں کرتا۔ اب میں ٹیم میں اپنا کر دار کے حوالے سے عادی ہو چکا ہوں، اور پریشر میں بولنگ کر تے ہوئے لطف اندوز ہوتاہوںکیونکہ ساتھی کھلاڑی میری حوصلہ افزائی کرتے ہیں۔ اجمل نے کہاکہ کوئی بھی بولر چاہتاہے کہ دنیاکا نمبر ون بولر بن جاﺅںلیکن مجھے ٹیم کی جیت میں اہم کر دار اداکر نازیادہ اچھا لگتاہے، ٹی ٹوئینٹی کر کٹ میں کچھ بھی ہوسکتا ہے اس لیے ہماری کوشش ہوگی کہ بنگلہ دیش اور ویسٹ انڈیز کے خلاف اپنی بہترین کارکردگی دکھائیں کیونکہ دونوں ٹیمیں اس فارمیٹ میں خطرناک ہیں۔