بیونس آئرس: ارجنٹائن ڈاکار ریلی کے کار ایونٹ میں دفاعی چیمپئن پیٹر ہانسل اور بائیک میں برطانیہ کے سنڈرلینڈ نے دوسرا مرحلہ جیت لیا۔ارجنٹائن کے صحراوں میں جاری ڈاکار ریلی میں ڈرائیورز اور بائیک رائیڈرز کے درمیان سنسنی خیز مقابلوں کا سلسلہ جاری ہے۔ کار ریس میں دفاعی چیمپئن جرمنی کے پیٹر ہانسل نے شاندار ڈرائیونگ کرتے ہوئے پہلی پوزیشن اپنے نام کی۔ وہ مقررہ فاصلہ تین گھنٹے تریپن منٹ اور پانچ سیکنڈز میں طے کر کے سرفہرست رہے۔ سپین کے کارلوس کی دوسری اور جنوبی افریقہ کے جینئل ڈویلیئرز کی تیسری پوزیشن رہی۔ موٹر بائیک رائیڈرز نے بھی کچے راستوں پر خوب مہارت دکھاتے ہوئے بہترین رائیڈنگ پیش کی۔ کئی رائیڈر کو دشوار گزار رستے میں پتھروں کے باعث اپنا سفر روکنا پڑا۔ برطانیہ کے سنڈرلینڈ نے ہمت دکھاتے ہوئے اپنا سفر تیز ترین مدت میں مکمل کر کے پہلی پوزیشن حاصل کی۔ چلی کے فرانسسکو لوپز دوسرے اور سپینش رائیڈرجون بریڈاتیسرے نمبر پر رہے۔

میڈرڈ: اسپینش لالیگا لیگ میں ریال میڈرڈ نے سیلٹا ڈی ویگو کو تین صفر سے شکست دے دی۔ اسٹار کھلاڑی کرسٹیانو رونالڈو نے کیرئیر میں گولز کی چار سنچریاں مکمل کرلیں۔ برناباو اسٹیڈیم میں کھیلے جانے والے میچ میں پہلے ہاف میں کوئی ٹیم گیند کو جال میں پہنچانے میں کامیاب نہ ہوسکی۔دوسرے ہاف میں ریال میڈرڈ نے 66ویں منٹ میں بینزیما کے گول کی بدولت برتری حاصل کی۔ 82ویں منٹ میں پرتگال کے اسٹار کھلاڑی کرسٹیانو رونالڈو نے گول کرکے ٹیم کی برتری کو دگنا کردیا۔میچ کے آخری لمحات میں رونالڈو نے دوسرا گول کرکے ٹیم کو تین صفر سے جیت دلادی۔ حریف ٹیم میچ میں کوئی بھی گول کرنے میں کامیاب نہ ہوسکی۔ کرسٹیانو رونالڈو نے کیرئیر میں گولز کی چار سنچریاں مکمل کرلی ہیں۔لالیگا لیگ میں ریال میڈرڈ کی ٹیم چوالیس پوائنٹس کے ساتھ تیسرے نمبر پر ہیں۔ بارسلونا کی ٹیم49پوائنٹس کے ساتھ لیڈ کررہی ہے۔

کراچی: آزمائشی طورپرشروع ہونے والی ایک روزہ کرکٹ کے آغاز کو 44 سال بیت گئے۔ون ڈے کرکٹ میں اب تک3457 ون ڈے میچزکھیلے جاچکے ہیں۔ کرکٹ کی تاریخ صدیوں پرانی ہے۔ جینٹل مین گیم کی ابتدا برطانیہ سے ہوئی لیکن اس وقت تک اس کھیل سے گورے ہی واقف تھے۔وقت بدلتا گیا۔ کھیل میں جدت آتی رہی اور پھر کرکٹ دنیا بھر میں کھیلی جانے لگی،اس کھیل کے شیدائی بڑھ گئے اور پھرفٹبال کے بعد یہ دنیا کا سب سے زیادہ پسند کیا جانے والا کھیل بن گیا۔ ٹیسٹ کرکٹ کے بعد پانچ جنوری 1971کو ایک روزہ کرکٹ کا آزمائشی طور پرانعقاد ہوا جس کو شائقین کرکٹ نے دنیا بھر میں عالمی سطح کی اونچائیو ں پر پہنچا دیا۔ون ڈے کرکٹ کی روزافزا مقبولیت کا یہ عالم ہوا کہ44سال کے دوران اس طرز کی کرکٹ کے دس عالمی کپ منعقد ہوچکے ہیں، دنیاکی 25 ٹیموں کے درمیان مجموعی طور پر3457 ون ڈے میچزکھیلے جاچکے ہیں۔بھارتی ٹیم نے سب سے زیادہ844 ایک روزہ میچزکھیلے پاکستان نے 812 ایک روزہ میچز میں 434میں کامیابیاں سمیٹیں۔ ایک روزہ کرکٹ میں پاکستان نے کئی کارنامے بھی انجام دیئے۔عمران خان کی قیادت میں 1992 میں عالمی کپ کا اعزاز اپنے نام کیا۔ وسیم اکرم اور وقار یونس جیسے عظیم بولرز پیدا کئے اور ون ڈے میں کئی منفرد ریکارڈز آج بھی پاکستان ہی کے پاس ہیں۔

ہوائی: یو ایس اے گالف چیمپئن شپ امریکا کے زیک جانسن نے جیت لی۔ امریکی ریاست ہوائی میں ہونے والے 57 لاکھ امریکی ڈالر انعامی رقم والی چیمپئن شپ میں امریکا کے زیک جانسن نے کامیابی حاصل کی۔زیک جانسن نے چیمپئن شپ کے آخری روز سات انڈر پار کے ساتھ کے برتری حاصل کی اور ٹورنامنٹ کے فاتح قرار پائے۔ ایونٹ میں امریکا کے ہی جارڈن اسپیتھ نے دوسری پوزیشن حاصل کی۔