فیصل آباد(پی پی آئی) مسلم لیگ ن کے سنئیر رہنما اور سابق وزیرِ مملکت برائے پانی و بجلی عابد شیر علی نے کہا ہے کہ پارٹی قائد محمد نواز شریف کا  پاکستان پہنچنے پر تاریخی استقبال ہوگا صوبائی ڈویژنل، ضلعی، سٹی سمیت تمام عہدیدار ان اپنی تیاریاں جاری رکھیں بہت جلد مشاورتی اجلاس کرکے استقبال کے لئے جانے والے قافلے کے حو الے سے حتمی فیصلے کئے جائیں گیپی پی آئی کے مطابق  انہوں نے کہاکہ محمد نواز شریف پاکستان کی حقیقی معنوں میں ترقیاتی منصوبوں کا آغاز کرکے انہیں پایہ تکمیل تک پہنچا کر ترقی کی راہ پر گامزن کریں گے۔

لاہور(پی پی آئی)لاہور ہائیکورٹ میں تحریک انصاف کے صدر چودھری پرویز الٰہی کو گھر نہ پہنچانے کیخلاف توہین عدالت درخواست سماعت کیلئے مقرر کردی گئی۔پی پی آئی کے مطابق جسٹس سلطان تنویر احمد2اکتوبر کو درخواستوں پر سماعت کریں گے،عدالت نے ڈی آئی جی آپریشنز اور ڈی آئی جی انوسٹی گیشن کو فرد جرم  کیلئے طلب کر رکھا ہے، پی پی آئی کے مطابق عدالت نے آئی جی اسلام آباد کے ناقابل ضمانت وارنٹ گرفتاری جاری کررکھے ہیں۔

واشنگٹن(پی پی آئی) امریکا  نے بھی  نے پاکستان میں عید المیلاد النبیﷺ کے روز بلوچستان اور خیبرپختونخوا میں ہونے والے خودکش حملوں میں قیمتی جانوں کے ضیاع کی مذمت کی ہے۔پی پی آئی کے مطابق سماجی رابطے کی ویب سائٹ پر اپنے مذمتی بیان میں امریکی محکمہ خارجہ کے ترجمان نے کہا ہے کہ امریکا بلوچستان اور خیبرپختونخوا میں ہونے والے خودکش حملوں کی مذمت کرتا ہے جن میں نمازیوں سمیت دیگر افراد ہلاک اور زخمی ہوئے۔امریکی محکمہ خارجہ کے ترجمان میتھیو ملر نے اپنے ٹوئٹ میں مزید کہا ہے کہ پاکستانی بلا خوف و خطر اپنے عقیدے پر عمل کرنے کے مستحق ہیں، ہم ان خاندانوں کے ساتھ گہری تعزیت کرتے ہیں جنہوں نے اپنے پیاروں کو کھو دیا ہے۔

نیو یارک(پی پی آئی)اقوام متحدہ کے سیکرٹری جنرل انتونیو گوتریس نے پاکستان میں عید المیلاد النبیﷺ کے روز ہونے دہشتگرد حملوں کی مذمت کی ہے۔پی پی آئی کے مطابق  سماجی رابطے کی ویب سائٹ پر اپنے مذمت بیان میں اقوام متحدہ کے سیکرٹری جنرل نے کہا ہے کہ میں جمعہ کو پاکستان میں ہونے والے دہشت گردانہ حملوں کی مذمت کرتا ہوں۔انتونیو گوتریس نے مزید کہا ہے کہ دہشتگرد حملوں میں پرامن، مذہبی تقریبات کے دوران لوگوں کو نشانہ بنایا گیا جو کہ ایک گھناؤنا عمل ہے، حملوں کے ذمہ داروں کا محاسبہ ہونا چاہیے۔