کوئٹہ (پی پی آئی)کوئٹہ میں گائے اور بھینس کے دودھ کے علیحدہ نرخ مقرر کرنے کا فیصلہ کیا گیا ہے۔ دودھ کی قیمت اور معیار کے حوالے سے محکمہ لائیو اسٹاک،انڈسٹریز، ملک شاپ اور ڈیری فارم ایسوسی ایشن کا مشترکہ اجلاس منعقد کر کے ریٹ اور معیار کا تعین کیا جائے گا اور تمام اسٹاک ہولڈرز کے تحفظات کو دور کر کے قابل عمل ریٹ مقرر کیا جائے گانیز سرکاری ریٹ کے بر خلاف دودھ فروخت کرنے والے ڈیری فارمز اور ملک شاپس کے خلاف سخت قانونی کارروائی عمل میں لائی جائے گی۔پی پی آئی کے مطابق یہ بات کمشنر کوئٹہ ڈویژن حمزہ شفقات  نے آل کوئٹہ ملک شاپس ایسوسی ایشن کے صدر ولایت حسین کی سربراہی میں وفد نے سے ملاقات کے دوران کہیوفد نے کمشنر کوئٹہ کو مسائل سے آگاہ کیا۔ کمشنر کوئٹہ ڈویڑن نے کہا کہ شہر میں ملاوٹ شدہ دودھ کی فروخت پر کوئی سمجھوتہ نہیں کیا جائے گا کیمیکل شدہ دودھ فروخت کرنے والوں کو سرعام سزا دی جائے گی۔

کراچی (پی پی آئی)شہر قائدمیں  مرکزی شاہراہوں کی اسٹریٹ لائٹس مکمل طور پر بند ہونے کے باعث شہر سر شام اندھیروں میں ڈوب جاتا ہے جس سے لوگوں کو شدید پریشانی اور مشکلات کا سامنا ہے۔ پی پی آئی کے مطابق اہم سڑکوں پر گھپ اندھیرے کے باعث حادثات میں اضافہ ہو ا ہے نیز اندھیرے کے باعث اسٹریٹ کرائمز بھی بڑھے ہیں ہیں۔

نیویارک (پی پی آئی)وزیر اعظم انوار الحق کاکڑ 22 ستمبر کو اقوام متحدہ کی جنرل اسمبلی سے خطاب کریں گے، اپنے خطاب میں وہ مقبوضہ کشمیر میں جاری مظالم اور افغانستان سے درپیش سیکورٹی چیلنجز کا ذکر کریں گے اور اقوام متحدہ کو سلامتی کونسل کی قراردادو ں کی یاد دلائیں گے۔پی پی آئی کے مطابق وزیر اعظم اپنے خطاب میں موسمیاتی تبدیلیوں پر بات سمیت دنیا بھر کے حوالے سے پاکستان کا وژن پیش کریں گے۔