لاہور(پی پی آئی)لاہور ہائیکورٹ نے خدیجہ شاہ کی آئی جی پنجاب دیگر کے خلاف توہین عدالت کی درخواست پر ریمارکس دیتے ہوئے کہاہے کہ اگر آپ نے یہ بات طے کرلی ہے کہ خواتین کو باہر نہیں آنے دینا تو قانون راستہ بنائے گا۔پی پی آئی کے مطابق  لاہور ہائیکورٹ میں خدیجہ شاہ کی آئی جی پنجاب دیگر کے خلاف توہین عدالت کی درخواست پر سماعت ہوئی، جسٹس علی باقر نجفی نے خدیجہ شاہ کی درخواست پر سماعت کی،وکیل پنجاب حکومت نے کہاکہ ہمیں تفصیلی رپورٹ جمع کرانے کی مہلت دی جائے،تفتیشی افسر نے خدیجہ شاہ کو جسمانی ریمانڈ کیلئے عدالت پیش کردیا ہے،عدالتی احکامات کے بعد ہو سکتا ہے پولیس کو کچھ میٹریل ملا ہو تو انہوں نے نامزد کردیا۔عدالت نے کہاکہ مجھے معلوم ہے اس طرح کے کیس میں ریاست کیا کرتی ہے،تفتیشی افسر نے کہاکہ خدیجہ شاہ کے گھریلو ملازم کو گرفتار کیا،18اکتوبر کو گرفتار گھریلو ملازم نے بیان دیا ہے،یہ بیان  پہلے کیوں نہیں لیا گیا، جب ضمانت ہونی تھی اس وقت لیناتھا،اگر آپ نے یہ بات طے کرلی ہے کہ خواتین کو باہر نہیں آنے دینا تو قانون راستہ بنائے گا،عدالت نے سی سی پی او لاہور کو ذاتی حیثیت میں فوری طلب کرلیا،سی سی پی او آ کر عدالت کو بتائیں ایسا کیوں کیا گیا۔

 اسلام آباد (پی پی آئی)توشہ خانہ اور 190ملین پاونڈ کیس میں چیئرمین پی ٹی آئی عمران خان  کی ضمانت بحالی کی درخواستوں پر سماعت  25اکتوبر تک ملتوی کر دی گئی۔پی پی آئی کے مطابق  اسلام آباد ہائیکورٹ میں توشہ خانہ اور 190ملین پاونڈ کیس میں چیئرمین پی ٹی آئی کی ضمانت بحالی کی درخواستوں پر سماعت  ہوئی،چیف جسٹس عامر فاروق کی سربراہی میں 2رکنی بنچ نے سماعت کی،عدالت نے عدم پیروی پر چیئرمین پی ٹی آئی کی ضمانتیں خارج کردی تھیں۔چیف جسٹس نے استفسار کیا کہ سردار صاحب، درخواست گزار اس مقدمے میں گرفتار تو نہیں؟ڈپٹی پراسیکیوٹر نیب نے کہاکہ 10اگست 2023کو عدالت نے درخواست ضمانت خارج کی، مقررہ وقت میں احتساب عدالت کے فیصلے کو چیلنج نہیں کیا گیا،فیصلے کے خلاف 53دن بعد درخواست  دائر کی گئی،چیف جسٹس عامر فاروق نے کہاکہ کیس کل سماعت کیلئے رکھ لیتے ہیں اس نکتے کو دیکھ لیں،وکیل لطیف کھوسہ نے کہاہمارے لئے پابندی ہے، نوازشریف کیلئے 9سال بعد بھی پابندی نہیں،پراسیکیوٹر نیب مطفر عباسی نے کہاکہ اس کیس کو بدھ کے دن سماعت کیلئے رکھ لیں، عدالت نے کیس کی سماعت 25اکتوبر تک ملتوی کر دی۔

اسلام آباد (پی پی آئی) عمران خان اور بشریٰ بی بی کے خلاف غیر شرعی نکاح کیس کی سماعت کے دوران سول جج قدرت اللہ نے ریمارکس دیتے ہوئے کہا کہ خاور مانیکا کو بھی طلب کر لیتے ہیں،خاور مانیکا ہی عدالت کو بتائیں گے کہ طلاق کب دی تھی۔پی پی آئی کے مطابق ڈسٹرکٹ اینڈ سیشن کورٹ اسلام آباد میں چیئرمین پی ٹی آئی عمران خان اور بشریٰ بی بی کے خلاف غیر شرعی نکاح کیس کی سماعت ہوئی جس دوران سول جج قدرت اللہ کی عدالت میں  اسپیشل پراسیکیوٹر رضوان عباسی پیش ہوئے۔عدالت نے وکیل صفائی شیر افضل مروت کے آنے تک انتظار کرنے کی ہدایت کی، جج قدرت اللہ نے ریمارکس دیئے کہ شیر افضل مروت آجائیں، دونوں کے دلائل ایک ساتھ سن لیں گے۔پراسیکیورٹر رضوان عباسی نے کہا کہ عمران خان کو بھی عدالت طلب کیا جائے، اگر عدالت طلب نہیں کرنا تو اڈیالہ جیل میں ٹرائل  کیاجائے،سپرنٹنڈنٹ اڈیالہ جیل کو نوٹس کر دیں، میں بھی چیف کمشنر سے درخواست کروں گا۔جج قدرت اللہ نے ریمارکس دیئے کہ آپ درخواست دے دیں، خاور مانیکا کو بھی طلب کر لیتے ہیں،خاور مانیکا ہی عدالت کو بتائیں گے کہ طلاق کب دی تھی۔

کراچی (پی پی آئی)گزشتہ ہفتے 6 سال بعد 50 ہزار کی حد عبور کرنے کے بعد پاکستان اسٹاک ایکسچینج (پی ایس ایکس) کا بینچ مارک کے ایس ای-100 انڈیکس 51 ہزار پوائنٹس سے تجاوز کر گیا۔پاکستان ا سٹاک مارکیٹ میں کاروبار کے مثبت رجحان کے باعث  سرمایہ کاروں کو اربوں کا فائدہ   پہنچا ہے۔۔اپی ایس ایکس ویب سائٹ کے مطابق تقریباً 11بج کر 48 منٹ پر کے ایس ای-100 انڈیکس 651 پوائنٹس یا 1.28 فیصد اضافے کے بعد 51 ہزار 383 پوائنٹس پر پہنچ گیا، جوآخری کاروباری روز 50 ہزار 731 پوائنٹس پر بند ہوا تھا۔پی پی آئی کے مطابق بتایا جاتا ہے کہ سرمایہ کاروں کے لیے ’مارکیٹ کی قدر‘ زیادہ اہمیت رکھتی ہے، 2017 کے مقابلے میں اب بھی 70 فیصد کم ہے کہ 2017 کی اصل کارکردگی پر پہنچنے کے لیے انڈیکس کو ایک لاکھ پوائنٹس کی حد عبور کرنی چاہیے۔۔اسٹاک مارکیٹ میں سب سے زیادہ پیش رفت پاکستان پیڑولیم لمیٹڈ، آئل اینڈ گیس ڈیولپمنٹ کمپنی، سوئی ناردن گیس پائپ لائنز لمیٹڈ، ایئر لنک کمیونی کیشن لمیٹڈ، سوئی سدرن گیس پائپ لائنز لمیٹڈ، پاکستان ریفائنری لمیٹڈ، اور ورلڈ کال ٹیلی کام لمیٹڈ کے اسٹاک میں دیکھی گئی۔