سڈنی: سابق بھارتی بیٹسمین سچن ٹنڈولکر کو بگ بیش لیگ کھیلنے کی پیش کش کردی گئی ۔سڈنی تھنڈرز نے پرکشش معاوضے کے عوض جاری ٹورنامنٹ میں شرکت کے لئے لٹل ماسٹر سے رابطہ کیا ہے ۔ کرکٹ نیو ساﺅتھ ویلز کے حکام نے ریاستی حکومت سے بھی درخواست کی ہے کہ سچن ٹنڈولکر کے ساتھ معاہدہ کرانے میں مدد فراہم کرے ۔

سانتیاگو: ڈاکار ریلی کا نواں مرحلہ جیت کر پیٹرہانسل نے نینی روما کے لئے خطرے کی گھنٹی بجادی ،مجموعی برتری میں دونوں ڈرائیورز کے درمیان فرق برائے نام رہ گیا ہے ۔چلی میں ہونے والے 422کلومیٹر طویل مرحلے میں راستے بہت دشوار تھے لیکن ڈرائیورز نے شاندار مہارت کا مظاہرہ کیا ۔فرانس کے اسٹیفن پیٹر ہانسل نے مقررہ فاصلہ 4گھنٹے ، 17منٹ اور 53سیکنڈ میں طے کیا۔بائیک رائیڈنگ میں اسپین کے مارک کوما مجموعی طور پر سب سے آگے رہے جبکہ اسپین ہی کے یوان بریڈا نے دوسری پوزیشن حاصل کی ۔

شارجہ: دبئی ٹیسٹ میچ میں شکست کا بدلہ چکانے کے لیے قومی کرکٹ ٹیم کاشارجہ میں تیسرے ٹیسٹ کی تیاری کے لیے بھر پور پریکٹس سیشن جاری ہے۔ آخری ٹیسٹ میچ میں شکست کے بعد پاکستان کی رینکنگ مزید کم ہو سکتی ہے۔پاکستانی ٹیم شارجہ میں مختصر پریکٹس سیشن میں حصہ لیا۔ کھلاڑی کوچ ڈیو واٹمور کی زیر نگرانی بیٹنگ، بولنگ اور خاص کر فیلڈنگ میں موجود خامیوں کو دور کرنے کی کوشش کرتے رہے ۔ سری لنکا کے خلاف تیسرے ٹیسٹ میچ کے لیے قومی ٹیم کے کوچ ڈیو واٹمور نے پلئینگ الیون میں تبدیلیوں کا عندیہ دیا ہے۔ طویل عرصے سے اسکواڈ میں موجود اسپنر عبدالرحمان کو فائنل الیون میں شامل کیا جا سکتا ہے۔ واٹمور نے سیریز کا دوسرا ٹیسٹ میچ گنوانے کی وجہ ٹاس ہارنے کو قرار دیا۔ کوچ کے مطابق سعید اجمل کو احتیاط سے استعمال کرنے کی ضرورت ہے۔ سیریز کے آخری میچ میں گرین شرٹس کی ہار اسے عالمی رینکنگ میں پانچویں پوزیشن سے بھی محروم کر سکتی ہے۔ قومی ٹیم کو تنزلی کا سفر روکنے کے لیے سیریز کا آخری میچ جیتنا یا ڈرا کرنا ہو گا۔ ادھر دبئی ٹیسٹ کے فاتح آئی لینڈرز آخری میچ بھی جیتنے کے لیے پر عزم ہیں۔ پاکستان اور سری لنکا کی ٹیموں کے درمیان تین ٹیسٹ میچوں کی سیریز کا آخری میچ آج(جمعرات) شارجہ میں شروع ہو گا۔

میلبورن: آسٹریلوی شہر میلبورن میں سال کا پہلا ٹینس گرینڈ سلیم مقابلہ آسٹریلین اوپن جاری ہے تاہم اس میں حصہ لینے والے کھلاڑی سخت گرم موسم سے شدید پریشان ہیں۔ ٹورنامنٹ کے منتظمین کو 42 سنٹی گریڈ درجہ حرارت کے باوجود کھلاڑیوں کو کھیلنے پر مجبور کرنے پر تنقید کا سامنا بھی کرنا پڑا ہے۔ کینیڈا سے تعلق رکھنے والے کھلاڑی فرینک ڈینیوک کو اس وقت طبی امداد دینا پڑی جب وہ اپنے پہلے راونڈ کے میچ میں گرمی کی وجہ سے بیہوش ہوگئے۔ ان کا کہنا ہے کہ اس قسم کے موسم میں کھلاڑیوں کو کھیلنے دینا غیرانسانی ہے۔ برطانوی ٹینس کھلاڑی اینڈی مرے نے بھی کہا ہے کہ اس قسم کے واقعات ٹورنامنٹ کی ساکھ کے لیے نقصان دہ ہیں۔ ان کا کہنا تھا کہ اگر لوگ بیہوش ہوتے رہیں گے تو یہ کھیل کے لیے اچھا نہیں۔ انھوں نے کہا کہ زیادہ تر کھلاڑی اس قسم کے موسم کے لیے تیاری کرتے ہیں لیکن تین سے چار گھنٹے اسے برداشت کرنا مشکل ہے۔ ٹورنامنٹ میں اپنے اعزاز کا دفاع کرنے والی وکٹوریہ ایزارینکا نے گرم موسم میں کھیلنے کو ‘توے پر ناچنے’ کے مترادف قرار دیا۔ میلبورن پارک میں گرم موسم کی وجہ سے جہاں سابق عالمی نمبر ایک خاتون کھلاڑی کیرولین ووزنیاکی کی پانی کی بوتل کی شکل بگڑ گئی وہیں فرانسیسی کھلاڑی جو ولفرڈ سونگا کے جوتوں کا تلا نرم پڑ گیا۔ گرمی کی وجہ سے ہی کورٹ پر موجود گیند اٹھانے والے لڑکے اور لڑکیوں کی شفٹ بھی ایک گھنٹے سے کم کر کے 45 منٹ کر دی گئی۔ کینیڈین کھلاڑی فرینک ڈینیوک پہلے راونڈ میں فرانس کے پینوئے پیئر کے مدِمقابل تھے اور یہ میچ کورٹ نمبر چھ پر کھیلا گیا جس پر چھت موجود نہیں۔ وہ گرمی کی شدت کی وجہ سے اس میچ کے دوسرے ہی سیٹ میں بیہوش ہوگئے۔ طبی امداد لینے کے بعد 29 سالہ ڈینیوک کا کہنا تھا کہ جب تک کوئی مر نہیں جاتا، یہ لوگ اسی طرح سلسلہ جاری رکھیں گے اور اتنی دھوپ میں میچ کرواتے رہیں گے۔ ان کا کہنا تھا کہ یہ غیرانسانی ہے اور میرے خیال میں کسی کے لیے بھی مناسب نہیں۔ انھوں نے کہا کہ میں نے ساری زندگی پانچ سیٹ کے میچ کھیلے ہیں لیکن یہاں ڈیڑھ سیٹ کے بعد ہی گرمی کی وجہ سے بیہوش ہونا معمول کی بات نہیں۔

کنگسٹن: سابق ورلڈ چیمپئن جمیکن اسٹار ایتھلیٹ آصفا پاﺅل کا ڈوپ ٹیسٹ مثبت آگیا۔ وہ جمیکا میں اینٹی ڈوپنگ پینل کے سامنے پیش ہونگے۔ایک سو میٹر ریس کے سابق عالمی چیمپئن آصفا پاﺅل کو ڈوپ ٹیسٹ مثبت آنے پر جمیکن اینٹی ڈوپنگ کمیشن نے ایتھلیٹ کو کنگسٹن میں طلب کر لیا۔ آصفا پاﺅل کا ڈوپ ٹیسٹ گزشتہ سال جون میں نیشنل ایتھلیٹس کے ٹرائلز کے دوران لیا گیا تھا جس میں چار ایتھلیٹس اور بھی شامل تھے۔ ٹیسٹ رپورٹ میں جمیکن ایتھلیٹس کے ممنوعہ ادویات کے استعمال کرنے کی تصدیق ہوئی ہے۔ آصفا پاﺅل کے علاوہ ایتھلیٹ سمپسن نے بھی ڈوپ ٹیسٹ مثبت آنے پر تصدیق کی لیکن ساتھ ہی انہوں نے کہا کہ وہ ادویات انہیں ٹرینر کی جانب سے بطور سپلیمنٹ دیں گئیں تھیں۔