کولمبو: سری لنکا کے سابق مایہ ناز بلے باز رانا ٹنگا نے کہا ہے کہ پاکستان ٹیم میں دنیا کے خطرناک بولرز ہیں اور وہ کسی بھی وقت میچ کا پانسہ پلٹنے کی بھرپور صلاحیت رکھتے ہیں البتہ پاکستان کی بیٹنگ لائن غیر مستحکم ہے۔ بھارتی ٹیم کی بیٹنگ بہت مضبوط ہے لیکن بولنگ سائیڈ کمزور ہے۔ بھارت کو بھی اپنے ٹائٹل کا دفاع کرنے لئے سخت مشکلات کا سامنا کرنا پڑیگا۔ سری لنکا کرکٹ ٹیم کے سابق کپتان ارجنا رانا ٹنگا نے کہا کہ پاکستان ٹیم میں دنیا کے خطرناک بولرز ہیں اور وہ کسی بھی وقت میچ کا پانسہ پلٹنے کی بھرپور صلاحیت رکھتے ہیں البتہ پاکستان کی بیٹنگ لائن غیر مستحکم ہے۔ 2015 ورلڈ کپ کا ٹائٹل جیتنے کے لئے جدوجہد کرنی ہوگی۔ ایک انٹرویو میں انہوں نے کہا کہ بھارتی ٹیم کی بیٹنگ بہت مضبوط ہے۔ تاہم بھارت کی بولنگ سائیڈ کمزور ہے۔ میرے خیال میں بھارت کو بھی اپنے ٹائٹل کا دفاع کرنے لئے سخت مشکلات کا سامنا کرنا پڑیگا۔ 1996 ورلڈ کپ کے فاتح کپتان رانا ٹنگا نے کہا بھارتی بیٹسمینوں نے ون ڈے میچز میں خود کو منوا لیا لیکن بھارت کو چاہیے کہ وہ ٹیسٹ کرکٹ میں بھی خود کو بہتر ثابت کرے۔

جوہانسبرگ: پاکستانی کرکٹرز سعید اجمل ،سہیل تنویر اور شاہد آفریدی جنوبی افریقا میں ڈومیسٹک ٹی 20لیگ میں شرکت کریں گے ۔ سعید اجمل نے جنوبی افریقی ڈومیسٹک ٹیم ٹائٹنز کے ساتھ معاہدہ کرلیا ہے جبکہ سہیل تنویر کا لائنز اور شاہد آفریدی کا نائٹس کے معاہد متوقع ہے ۔ اس کے علاوہ مزید دو پاکستانی کرکٹر ز کا بھی ڈومیسٹک ٹیموں کے ساتھ معاہد ہ کا امکان ہے ۔

ممبئی: سابق بھارتی کرکٹر ونود کامبلی دل کے مرض میں مبتلا ہو گئے،حالت زیادہ خراب ہونے کی صورت میں ہسپتال داخل کروا دیا گیا۔بھارت کے سابق ٹیسٹ کرکٹر ونود کامبلی کو دل کا دورہ پڑنے کے بعد ممبئی کے لیلاوتی ہسپتال میں داخل کروایا گیا ہے،ونود کامبلی نے سترہ ٹیسٹ اور ایک سو چار ون ڈے میچوں میں بھارت کی نمائندگی کی۔41 سالہ سابق کرکٹر آج کل ٹی وی شوز میں دھواں دھار تبصرے اور تجزیے پیش کرتے رہتے ہیں۔

لاہور: انجری کا شکار قومی فاسٹ بولر محمد عرفان کی جگہ عمر گل کو سری لنکا کے خلاف متحدہ عرب امارات میں نمائندگی ملنے کا امکان روشن ہو گیا۔ عمر گل کو محمد عرفان پر تجربہ اور کارکردگی کے لحاظ سے واضح برتری حاصل ہے۔ محمد عرفان نے سری لنکا کے خلاف کوئی ون ڈے اور ٹی ٹوئنٹی نہیں کھیلا۔ یو اے ای کے صحرائی میدانوں میں محمد عرفان نے پانچ ایک روزہ میچ کھیلے237رنز کے عوض نو وکٹیں حاصل کیں۔ چھیالیس رنز دے کر تین وکٹیں ان کا بڑا کارنامہ ہے جبکہ انہیں گراونڈز پر محمد عرفان نے ایک ادھورے میچ سمیت دو ٹی ٹوئنٹی کھیلے اور کوئی وکٹ نہ گرا سکے۔ محمد عرفان کی جگہ تجربہ کار بولر عمر گل کو مل سکتی ہے۔ عمر گل نے سری لنکا کے خلاف22 ون ڈے کھیلے اور 28شکار کیے۔ متحدہ عرب امارات میں ان کے پاس26ون ڈے میچ کھیلنے کا تجربہ ہے جن میں عمر گل کی وکٹیں 35ہیں۔ ٹی ٹوئنٹی مقابلوں میں بھی عمر گل آگے ہیں۔ سری لنکا کے خلاف آٹھ نمائندگیاں اور تیرہ وکٹیں حاصل کر چکے ہیں۔ یواے ای میں عمر گل کو چودہ ٹی 20 کھیلنے کا موقع ملا جن میں انہوں نے اٹھارہ شکار کیے۔ آٹھ رنز کے عوض چار وکٹیں عمر گل کی بہترین کارکردگی ہے۔ پاکستان اور سری لنکا کے درمیان دو ٹی ٹوئنٹی اور پانچ ون ڈے میچوں کی سیریز11 دسمبر سے شروع ہو گی۔

ایمسٹرڈیم:  ٹور دی فرانس سائیکل ریس2015ءکے پلان کی رونمائی کر دی گئی،شرکاءسمیت ڈچ سائیکلسٹوں نے تقریب میں پہنچنے کے لیے سائیکلوں کا استعمال کیا۔ہالینڈ میں ٹور دی فرانس کے شروع ہونے کی وجہ سے خوشی کا سماں تھا۔ٹور دی فرانس کے جنرل ڈائریکٹر سمیت سابق اور موجودہ ڈچ رائیڈرز نے سائیکلوں پر بیٹھ کر خصوصی تقریب تک پہنچنے کا سفر مکمل کیا۔ ڈائریکٹر کرسٹیان رودھوم نے آئندہ سال ہونیوالی سائیکل ریس کے پلان کی رونمائی کی۔تقریب کے موقع پر ڈائریکٹر کا کہنا تھا کہ اگرچہ ہالینڈ سے شروع ہونیوالی ریس کا افتتاحی مرحلہ زیادہ طویل نہیں ہے لیکن دو سال بعد ایونٹ اور اس سے پہلے ٹرائلز کی واپسی پر انہیں خوشی ہے۔