نیویارک:امریکی فٹ بالر جوناتھن ڈائر کوبیوی پر تشدد کے الزام میں گرفتار کیا گیا۔جوناتھ ڈائر کو گھریلو تشدد کے الزام میں ریاست ایریزونا کے شہر فینکس سے گرفتار کیا گیا، پولیس کے مطابق جوناتھن پر 27 سالہ بیوی اور 18 ماہ کے بچے پر تشدد کا الزام ہے۔واقعہ جولائی کے آخر میں رپورٹ ہوا، جس کے بعد جوناتھن فرار ہوگیا تھا، اعتراف جرم کے بعد اسٹار فٹبالر کو جیل بھیج دیا گیا ہے۔

ڈھاکا:بنگلہ دیش کرکٹ بورڈ کی سلیکشن کمیٹی نے ایشین گیمز کے لیے15 رکنی قومی ٹیم کا اعلان کر دیا۔ مشرفی مرتضی کو ٹیم کا کپتان مقرر کیا گیا ہے۔ بنگلہ دیش کرکٹ ٹیم میں اسٹار آل راونڈر شکیب الحسن اور روبیل حسین کی واپسی ہوئی ہے، حال ہی میں غازی اور حسین کا باولنگ ایکشن مشکوک قرار دیا گیا تھا۔ شکیب الحسن کی ایشین گیمز کے لیے اعلان کردہ سکواڈ میں واپسی اہمیت کی حامل ہے، بی سی بی کی ڈسپلنری کمیٹی نے خراب رویے پر شکیب الحسن کو 6 ماہ کیلئے معطل کر دیا تھا لیکن بعد ازاں معافی مانگنے پر بی سی بی نے ان کی سزا میں کمی کر دی تھی جو 15 ستمبر کو اختتام پذیر ہو گئی ۔اعلان کردہ سکواڈ میں مشرفی مرتضی کپتان جبکہ دیگر کھلاڑیوں میں تمیم اقبال، انعام الحق، عمرالقیس، محمد متھن، شمس الرحمان، شکیب الحسن، شووا گتا ہوم، صابر رحمان، محموداللہ، ناصر حسین، عرافات سنی، مکتر علی، روبیل حسین اور تسکین احمد شامل ہیں۔

ممبئی:بھارتی کرکٹ اسٹارسچن ڈنڈولکر ویرات کوہلی کی مدد کرنے ممبئی پہنچ گئے ۔تجربہ کاربلے بازسچن ٹنڈولکر نے اس وقت ویرات کوہلی کی کوچنگ کرنے کا ارادہ کر لیا تھا جب دورہ انگلینڈ کے موقع پر ویرات کوہلی باہر سے آنے والی آف اسٹم گیند کو کھیلنے میں مسلسل ناکام ہوتے رہے۔انگلینڈ کرکٹ ٹیم کے فاسٹ بولر جیمز اینڈرسن ویرات کوہلی کی اس کمزوری کا فائدہ اٹھاتے رہے ،اس موقع پر پریکٹس سیشن میں موجود انڈین کرکٹ ٹیم کے منیجرلال چند نے کا کہنا تھا کہ تجربہ کار کھلاڑیوں کو اپنی مصروفیات میں سے وقت نکال کر نوجوان کھلاڑیوں کو اس جیسے معمولی نوعیت کے مسائل سے بچنے کے لیے وقت دینا چاہیئے اس سے نوجوان کھلاڑیوں کی بہتر کارکردگی میں خاطر خواہ اضافہ ہوگا۔

ڈبلن:آئر لینڈ کرکٹ ٹیم کے فاسٹ بولر میکس سورینسن اور بیٹسمین پال سٹر لنگ دورہ نیوزی لینڈ اورآسٹریلیا کے لیے منتخب کئے گئے اسکواڈ سے باہر ہوگئے۔میکس سورینسن کے دائیں ہاتھ میں فیکچر ہوا ہے جبکہ بیٹسمین پال سٹرنگ کمر درد میں مبتلا ہونے کی وجہ سے اسکواڈ میں اپنی جگہ برقرار رکھنے سے قاصر رہے ہیں۔آئر لینڈ کرکٹ ٹیم کے کوچ فل سمنز نے اسکواڈ سے باہر ہونے والے کھلاڑیوں پر افسوس کا اظہار کرتے ہوئے کہا ہے کہ ورلڈ کپ 2015کی تیاریوں کے لیے تجربہ کار کھلاڑیوں کا اسکواڈ سے باہر ہونا افسوس ناک ہے ۔واضح رہے آئر لینڈ اگلے منگل کو آسٹریلیا اور نیوزی لینڈ کے مقام پر طے شدہ آٹھ میچز کا آغاز کریں گے۔

لاہور:پاکستان کرکٹ بورڈ کے ڈومیسٹک آپریشن چیف انتخاب عالم نے کہا ہے کہ پی سی بی مشکوک بولنگ ایکشن جانچنے کے لیے آسٹریلین سوفٹ وئیر درآمد کرنے پر غور کررہا ہے۔آسٹریلین سوفٹ وئیر کے ذریعے بہ آسانی اس بات کا اندازہ لگایا جا سکے گا کہ بولر آئی سی سی کی جانب سے قابل قبول 15ڈگری تک کلائی موڑنے تک محدود ہے یا پھر وہ اس حد کو برقرار رکھنے سے قاصر ہے۔ان کا کہنا تھا کہ نیشنل کرکٹ اکیڈمی لاہور میں بائے مکینک لیب قائم کرنے کے ساتھ،22تیز ترین کیمریںاور اس سے متعلق تمام سوفٹ وئیر درآمد کرنے پر غور کررہے ہیں۔ان کا مزید کہنا تھا کہ مشکوک بولنگ دنیا بھر کا مسئلہ ہے،آئی سی سی نے غیر جانب دارانہ طور پر تحقیق کرتے ہوئے پاکستانی اسپن بولر سعید اجمل کو مشکوک بولنگ کے حامل قرار دیا تھا۔

ولنگٹن:نیوزی لینڈ کرکٹ ٹیم کے کپتان برینڈن میک کولم اپنے سابق ساتھی کھلاڑی کے خلاف میچ فکسنگ کے ثبوت عالت کو فراہم کرنے کے لیے پرعزم ہیں۔ برینڈن میک کولم کے وکیل گیرتھ گلاوے نے سابق کھلاڑی کا نام لیے بغیر کہا کہ ان کے خلاف ثبوت فراہم کردیے جائیں گے تاہم یقینی طور پر کہا جارہا ہے کہ وہ سابق کھلاڑی کرس کینز ہیں۔میک کولم کے حوالے سے حال ہی میں نیوزی لینڈ کے مقامی اخبار میں حقائق چھپی تھی تاہم انھیں روک دیا گیا تھا۔ میک کولم آئی سی سی کے اینٹی کرپشن یونٹ کے سامنے بھی پیش ہوئے تھے جس کی رپورٹ بھی میڈیا تک پہنچ گئی تھی۔جس کے بعد کرس کینز نے اعتراف کیا تھا کہ جس کھلاڑی کا نام نہیں دیا گیا ہے وہ خود ہیں لیکن انھوں نے فکسنگ کے الزامات کی سختی سے تردید کی تھی ۔میک کولم کے وکیل نے کہا کہ انھیں اخبار میں حقائق دینے سے روکنے کے باوجود وہ کھیل کی بہتری کے لیے ثبوت دینے کے لیے پرعزم ہیں۔انھوں نے کہا کہ میک کولم کرکٹ سے فکسنگ کے داغ کو دھونے کے لیے راست قدم اٹھانے کے لیے تیار ہیں۔