اسلام آباد (پی پی آئی)عالمی بینک نے سرکاری ملکیتی اداروں (ایس او ایز) کی نجکاری  کے پاکستانی طریقہ کار پر تحفظات کا اظہار کرتے ہوئے حکومت کو خبردار کیا ہے کہ حکومت سے حکومت کے معاہدوں کے تحت غیر ملکی سرمایہ کاروں کو قانونی چارہ جوئی کا سامنا کرنا پڑسکتا ہے اور اس کے بجائے عالمی بینک نے پارلیمنٹ کی خصوصی مشترکہ کمیٹی کی شفاف نگرانی کے تحت اسٹاک ایکسچینج کے ذریعے عوامی پیشکشوں اور اس کے بعد نجکاری کا مشورہ دیا ہے۔پی پی آئی کے مطابق عالمی بینک نے بتایا کہ اس کے علاوہ پاکستان اسٹیل ملز کی نجکاری اور ریکوڈک مائننگ کنٹریکٹ کیسز میں عدالتی فیصلوں نے پاکستان کے امیج کو ایک ناقابل اعتماد ملک کے طور پر بری طرح مجروح کیا، جہاں عالمی معاہدوں کا احترام نہیں کیا جاتا اور کاروبار کو ہمیشہ نقصان کا خطرہ رہتا ہے۔

 گلگت/   بلتستان/مظفر آباد/آزاد کشمیر(پی پی آئی)ملک کے بالائی علاقوں بشمول  گلگت،،بلتستان،،آزاد کشمیر  میں موسم نے انگڑائی لے لی ہے۔ گرج چمک کیساتھ بارشوں سے موسم میں خنکی پیدا ہو گئی، تاہم ملک کے بیشتر حصوں میں موسم خشک اور گرم رہا۔پی پی آئی کے مطابق محکمہ موسمیات نے کشمیر،گلگت بلتستان،بالائی خیبر پختونخوا اور بالائی پنجاب میں  مزیدبارشوں کی پیشگوئی  بھی کی ہے۔۔

لاہور(پی پی آئی) جناح ہاؤس حملے کے مقدمے میں گرفتار ملزمان کا جیل ٹرائل کرنے کا فیصلہ کر لیا گیا۔پنجاب حکومت نے ملزمان کا جیل ٹرائل کرنے کا نوٹیفکیشن جاری کردیا، ملزمان کا ٹرائل سنٹرل جیل لاہور میں ہو گا۔نوٹیفکیشن کے مطابق عسکری ٹاور پر حملے کے مقدمے کا ٹرائل بھی جیل میں ہو گا، تھانہ شادمان پر حملے اور جلاؤ گھیراؤ کے مقدمے میں گرفتار ملزمان کا ٹرائل بھی جیل میں ہو گا۔پی پی آئی کے مطابق پراسیکیوشن نے ملزمان کے خلاف چالان مکمل کر کے عدالت میں جمع کرا رکھے ہیں۔اس حوالے سے جناح ہاؤس حملہ کیس کے سپیشل پراسیکیوٹر فرہاد علی شاہ نے میڈیا سے گفتگو کرتے ہوئے کہا کہ جناح ہاؤس حملہ کیس میں گرفتار تمام ملزمان کا ٹرائل جیل میں ہو گا، انسداد دہشتگری کی خصوصی عدالت کے جج ارشد جاوید جیل میں جا کر ملزمان کا ٹرائل کریں گے، جناح ہاؤس حملہ کیس میں ملزمان کی تعداد بہت زیادہ ہے۔فرہاد علی شاہ کا کہنا تھا کہ اتنی بڑی تعداد میں ملزمان کو روز جیل سے عدالت لانا اور واپس لے جانا مشکل کام ہے، ہماری کوشش یہی ہے کہ مقدمے کا ٹرائل جلد از جلد مکمل کرائیں، اے ٹی سی کے رولز کے تحت جناح ہاؤس حملہ کیس کی سماعت روزانہ کی بنیاد پر ہوگی۔ان کا مزید کہنا تھا کہ چیئر مین پی ٹی آئی کی جناح ہاؤس حملہ کیس میں ضمانت عدم پیروی پر خارج ہوئی، اگر چیئرمین پی ٹی آئی اڈیالہ جیل میں ہوئے تو انہیں بذریعہ ویڈیو لنک جیل ٹرائل میں شامل کیا جائے گا۔