اسلام آباد(پی پی آئی)پاکستان ہائی ٹیک ہائبرڈ سیڈ ایسوسی ایشن کے چیئرمین شہزاد علی ملک نے کہا ہے کہ ابھرتے ہوئے عالمی چیلنجز نے یہ بات عیاں کر دی ہے کہ خوراک کی بڑھتی ہوئی ضروریات کو پورا کرنے اور موسمیاتی تبدیلی کے خطرات سے نمٹنے کیلئے زرعی شعبے کو متنوع بنانا وقت کی اہم ضرورت ہے۔ اتوار کو یہاں ترقی پسند کسانوں کے ایک وفد سے بات چیت کرتے ہوئے انہوں نے کہا کہ ہمارے اطراف کی دنیا تیزی سے تبدیل ہو رہی ہے۔موسمیاتی تبدیلی، آبادی میں اضافہ اور لوگوں کی بدلتی ہوئی ضروریات زراعت کے منظر نامے کو نئی شکل دے رہی ہیں۔ غیر متوقع موسمی اثرات اور قدرتی وسائل میں کمی کے باعث زرعی طریقوں میں جدت کو اپنانا ضروری ہو چکا ہے۔انہوں نے کہا کہ زرعی شعبے کو متنوع بناکر اور فصلوں کی مختلف اقسام کاشت کر کے ہم موسمیاتی تبدیلیوں اور کیڑے مکوڑوں سے لاحق خطرات کو کم کر سکتے ہیں۔مزید برآں اس سے زمین کی زرخیزی کو بڑھانے، کیمیائی کھادوں پر انحصار کو کم کرنے اور حیاتیاتی تنوع کو فروغ دینے میں مدد ملتی ہے۔ معاشی ترقی کی نئی راہیں کھلتی ہیں اور کسانوں کو مخصوص منڈیوں تک رسائی ملتی ہے اور ان کی آمدنی میں اضافہ ہوتا ہے۔ شہزاد علی ملک(ستارہ امتیاز)نے کہا کہ تحقیق و ترقی کے فروغ اور مناسب فصلوں کے بارے میں آگاہی کیلئے کسانوں، محققین اور پالیسی سازوں کے درمیان تعاون و ہم آہنگی بہت ضروری ہے۔ جدت اور تنوع کو فروغ دے کر ہم اپنے اور آنے والی نسلوں کے لیے ایک لچکدار اور پائیدار مستقبل کی بنیاد رکھ سکتے ہیں، فوڈ سکیورٹی کو یقینی بنا سکتے ہیں، قدرتی وسائل کو محفوظ رکھ سکتے ہیں اور دیہی آبادی کی ترقی و خوشحالی کی راہیں کھول سکتے ہیں۔

اسلام آباد(پی پی آئی) سابق وفاقی وزیر فواد چوہدری کو اسلام آباد کچہری میں پیش کردیا گیا جہاں عدالت نے ان کا 2 روزہ جسمانی ریمانڈ منظور کرلیا۔ میڈیا رپورٹس کے مطابق سابق وفاقی وزیر اطلاعات فواد چوہدری کو منہ پر کپڑا ڈال کر اسلام آباد کچہری پہنچایا گیا، انہیں بکتر بند گاڑی میں لایا گیا اور ان کے منہ کو کپڑے سے ڈھانپ کر عدالت میں پیش کیا گیا، فواد چوہدری کے کچہری پہنچنے سے پہلے ہی ان کے دونوں بھائی اور اہلیہ بھی وہاں موجود تھے۔بتایا جارہا ہے کہ پاکستان تحریک انصاف کے سابق رہنماء فواد چوہدری کو وفاقی دارالحکومت اسلام آباد سے گرفتار کیا گیا، جہاں سابق وفاقی وزیر کو پولیس اہلکار ان کے بھائی کی رہائش گاہ سے گرفتار کرکے اپنے ساتھ لے گئے، فواد چوہدری کے بھائی فیصل چوہدری نے سابق وفاقی وزیر کی گرفتاری کی تصدیق کی اور بتایا کہ میرے بھائی چوہدری فواد کو میرے اسلام آباد والے گھر سے ناشتہ کرتے ہوئے کچھ باوردی اہلکاروں نے سادہ کپڑوں میں ملبوس افراد کے ہمراہ اغوا کر لیا ہے، میرے بار بار اصرار کے باوجود انہوں نے کوئی وارنٹ گرفتاری یا حکم نہیں دکھایا، مجھے فواد چوہدری کی سلامتی سے متعلق شدید خدشات ہیں۔معلوم ہوا ہے کہ اسلام آباد کی عدالت نے سابق وفاقی وزیر فواد چوہدری کی دفعہ 144 کی خلاف وزری کے کیس میں 13 نومبر تک ضمانت قبل از گرفتاری منظور کی ہوئی تھی، ڈسٹرکٹ اینڈ سیشن کورٹ اسلام آباد میں فواد چوہدری کی دفعہ 144 کی خلاف وزری کیس میں ضمانت قبل از گرفتاری پر سماعت ہوئی، ایڈیشنل سیشن جج طاہر عباس سپرا کی عدالت میں فواد چوہدری اپنے وکیل کے ہمراہ پیش ہوئے، وکیلِ صفائی قمر عنایت نے فواد چوہدری کی درخواستِ ضمانت منظور کرنے کی استدعا کی، عدالت نے 13 نومبر تک فواد چوہدری کی ضمانت قبل از گرفتاری منظور کر لی، عدالت نے فواد چوہدری کی ضمانت 10 ہزار روپے کے ضمانتی مچلکوں کے عوض منظور کی، اسلام آباد کی عدالت نے آئندہ سماعت پر دلائل کے لیے پراسیکیوٹراور تفتیشی افسر کو ریکارڈ سمیت طلب کرلیا۔

کراچی (پی پی آئی)کوئٹہ کے سول اسپتال کے 5 ڈاکٹروں سمیت عملے کے 8 افراد کانگو  وائرس کا شکار ہو گئے جس میں سے ایک ڈاکٹر انتقال کرگیا۔ محکمہ صحت کے ترجمان کے مطابق 8 میں سے سات افراد کو تشویشناک حالت میں ائیر ایمبولینس کے ذریعے کراچی کے نجی اسپتال منتقل کیا گیا تھا جب کہ اب  ایک ڈاکٹر  شکراللہ انتقال کرگئے۔ترجمان کا بتانا ہے کہ ڈاکٹر شکراللہ تین روز قبل کانگو وائرس سے متاثر ہوئے تھے۔اس کے علاوہ کوئٹہ کے سول اسپتال، شیخ زید اسپتال اور فاطمہ جناح اسپتال میں آئیسولیشن وارڈ قائم کردیے گئے ہیں۔

لاہور (پی پی آئی)پاکستان مسلم لیگ ق نے آئندہ انتخابات کے لیے اپنا منشور جاری کردیا۔ تفصیلات کے مطابق پاکستان مسلم لیگ کے چیف آرگنائزر چوہدری محمد سرور، جنرل سیکرٹری پنجاب چوہدری شافع حسین اور سابق ایم این اے و صدر ویمن ونگ مسز فرح خان کی زیر صدارت اہم اجلاس مسلم لیگ ہاوس لاہور میں منعقد ہوا، جس میں خواتین کی تنظیم سازی اور ممبر شپ کیلئے اقدامات مذید تیز کرنے کا اعادہ کیا گیا اس موقع پر مختلف عہدوں کیلئے نوٹیفکیشن بھی جاری کئے گئے۔پاکستان مسلم لیگ نے 8 فروری کے انتخابات کیلئے اپنے منشور میں کہا ہے کہ پاکستان مسلم لیگ ملک کو کرپشن سے پاک کرنا چاہتی ہے، زراعت کی بہتری اور ترقی، صحت و تعلیم کی سہولیات تمام افراد کو برابری کی سطح پر ملیں، نئے ہسپتال اور نئے تعلیمی ادارے بنائے جائیں گے، ایک سال میں مکمل ہونے والے ڈیمز کی تعمیر شروع کی جائے گی اس کے علاوہ نوجوان نسل کو بہتر مستقبل دینے کیلئے بین الاقوامی سطح کے ٹیکنیکل ایجوکیشن سنٹر بنائے جائیں گے۔ادھر ڈپٹی ڈائریکٹر سوشل ویلفیئر چوہدری اظہر یوسف نے کہا ہے کہ سیاسی جماعتوں کے منشور میں ماحول دوست قابل تجدید توانائی کو شامل کیا جائے، معاشرے اورملک و قوم کی ترقی کے لئے ضروری ہے کہ مقامی مسائل کو عوامی فورم میں لایا جائے اورسیاسی وابستگی سے بالا تر ہو کرآپس میں مل بیٹھ کر مسائل کا حل تلاش کیا جائے اور اس کو ایوانوں میں پیش کیا جائے، حکومت وقت پالیسی بناتے وقت ان مسائل او ران کے حل کو سامنے رکھے۔بتایا گیا ہے کہ یہ بات انہوں نے گرو گرین نیٹ ورک اور سائیکوپ کے زیر اہتمام ایک عوامی فورم سے خطاب کرتے ہوئے کہی، عوامی فورم میں سیاسی جماعتوں کے منشور میں قابل تجدید توانائی (سولر انرجی) کو شامل کرنے کا مطالبہ کیا گیا، ڈپٹی ڈائریکٹر سوشل ویلفیئر چوہدری اظہر یوسف نے کہا کہ پاکستان کو موسمیاتی چیلنجز سے نمٹنے کے لیے ماحول دوست ترقی کا راستہ اختیار کرنا چاہیے، ماحولیاتی تبدیلی کے چیلنجوں سے نمٹنے کے لیے ترقی پذیر ممالک کے لیے معاوضہ اہم ہے، پاکستان کے لیے ان اہم مسائل سے نمٹنے کے لیے پائیدار توانائی کی طرف منتقلی ضروری ہے۔