کراچی (پی پی آئی)جماعت اسلامی کے تحت سندھ بھر میں ہفتہ یکجہتی فلسطین کی تقریبات جاری ہیں۔پی پی آئی کے مطابق جماعت اسلامی کے امیر سراج الحق کی اپیل پر ملک بھر میں 9تا15اکتوبر، ہفتہ یکجہتی فلسطین میں ہر سطح پر احتجاجی ریلیاں اور مظاہرے منعقدکئے جا رہے ہیں۔ فلسطین کے ساتھ اظہار یکجہتی کیلئے 13 اکتوبر جمعہ کو کراچی کی ہزاروں چھوٹی بڑی مساجد پر احتجاج کیاجائے گا۔
کراچی (پی پی آئی)مسلم لیگ ن سمیت دیگر سیاسی جماعتوں نے12اکتوبر کو یوم سیا ہ منا یا۔پی پی آئی کے مطابق12اکتوبر1999کو جنرل (ر)پرویز مشرف کی جانب سے منتخب وزیراعظم میاں نواز شریف کی حکومت کا تختہ الٹ کر اقتدار پر قبضہ کرنے کے واقعہ کے خلاف مسلم لیگ (ن) اوردیگر سیاسی جماعتوں نے یوم سیاہ منایا۔ اس حوالے سے سمیت ملک بھر میں تقریبات منعقد ہوئیں، پارٹی دفاتر پر سیاہ جھنڈے لہرائے گئے اورسیاسی کارکنوں نے بازوؤں پر سیاہ پٹیاں باندھ کر ریلیوں اور مظاہروں اور احتجاج میں شریک ہوئے۔
لندن (پی پی آئی) مقبوضہ کشمیر میں مودی حکومت کی زیادتیوں، انسانی حقوق کی خلاف ورزیوں،ہزاروں سیاسی کارکنوں کو جیلوں میں قید رکھنے، سکھوں، عیسائیوں اور مسلمانوں پر مظالم کے خلاف 15اکتوبر کو دن کے ایک بجے بھرپور پرامن احتجاجی مظاہرہ انڈین ہائی کمیشن کے سامنے کیا جائے گا،پی پی آئی کے مطابق مظاہرہ کے بعد انڈین ہائی کمیشن کو یادداشت بھی پیش کی جائے گی۔
کراچی (پی پی آئی)سینیٹ کی قائمہ کمیٹی برائے موسمیاتی تبدیلی نے کراچی میں ڈبلیو ڈبلیو ایف پاکستان کے ویٹ لینڈ سینٹر کا دورہ کیا، جہاں انہیں تمر کے جنگلات کے تحفظ سے متعلق بریفنگ دی گئی۔ ڈبلیو ڈبلیو ایف اور سندھ کے محکمہ جنگلات نے پاکستان میں تمر کے جنگلات میں نمایاں اضافہ کیا ہے۔تمر کے جنگلات قدرتی کاربن ڈوب کے طور پر کام کرتے ہیں اور سیلاب اور سمندری طوفان کے خلاف ساحلوں کے تحفظ میں دفاع کی پہلی لائن ہیں۔پی پی آئی کے مطابق ڈبلیو ڈبلیو ایف پاکستان کا مشن تمر کے جنگلات کے تحفظ، مقامی کمیونٹیز کو آمدنی کے متبادل ذرائع فراہمی، ماہی گیری کو تقویت، اور ایندھن کی لکڑی کے لیے مینگرووز پر انحصار کو کم کرنا ہے۔ محکمہ جنگلات سندھ کے نمائندوں میں ریاض واگن نے مینگروو پلانٹیشن اور کنزرویشن کی کوششوں پر حقائق اور اعداد و شمار اور تجزیہ پیش کیا۔۔ سینیٹر سیمی ایزدی، سینیٹر عابدہ عظیم، سینیٹر ڈاکٹر محمد ہمایوں مہمند، سینیٹر خالدہ اطیب، سینیٹر کیشو بائی، محترمہ وجیہہ ریاض اور آصف صاحبزادہ ڈی جی موسمیاتی تبدیلی، صدر ڈبلیو ڈبلیو ایف پاکستان ندیم خالد بھی گفتگو میں شریک تھے۔ بورڈ ممبر سارہ طاہر خان اور ڈبلیو ڈبلیو ایف پاکستان کے ڈائریکٹر جنرل حماد نقی خان نے میڈیا سے بات کرتے ہوئے، سینیٹ کی کمیٹی برائے موسمیاتی تبدیلی نے مینگرووز کے تحفظ کی کوششوں اور ایسے اقدامات کی حوصلہ افزائی کو سراہا۔
کراچی: ماجد علی نے ٹاپ سیڈ حمزہ اکبرکو اپ سیٹ شکست دے کر چھٹی قومی جونیئراسنوکرچیمپیئن شپ کے فائنل کے لیے کوالیفائی کرلیا، فائنل میں ماجد علی کاحارث ندیم سے مقابلہ ہوگا۔ کراچی میں کھیلے جانے والے سیمی فائنل میں ایشین رنر اپ ماجد علی نے قومی سینیئرچیمپئن حمزہ اکبر کو ایک کے مقابلے میں پانچ فریم سے آوٹ کلاس کیا۔ ماجد نے تیسرے فریم میں 101 کا بریک بھی کھیلا۔ ماجد کی جیت کا اسکور اٹھتر تیرہ، ستاسی چھ، ایک سو ایک صفر، چونسٹھ اکتیس، ترپن چھیاسٹھ اوربانوے ایک رہا۔ دو سر ے سیمی فائنل میں سندھ چیمپئن حارث ندیم نے پنجاب کے محمد فہیم کو پانچ تین فریم سے شکست دی۔ اس سے پہلے کھیلے گئے کوارٹرفائنل میں حمزہ اکبرنے محمد رفیق کو ہرایا۔ ماجد علی نے عامر طارق کوچار ایک سے مات دی۔ حارث ندیم نے عبدالر حیم کو چار صفر سے آوٹ کلاس کیا۔ محمد فہیم نے نعمان اقبال کے خلاف چار دو سے فریم سے کامیابی حاصل کی۔
بیروت: بیروت میں ہونے والے دوستانہ فٹبال میچ میں پاکستان کولبنان نے تین ایک سے شکست دے دی۔ میزبان ٹیم نے میچ کے آغاز سے ہی شاندار کھیل کا مظاہرہ کرتے ہوئے پہلے ہاف میں دو گول کر کے ٹیم کو برتری دلائی۔ پاکستان کی طرف سے کپتان کلیم اللہ نے گول کر کے خسارا دو ایک کر دیا۔ میزبان ٹیم نے دوسرے ہاف میں ایک اور گول کر کے تین ایک سے کامیابی حاصل کر لی۔
سوچی: سوچی اولمپکس میں ناروے نے ایک مرتبہ پھر جرمنی کو پیچھے دھکیلتے ہوئے میڈل ٹیبل پر پہلی پوزیشن حاصل کر لی۔سوچی میں جاری گیمز کے لے بابزایونٹ میں کینیڈین ایتھلیٹس کی پرفارمنس شاندار رہی۔کیلی اور موئسے نے تین منٹ 50 اعشاریہ چھ ایک وقت کے ساتھ گولڈ میڈل اپنے نام کیا۔بیتھلون مکسڈ ریلے میں مقابلہ انتہائی دلچسپ رہا۔ ایتھلیٹس نے شاندار اسکی انگ کا مظاہرہ کیا، پھر شوٹنگ میں اپنی مہارت دکھائی۔ناروے کے سووینڈسن سب سے تیز رہے۔انہوں نے ایک گھنٹے نو منٹ سترہ سیکنڈز میں گولڈ میڈل جیت لیا۔ویمنز کے5000 میٹر اسپیڈ اسکیٹنگ کے فائنل میں بھی مقابلہ زوروں کا ہوا، جس میں چیک ری پبلک کی سیبلی کووا نے میدان مار لیا۔سلور میڈل نیدر لینڈ کی اسکیٹر نے جیتا۔ مینز آئس ہاکی کے کوارٹر فائنل میں روس نے فن لینڈ کے خلاف برتری تو حاصل کی لیکن اسے برقرار نہ رکھ سکی، فن لینڈ نے یکے بعد دیگرے تین گول بنائے اور میچ تین ایک سے جیت کر سیمی فائنل کیلئے کوالیفائی کر لیا۔دوسرے کوارٹر فائنل میں امریکا نے چیک ری پبلک کو آﺅٹ کلاس کر دیا، امریکی ٹیم نے دو کے مقابلے میں پانچ گول سے کامیابی اپنے نام کی۔ایک اور میچ میں کینیڈا نے لیٹویا کو سنسنی خیز مقابلے کے بعدایک کے مقابلے میں دو گول سے ہر ادیا۔میڈلز ٹیبل پر اب ناروے 9 گولڈ کے ساتھ پہلے نمبر پر آ گیا ہے، جرمنی 8 طلائی تمغوں کے ساتھ دوسرے اور امریکا تیسرے نمبر پر ہے۔
کراچی: ایشیا پیسیفک اسپیشل اولمپکس میں نمایاں کارکردگی دکھانے والے پاکستانی ایتھلیٹس کے اعزاز میں امریکی قونصل خانے میں رنگا رنگ تقریب کا انعقاد کیا گیا ۔تقریب میں امریکی قونصلر جنرل مائیکل ڈاڈمین نے کامیاب ایتھلیٹس میں اسناد تقسیم کیں ۔تقریب میں خصوصی بچوں نے سندھ گیتوں پر ٹیبلوز پیش کیے جس نے امریکی قونصل خانے کے افسران کو بھی رقص پر مجبور کردیا ۔
پورٹ الزبتھ: جنوبی افریقی کرکٹ ٹیم کے آل راﺅنڈر ریان میکلیرن فٹنس مسائل کی وجہ سے آسٹریلیا کے خلاف دوسرے ٹیسٹ سے باہر ہوگئے ۔ سینچورین میں کھیلے گئے پہلے ٹیسٹ کے چوتھے روز میکلیرن کو بیٹنگ کے دوران مچل جونسن کا باﺅنسر لگا تھا ۔ میکلیرن نے اپنے ایک بیان میں کہا ہے کہ انہیں باﺅنسر لگنے سے سرمیں درد اور متلی کی شکایت ہے اور یہ تکلیف انہیں باﺅنسر لگنے کے 30گھنٹے بعد شروع ہوئی ۔ جنوبی افریقا کے ٹیم منیجر محمد موسیٰ جی کے مطابق میکلیرن کی حالت پہلے سے بہتر ہے لیکن کھلاڑی کو کسی بڑی انجری سے بچانے کے لئے دوسرے ٹیسٹ میں آرام کا موقع دیا جارہاہے ۔تین ٹیسٹ میچوں پر مشتمل سیریز کا دوسرا ٹیسٹ آج سے سینٹ جارج پارک ،پورٹ الزبتھ میں شروع ہوگا ۔ آسٹریلیا کو پروٹیز کے خلاف سیریز میں ایک صفر کی برتری حاصل ہے ۔
جوہانسبرگ: جنوبی افریقا ٹیم کے فاسٹ باﺅلر لونابوسو ٹسوبے کی فٹنس مسائل کے باعث آئی سی سی ٹی ٹوئنٹی ورلڈ کپ میں شرکت مشکوک ہوگئی ۔ جنوبی افریقی بورڈ کی سلیکشن کمیٹی نے اس بات کا اعتراف کیا ہے کہ سوٹسوبے کی میگا ایونٹ میں شرکت مشکل ہے اور انہیں فٹنس کی بحالی کے لئے مزید محنت اور وقت کی ضرورت ہے،تاہم ان کی شرکت کے بارے میں حتمی فیصلہ ابھی نہیں کیا گیا ہے ۔