ہرارے: زمبابوین کرکٹرز کی طرف سے ڈومیسٹک کرکٹ میں معاوضو ں کی وجہ سے جاری ہڑتال ختم ہونے کے امکانات پیدا ہوگئے ۔ کھلاڑیوں سے بورڈ کے حکام نے یقین دہانی کروائی ہے کہ وہ آئندہ 10روز میں تمام کھلاڑیوں کو واجبات کی ادائیگی کردیں گے جبکہ بنگلہ دیش میں شیڈول ٹی 20ورلڈ کپ کی تیاریوں کو مدنظر رکھتے ہوئے مارچ میں تربیتی کیمپ کا انعقاد کیا جائے گا ۔

لاہور: انٹرنیشنل اسپورٹس کمپنی کوکابُورا نے قومی ہاکی ٹیم کے کپتان محمد عمران کے ساتھ باضابطہ طور پر معاہدہ کرلیا ۔ معاہدے کے تحت کمپنی محمد عمران کو ہاکی کا مکمل سامان بالکل مفت فراہم کرے گی ۔ کوکابُوراکے پاکستان میںنمائندے خرم خواجہ نے قومی ہاکی ٹیم کے کپتان محمد عمران کے ساتھ معاہدے کی تفصیلات طے کیں ۔اس موقع پر خرم خواجہ کا کہنا تھا کہ ہاکی ہمارا قومی کھیل ہے اور مجھے خوشی ہے کہ کمپنی نے باضابطہ طور پر پاکستان میں اپنے کام کا آغاز کردیا ہے ۔ان کا کہنا تھا کہ محمد عمران کے علاوہ ہم نے گول کیپر عمران شاہ کے ساتھ بھی معاہدہ کرلیا ہے اور ہم مزید کھلاڑیوں کے ساتھ معاہدے کریں گے ۔

دبئی: پاکستان کرکٹ ٹیم کے سابق فاسٹ بولر عاقب جاوید نے قومی ٹیم کی کوچنگ میں عدم دلچسپی کا اظہار کردیا ۔ عاقب جاوید کا کہنا تھا کہ اگر انہیں ہیڈ کوچ کی ذمہ داریاں سنبھالنے کی پیشکش کی گئی تو وہ تب بھی غور نہیںکریں گے ۔ واضح رہے کہ عاقب جاوید یواے ای کو کوچ ہیں اور ان کی نگرانی میں خلیجی ٹیم نے ٹی 20اور ون ڈے ورلڈ کپ کے لئے کوالیفائی کیا ہے ۔ عاقب جاوید قومی ٹیم کی کوچنگ چھوڑنے کے بعد یواے ای کی ٹیم سے منسلک ہوئے تھے ۔

اسلام آباد: وزارت بین الصوبائی رابطہ نے چیئرمین پی سی بی ذکاءاشرف کی بحالی کیخلاف سپریم کورٹ میں دائر درخواست واپس لے لی۔ ذکاءاشرف کی بحالی سے متعلق اسلام آباد ہائیکورٹ کا فیصلہ برقرارہے۔ چیئرمین پی سی بی ذکا اشرف کی بحالی کیخلاف درخواست پر سماعت جسٹس ثاقب نثار کی سربراہی میں دو رکنی بینچ نے کی۔ جسٹس ثاقب نثار نے ریمارکس دیئے کہ اگر حکومت قانون کے مطابق کسی بھی عہدے دار کو ہٹانا چاہتی ہے تو ہٹا سکتی ہے۔ حکومت موجودہ قوانین میں ترامیم کا اختیار بھی استعمال کر سکتی ہے۔ انہوں نے کہا کہ قانون کے تحت وزارت کو اپنے اختیارات استعمال کرنے سے نہیں روکا جا سکتا۔ ذکاءاشرف کے وکیل عفنان کریم کنڈی نے کہا کہ دیکھنا یہ ہے کہ وزارت اپنے اختیارات کا غلط استعمال تو نہیں کر رہی۔ انہوں نے کہا کہ قوانین میں ترمیم کر کے پیٹرن کا رول ختم کر دیا گیا جبکہ آئی سی سی قوانین کے مطابق حکومت پاکستان کرکٹ بورڈ کے معاملات میں مداخلت نہیں کر سکتی۔ وزارت بین الصوبائی رابطہ کی وکیل عاصمہ جہانگیر نے کہا کہ ایس آر او جاری کیا گیا اور وہ نوٹس میں نہیں لایا گیا۔ وزارت بین الصوبائی رابطہ میں سب ڈرے ہوئے ہیں کہ کہیں وزارت سے کسی عدالتی حکم کی خلاف ورزی نہ ہو جائے۔ عاصمہ جہانگیر نے عدالت کو بتایا کہ ذکاءاشرف کو رواں برس ریٹائر ہونا تھا۔ گزشتہ سال قوانین میں ترمیم کے ذریعے چیئرمین پی سی بی کی مدت ملازمت چار سال کر دی گئی۔عاصمہ جہانگیر نے ذکاءاشرف کی بحالی کیخلاف درخواست واپس لے لی جس کے بعد کیس نمٹا دیا گیا۔