سوات: 21سال تک بند رہنے والے سوات کے کبل گالف کورس کو دوباہ کھول دیا گیا ۔ کبل میں آج (جمعرات )سے کلب کی تاریخ کے پہلے اوپن ٹورنامنٹ کا آغاز ہونے جا رہا ہے جس میں 27 سینئر پروفیشنل اور 54 پروفیشنل سمیت 200 گالفر شریک ہوں گے۔ اس موقع پر سوات کے ڈپٹی کمشنر امتیاز حسین نے بتایا کہ ٹورنامنٹ کیلیے تمام انتظامات مکمل ہیں۔ خیبر پختونخوا گالف ایسوسی ایشن کے سیکریٹری کرنل (ر) شہادت کے ہمراہ پریس کانفرنس کرتے ہوئے ڈپٹی کمشنر امتیاز حسین نے بتایا کہ 1964 میں سابق گورنر اور سوات کے ولی، میاں گل اورنگزیب کی جانب سے تعمیر کردہ گالف کلب نے 1992 تک متعدد ٹورنامنٹس کی میزبانی کی۔ انہوں نے بتایا کہ پچھلے کچھ سالوں سے علاقے میں شدت پسندی اور دیگر مسائل کے باعث یہاں قومی سطح کا کوئی بھی ایونٹ منعقد نہیں ہوسکا لیکن اب کلب کو فوج کی مدد سے بحال کر دیا گیا ہے۔ امتیاز نے بتایا کہ تین دن تک جاری رہنے والے اس ایونٹ سے وادی میں سیاحت کو فروغ دینے میں بھی مدد ملے گی۔ اس موقع پر کرنل شہادت نے بتایا کہ کبل میں ملک کا سب سے بڑا گالف کورس ہے۔ انہوں نے امید ظاہر کی کہ یہ گالف کورس ماضی کی طرح کھیل کی ترقی میں اپنا حصہ ڈالتا رہے گا۔

لاہور: پاکستان فٹبال فیڈریشن کے زیر اہتمام نویں خواتین فٹبال چیمپئن شپ کا فائنل راﺅنڈ 4دسمبر سے لاہور میں شروع ہوگا۔پنجاب اسٹیڈیم میں ہونے والی چیمپئن شپ میں ملک بھر سے 8ٹیمیں شرکت کریں گی ۔کوارٹر فائنل چار اور پانچ دسمبر کو کھیلے جائیں گے جبکہ سیمی فائنلز 7دسمبر اورفائنل 9دسمبر کو شیڈول ہے ۔ پاکستان فٹبال فیڈریشن کے ترجمان نوید حیدر خان کے مطابق ٹورنامنٹ کا مقصد گراس روٹ لیول پر خواتین کے اندر فٹبال کو فروغ دینا ہے ۔ان کا مزید کہنا تھا کہ ایونٹ کے انعقاد کی تمام تیاریاں مکمل کرلی گئی ہیں۔

لندن: برطانوی گالف چیمپئن رائے میکلرائے نے ایشز سیریز سے ذہنی دباﺅکے باعث آﺅٹ ہونے والے کرکٹر جوناتھن ٹروٹ سے ہمدردی کا اظہار کیاہے ۔ برطانوی گالفر کا کہنا تھا کہ کھیل کی موجودہ صورتحال کی اکثر کھلاڑی دباﺅ کا شکار ہوجاتے ہیں۔میکلرائے نے خود بھی گالف کے پورے سال میں انتہائی سخت حالات کا سمامنا کیاہے ۔ ان کا مزید کہنا تھاکہ کھیلوں میںپریشر کی وجہ سے اس طرح کی بیماریاں عام ہورہی ہے ۔

کانپور: بھارت نے ویسٹ انڈیز کو تیسرے ون ڈے میں شکست دیکر تین میچوں کی سیریز دو ایک سے جیت لی ۔ سیریز کے تیسرے اور فیصلہ کن میچ میں میزبان ٹیم نے ٹاس جیت کر فیلڈنگ کا فیصلہ کیا۔ مہمان ویسٹ انڈینز کا آغاز اچھا نہ رہا۔ سیموئلز 71 اور کیرون پاول 70 رنز کے ساتھ ٹوٹل کو 263 رنز تک پہنچانے میں کامیاب ہوئے۔ بھارت کی جانب سے روی چندران ایشون نے 2 وکٹیں حاصل کیں۔ جواب میں میزبان ٹیم نے مقررہ ہدف چھیالیس اعشاریہ ایک اوور میں پانچ وکٹوں کے نقصان پر حاصل کر لیا۔ شیکھر دھون نے ذمہ دارانہ بیٹنگ کرتے ہوئے 119 رنز کی شاندار اننگز کھیلی۔ یو وراج سنگھ نے 55 رنز اسکور کر سکے۔

لاہور: قومی ٹیم کے آل راونڈر عبدالرزاق کے ستارے گردش میں آ گئے۔ دبئی میں مختصر فارمیٹ میں آوٹ آف فارم کھلاڑی کو گھر آنے کے چند دن بعد بدقسمتی نے گھر میں چوری کا سامنا بھی کروا دیا۔ قومی آل راونڈر عبدالرزاق کی ٹی ٹوئنٹی ٹیم میں ایک سال کے بعد واپسی ہوئی بہت ساری امیدیں لے کر دبئی کے میدان میں اترے لیکن وہ پہلے میچ میں دس رنز سے زیادہ سکور نہ کر سکے۔ سیریز کے دوسرے میچ میں بھی قسمت نے ساتھ نہ دیا اور انہیں بغیر کھاتہ کھولے ہی پویلین لوٹنا پڑا۔ عبدالرزاق دبئی سے مایوس گھر پہنچے تو چند دن بعد ہی بدقسمتی نے انہیں دوبارہ آن لیا۔ لاہور کے پوش علاقے ڈیفنس میں عبد الرزاق کے گھر چور لاکھوں روپے کی مالیت کے زیورات اور کرنسی لے اڑے۔ قومی کرکٹر کے مطابق چور گھر میں واش روم کی کھڑکی سے داخل ہوئے اور لاکر اٹھا کر لے گئے۔ قومی کرکٹر عبدالرزاق کا کہنا ہے کہ لاکر میں پاسپورٹ، کاغذات اور لاکھوں مالیت کے زیوارت موجود تھے۔ صبح ہوتے ہی پولیس بھی موقع وردات پر پہنچی اور گھر کا جائزہ لیا۔ قومی کرکٹر عبدالرزاق کا کہنا ہے ڈیفنس جیسے علاقے میں چوری ہونا قابل افسوس بات ہے۔