اوہائیو: فیڈ کپ ورلڈ گروپ میں اٹلی کی ٹیم نے امریکہ کو تین ایک سے شکست دیکر سیمی فائنل میں جگہ بنا لی۔امریکی ریاست اوہائیومیں ہونیوالے ویمن ٹینس ٹورنامنٹ کے پہلے راونڈ میں سنگلز مقابلوں میں مہمان اطالوی ٹیم نے شاندار پرفارمنسسز دکھائیں۔اٹلی کی کیرن نیپ نے میزبان حریف الیسن رسکے کو دلچسپ مقابلے کے بعد شکست دی۔کیرن کی فتح کا سکور چھ تین اور سات پانچ رہا۔اس سے پہلے کھیلے گئے سنگلز میچز میں بھی مہمان اطالوی کھلاڑیوں نے جارحانہ کھیل پش کر کے دو صفر کی برتری حاصل کی تھی جس کے بعد اسے ڈبلز میچ میں میزبان ٹیم سے شکست کا سامنا بھی کرنا پڑا تھا۔سیمی فائنل میں اٹلی کا مقابلہ اپریل میں سپین یا جمہوریہ چیک کی ٹیموں سے ہو گا۔

سوچی: سوچی سرمائی اولمپکس میں ناروے سات تمغوں کے ساتھ سب سے آگے نکل گیا ۔ سوچی اولمپکس میں کانٹے کے مقابلے جاری ہیں، اسکئنگ اور شوٹنگ کے بائیتھلون مقابلوں میں ناروے کے کھلاڑی چھا گئے۔ بارہواں میڈل جیت کر سرمائی اولمپکس میں سب سے زیادہ میڈلز جیتنے کا ریکارڈ برابر کر دیا۔ فگر اسکیٹنگ میں روس کی نوعمر ایتھلیٹ جولیا نے سب کو آوٹ کلاس کر دیا۔ دس پوائنٹس حاصل کر کے روس کی پوزیشن مضبوط بنا دی۔ جوڑی کے مقابلوں میں بھی روس آگے رہا۔ کیسینا اور فیڈور نے اپنی ٹیم کیلئے پانچ پوائنٹس جوڑے۔ لوج مقابلوں میں گولڈ میڈل کی دوڑ میں جرمنی کے کھلاڑی سب سے سب سے آگے رہے۔ سوچی اولمپکس کے دوسرے دن پوائنٹس ٹیبل پر ناروے سات میڈلز کے ساتھ پہلے، کینیڈا اور ہالینڈ تین تین میڈلز کے ساتھ دوسرے اور امریکا دو میڈلز کے ساتھ تیسرے نمبر پر ہے۔

کولمبو: بگ تھری معاملے پر سری لنکن بورڈ اسٹیک ہولڈرز سے دوبارہ رابطہ کرے گا ۔سری لنکن بورڈ کے اعلامئے کے مطابق انہوں نے آئی سی سی اجلاس میں رائے شماری سے اس لئے علیحدگی اختیار کی تاکہ تجاویز کی منظوری کے لئے مطلوبہ مینڈیٹ فراہم نہ ہوسکے ۔اس حوالے سے کرکٹ سری لنکا اپنے اسٹیک ہولڈرز اور ایگزیکٹیو کمیٹی سے دوبارہ رابطہ کریگی اوراپریل میں ہونے والے گورننگ باڈی کے اجلاس میں سری لنکن بورڈ کے نمائندے تازہ مینڈیٹ کے ساتھ شریک ہوں گے ۔

پیرس: سوئٹزر لینڈ کے شہرہ آفاق ٹینس اسٹار راجر فیڈرر نے قازقستان کے خلاف ڈیوس کپ کوارٹر فائنل میں شرکت کی تصدیق کردی ۔ایونٹ رواں برس اپریل میں منعقد ہوگا ۔ راجر فیڈرر نے اپنے ایک بیان میں کہا ہے کہ اپنے ملک کی نمائندگی کرنامیرے لئے ایک اعزاز کی بات ہے اور قازقستان کے خلاف ڈیوس کپ کوارٹر فائنل میں وہ بھر پور انداز میں شرکت کریں گے ۔واضح رہے کہ راجر فیڈرر نے اسٹینلاس واورینکا کے ساتھ مل کر ڈیوس کپ ٹائی ورلڈ گروپ کے ابتدائی راﺅنڈ میں سربین ٹیم کو شکست دے کر اپنی ٹیم کو کوارٹر فائنل تک رسائی دلانے میں اہم کردار ادا کیا تھا ۔

جوہانسبرگ: آسٹریلوی آل راﺅنڈر شین واٹسن انجری کے باعث جنوبی افریقا کے خلاف پہلے ٹیسٹ میں شرکت سے محروم ہوگئے۔شین واٹسن پنڈلی کی انجری کا شکار ہوچکے ہیں جس کے سبب خدشہ ہے کہ وہ دورہ جنوبی افریقا سے باہر ہوجائیں گے ۔ اس سے قبل کینگروز کے آل راﺅنڈر جیمز فالکنز بھی ٹخنے کی انجری کی وجہ سے دورہ جنوبی افریقا سے باہر ہوچکے ہیں ۔

اسلام آباد: دورکنی قومی ٹینس ٹیم فیوچر ورلڈ ٹینس چیمپئن شپ میں شرکت کے بعد وطن وواپس پہنچ گئی ۔ اسلام آباد ٹینس ایسوسی ایشن کے حکام کے مطابق فیوچر ورلڈ ٹینس چیمپئن شپ میں شرکت کے لئے کھلاڑی احمد چوہدری اپنے کوچ کامران خلیل کے ہمراہ گزشتہ ماہ مصر گئے تھے اور وہ ایونٹ میں شرکت کے بعد وطن واپس پہنچ گئے ہیں ۔