کراچی (پی پی آئی)پاکستان میں ہر پانچ منٹ میں ایک شخص ٹریفک حادثے کا شکار ہو جاتا ہے، عالمی ادارہ صحت کے مطابق ملک خصوصا کراچی میں حادثات کے باعث سالانہ 28 ہزار سے زائد افراد ہلاک ہوتے ہیں۔روڈ سیفٹی کے حوالے سے پاکستان کا شمار بد ترین ممالک کی فہرست میں ہے،  اسی لئے مرحوم عبدالستار ایدھی نے اہم شاہراہوں پر حادثات کے شکار افراد کیلئے اسپتالوں کی تجویز پیش کی تھی  پی پی آئی کے مطابق سب سے زیاد ہ حادثات خیبر پختون خوا، اس کے بعد پنجاب اسلام آباد اور پھر سندھ میں ہوتے ہیں، مگر اندرون سندھ  حادثات کی بڑی وجہ سڑکوں کی خستہ حالی ہے یہی سبب ہے کہ ابتدائی طبی امداد نہ ملنے کی وجہ سے بھی زخمیوں کی بڑی تعداد لقمہ اجل بن جاتی ہے سندھ بھر میں 40 فی صد جان لیوا حادثات انڈس ہائی وے پر جامشورو سے سیہون راستے پر ہوتے ہیں،۔ٹریفک پولیس کے مطابق کراچی میں 65 فی صد حادثات ہیوی گاڑیوں کی وجہ سے ہوتے ہیں، جن کا سب سے زیادہ شکار موٹر سائکل سوار بنتے ہیں۔

کوئٹہ (پی پی آئی)پاکستان ریلوے نے سبی ہرنائی سیکشن کا تعمیراتی کام مکمل کرنے کی تصدیق کرتے ہوئے بتایا ہے کہ سبی ہرنائی سیکشن پر دوبارہ مسافرٹرین کاآغاز جمعرات 12اکتوبر سے کیاجارہاہے، پی پی آئی کے مطابق یہ ٹرین 17سال کی مسلسل بندش کے بعد چلائی جارہی ہے۔

اسلام آباد(پی پی آئی) نگران وزیراعظم انوار الحق کاکڑپیر16اکتوبرسے برادر ملک چین کا تین روزہ دورہ کریں گے۔ وہ چین کے صدر شی جن پنگ کی دعوت پر تیسرے بیلٹ اینڈ روڈ فورم فار انٹرنیشنل کوآپریشن (بی آر ایف) میں شرکت کریں گے۔پی پی آئی کے مطابق  بطور نگران وزیراعظم  اپنے پہلے دورہ چین میں وہ میزبان چینی صدر  شی جن پنگ سے دوطرفہ ملاقات کریں گے اور اس سال اگست میں عہدہ سنبھالنے کے بعد سے پی 5 ممالک کے کسی بھی اعلیٰ رہنما کے ساتھ یہ ان کی پہلی ون ٹو ون ملاقات ہوگی۔ وزیراعظم 18 اکتوبر تک بیجنگ میں قیام کریں گے۔ روس کے صدر ولادیمیر پوتن سمیت 90 ممالک نے بیلٹ اینڈ روڈ انیشی ایٹو فورم میں شرکت کی تصدیق کی ہے۔

کراچی(پی پی آئی)پاکستان سمیت دنیا بھر میں ڈاک کا عالمی د ن پیرکومنایا گیااس دن کے منائے جانے کا مقصد دنیا بھر میں ڈاک کے نظام کے متعلق آگاہی دینا ہے۔ اس دن کی مناسبت سے سیمینارز، کانفرنسز اور دیگر تقریبات کااہتمام کیاگیا جبکہ ملک بھر کے ڈاک خانوں میں عوام الناس کو ڈاک کے نظام اور یاد گاری ڈاک ٹکٹوں کی نمائش اور اس کے اجرا  کے متعلق معلومات فراہم کی گئیں۔پی پی آئی کے مطابق کراچی پوسٹل اسٹمپ سوسائٹی نے ڈاک کے قدیم و جدید ٹکٹس کی نمائش کا اہتمام کیا اور ممبران میں نایاب ڈاک ٹکٹ بطور تحفہ تقسیم کئے۔