ری کاؤنٹنگ کے طریقہ کار پر پر اعتراض ہے تو اور بھی فورمز ہیں وہاں چلے جائیں
پیپلزپارٹی اور جماعت اسلامی کو کراچی والوں نے مینڈیٹ دیا ہے:وزیر محنت سندھ
کراچی (پی پی آئی)پاکستان پیپلز پارٹی کے رہنما اور وزیر محنت سندھ سعید غنی کا کہنا ہیکہ کراچی کے جن حلقوں کے نتائج پر کسی کو اعتراض ہے تو قانون کے مطابق اسے آگے بڑھا سکتے ہیں، جن حلقوں میں دوبارہ گنتی کی درخواست کی گئی ہے ہم اعتراض نہیں کریں گے, ہماری ترجیح جماعت اسلامی سے بات کرنا ہے، حافظ نعیم تک جو معلومات پہنچائی جا رہی ہیں وہ غلط ہیں۔پی پی آئی کے مطابق سعید غنی کا کہنا تھاکہ ہمیں بھی کچھ حلقوں کے نتائج پر اعتراض ہے، میرا بھائی ایک حلقے سے ہارا ایک سے جیتا، پی ٹی آئی اور جماعت اسلامی ایسا کام نہ کریں جس سے شہر کے حالات خراب ہوں، جماعت اسلامی کو توقع سے زیادہ نشستیں ملیں،ہماری توقعات سے زیادہ نہیں ہیں، ہم نے 32 میں سے 25 جیتی ہیں، آپ نے 42 میں 39 سیٹیں جیتیں یہ حیرت کی بات ہے۔ سعید غنی نے مزید کہا کہ میں نے کارکنان کو کہا الیکشن میں ہار جیت ہوتی ہے،انتخابی عملے کو ہراساں کرنا یا دھمکیاں دینا اچھی بات نہیں ہے، میں نہیں سمجھتا تھا کہ حافظ نعیم صاحب دھمکیاں دے رہے ہیں، ری کاؤنٹنگ کے طریقہ کار پر پر اعتراض ہے تو اور بھی فورمز ہیں وہاں چلے جائیں، ہمارے ایک امیدوار کی ری کاؤنٹنگ میں جیتنے پر لڑائی جھگڑے کی کوشش کی گئی،جہاں جماعت اسلامی کی درخواستوں پر ری کاونٹنگ ہوئی ہم اس کا حصہ بنیں گے،ہمارے جیتے ہوئے امیدواروں نے دوبارہ گنتی کیلئے درخواستیں دی ہیں،ہم جماعت اسلامی سے ترجیحی بنیادوں پر بات کرنا چاہتے ہیں، میرے بھائی کی یوسی میں ہم نے ری کاؤنٹنگ کی درخواست نہیں دی، پیپلزپارٹی اور جماعت اسلامی کو کراچی والوں نے مینڈیٹ دیا ہے۔