شاہ محمود قریشی، اسد عمر،عظم سواتی نے گرفتاری دے دی ’تاحال گرفتاری کا حکم نہیں آیا:پولیس

لاہورپی پی آئی)لاہور میں جیل بھرو تحریک کے آغاز میں پہلے مرحلے میں پی ٹی آئی کے سینئر رہنما شاہ محمود قریشی، اسد عمر، اعظم سواتی، سینیٹر ولید اقبال، عمر سرفراز چیمہ اور زبیر نیازی نے گرفتاری دے دی، لاہور میں پاکستان تحریکِ انصاف کے رہنما جیل وین میں جا کر بیٹھ گئے ہیں اور گرفتاری دے دی ہے تاہم پولیس کا کہنا ہے کہ انھیں تاحال اس حوالے سے اعلیٰ افسران نے گرفتاری کا حکم نہیں دیا ہے۔ پنجاب پولیس نے موقف اپنایا ہے کہ پولیس کی جانب سے تاحال باضابطہ گرفتاری عمل میں نہیں لائی گئی، پی ٹی آئی کی قیادت ازخود قیدیوں کی وین میں سوار ہوئی اس کے علاوہ پی ٹی آئی کے کارکن بھی بڑی تعداد میں پولیس کی گاڑی کے اندر اور چھت پر خود سوار ہو گئے۔دوسری جانب پنجاب میں نگران حکومت نے جیل بھرو تحریک کے حوالے سے حکمت عملی طے کر لی ہے جس کے تحت صوبائی دارالحکومت میں سات دن کے لئے دفعہ 144 نافذ، اہم شاہراہوں پر احتجاج اور دھرنوں پر پابندی عائد کی گئی ہے۔علاوہ ازیں لاہور کی جیلوں میں گنجائش نہ ہونے کے باعث گرفتاری دینے والے کارکنوں کو میانوالی اور ڈیرہ غازی خان کی جیلوں میں منتقل کیا جائے گا اور ان کا کرمنل ریکارڈ بھی چیک کیا جائے گا۔واضح رہے کہ پی ٹی آئی کے چیئرمین اور سابق وزیراعظم عمران خان نے 17 فروری کو ویڈیو لنک کے ذریعے خطاب کے دوران 22 فروری کو لاہور سے جیل بھرو تحریک شروع کرنے کا اعلان کیا تھا۔