آئی بی اے کراچی کے تحت ورلڈ اسلامک فنانس فورم منعقد،عالمی رہنما اور ماہرین شریک

کراچی(پی پی آئی) انسٹیٹیوٹ آف بزنس ایڈمنسٹریشن (آئی بی اے) کراچی نے دو روزہ ورلڈ اسلامک فنانس فورم 2024  کی میزبانی کی، جسے آئی بی اے کے سینٹر فار ایکسیلنس ان اسلامک فنانس نے منظم کیا۔ یہ کانفرنس  مقامی ہوٹل میں منعقد ہوئی، جس کا مرکزی موضوع “اسلامی مالیات: جدت، ماحولیاتی مالیات اور پائیدار ترقی” تھا۔آئی بی اے کے اعلامیہ کے مطابق یہ کانفرنس پالیسی رہنما اصولوں اور علمی پیش رفتوں پر تبادلہ خیال کے لیے ایک پلیٹ فارم فراہم کرنے کے لیے منعقد کی گئی۔یہ کانفرنس ملکی اور بین الاقوامی اسلامی مالیاتی اداروں سے تعلق رکھنے والے ریگولیٹری حکام، محققین، پالیسی سازوں، مشہور ماہرین تعلیم، معروف اسلامی بینکاروں، شریعہ اسکالرز اور دیگر نمایاں شخصیات کو ایک جگہ جمع کرنے کا باعث بنی۔کانفرنس کی خاص بات مختلف اہم شخصیات کے خطابات تھے، جن میں مہمانِ خصوصی، پروفیسر احسن اقبال (وفاقی وزیر برائے منصوبہ بندی، ترقی، اور خصوصی اقدامات)، ڈاکٹر ایس اکبر زیدی (ایگزیکٹو ڈائریکٹر، آئی بی اے کراچی)، ڈاکٹر عشرت حسین (پروفیسر ایمریٹس اور چیئرمین، آئی بی اے-سی ای آئی ایف)، عاکف سعید (چیئرمین، ایس ای سی پی)، مسٹر سلیم اللہ (ڈپٹی گورنر، اسٹیٹ بینک آف پاکستان)، اور مسٹر احمد علی صدیقی (ڈائریکٹر، آئی بی اے-سی ای آئی ایف) شامل تھے۔ڈاکٹر زیدی نے اپنے افتتاحی کلمات میں ان اہم چیلنجز پر روشنی ڈالی جو پاکستان کے لیے اپنے معاشی نظام کو آئینی تقاضوں کے تحت اسلامی اصولوں کے مطابق ڈھالنے کی راہ میں درپیش ہیں۔مہمانِ خصوصی پروفیسر احسن اقبال نے معیاری تعلیم کے اہم کردار کو اجاگر کرتے ہوئے کہا کہ یہ مستقبل کے رہنماؤں کی تیاری میں مدد دیتی ہے، جو ملک اور دنیا کو ترقی اور خوشحالی کی طرف لے جا سکتے ہیں۔ وفاقی وزیر نے علم کی منتقلی کے ساتھ ساتھ جدت طرازی، تنقیدی سوچ، اور اخلاقی ذمہ داری کے فروغ میں تعلیم کی اہمیت پر زور دیا۔ڈاکٹر عشرت حسین نے پاکستان کے شہری مراکز اور چھوٹے شہروں کے درمیان غربت کی سطح میں نمایاں فرق پر روشنی ڈالی۔ انہوں نے وضاحت کی کہ تعلیم، بنیادی ڈھانچے، اور ٹیکنالوجی میں ہدفی جدت طرازی سے پسماندہ طبقات کو اوپر اٹھانے، اقتصادی شمولیت اور لچک پیدا کرنے میں مدد مل سکتی ہے۔