ملک بھرمیں سردی کی شدت برقرار،دْھندکا راج،موٹرویزبند

کراچی(پی پی آئی)ملک کے اکثرعلاقوں میں ہفتہ کوموسم سرد اورخشک رہنے کا امکان ہے،پنجاب، بالائی سندھ اور خیبر پختونخوا کے میدانی علاقوں میں شدید دْھند چھائی رہ سکتی ہے۔ محکمہ موسمیات کے مطابق خطہ پوٹھوہار، کشمیر اور خیبر پختونخوا کے چند میدانی علاقوں میں کہر اپڑنے کی بھی توقع ہے،پنجاب میں شدید دھند کے باعث موٹرویز مختلف مقامات سے بند کردی گئیں۔ محکمہ موسمیات  کے مطابق کوئٹہ سمیت بلوچستان کے بیشتر علاقوں میں آج موسم خشک اور شدید سرد رہے گا، کوئٹہ میں کم سے کم درجہ حرارت منفی 5، قلات میں منفی 4،ژوب اور زیارت میں منفی 4، سبی میں 4، تربت میں 7،نوکنڈی اور چمن میں منفی 2، گوادر میں 11 اور جیوانی میں 13 ڈگری سینٹی گریڈ ریکارڈکیاگیا۔ دوسری جانب کراچی میں سردی کے ڈیرے برقرارہیں اورہفتہ کوخنک موسم کے ساتھ وقفے وقفے سے تیز ہوائیں بھی چلیں گی، محکمہ موسمیات کے مطابق کراچی میں شمال مشرق کی سمت 11 کلومیٹر فی گھنٹہ کی رفتار سے ہوائیں چل رہی ہیں۔