ماحولیاتی نظام کے تحفظ اوراہمیت اجاگر کرنے کی اشدضرورت ہے، جنید نقی

کراچی 7 جنوری(پی پی آئی) کورنگی ایسوسی ایشن آف ٹریڈ اینڈ انڈسٹری (کاٹی) کے صدر جنید نقی نے کہا ہے کہ دنیا بھر اور خاص طور پر  ترقی یافتہ ممالک کومتبادل توانائی نظام سمیت زمینی درجہ حرارت کو کم کرنے والے ترقیاتی منصوبے بنانے ہوں گے۔ماحولیاتی تحفظ کی اہمیت کو اجاگر کرنے کے لئے آگاہی کی اشد ضرورت ہے، جس کے لئے انڈسٹری، میڈیا اور ملک بھر کے نوجوانوں کو اپنا بھرپور کردار ادا کرنا پڑے گا۔ان خیالات کا اظہار انہوں نے “بریتھ پاکستان” کے عنوان سے میٹنگ کے دوران خطاب میں کیا۔اس موقع پر کاٹی کے ڈپٹی پیٹرن ان چیف زبیر چھایا، سی ای او کائٹ لمیٹڈ زاہد سعید، قائمہ کمیٹی کے چیئرمین سلیم الزماں، سابق صدر مسعود نقی، زراق پراچہ،دانش خان، سینئر نائب صدر اعجاز شیخ، نائب صدر طارق حسین کے علاوہ کمشنر کراچی حسن نقوی، ڈپٹی کمشنر کورنگی مسعود بھٹو، نجی ٹی وی چینل کے سی ای او شکیل مسعود، ڈی ایچ اے صفا یونیورسٹی کے وائس چانسلرڈاکٹر احمد سعید منہاس، ڈاکٹر ہما بقائی، ایمبیسیڈر (ر) قاضی ایم خلیل اللہ، ذیشان منصور  اور دیگر بھی موجود تھے۔ جنید نقی نے مزید کہا کہ پاکستان کا ماحولیاتی آلودگی میں حصہ ایک فیصد سے بھی کم ہے لیکن اس کے باوجود پاکستان دنیا میں ماحولیاتی آلودگی سے متاثرہ ممالک میں سرفہرست ہے۔ کمشنر کراچی حسن نقوی نے کہا کہ لیاری ایکسپریس وے پر پلانٹ اور اربن فاریسٹ کیلئے جگہ مختص کی جارہی ہے تاکہ شہر کا کاربن فٹ پرنٹ کم کیا جاسکے۔ انہوں نے کہا کہ کراچی میں شجرکاری کیلئے نجی شعبے کے تعاون سے مہم چلائی جارہی ہیں۔ شکیل مسعود نے اپنے خطاب میں کہا کہ حکومتیں ایک حد تک منصوبوں کی نگرانی کر سکتی ہیں، ماحول کو بہتر بنانے میں نجی اداروں سمیت تمام شہریوں کو اپنی ذمہ داری ادا کرنی ہوگی۔۔ ڈپٹی پیٹرن ان چیف زبیر چھایا نے کہا ضروری ہیکہ تمام اداروں اور شہریوں کو ماحولیاتی، سماجی اور گورننس اقدامات کی آگاہی ہو تاکہ نہ صرف پاکستان کو ماحولیاتی آلودگی سے بچایا جاسکے بلکہ عالمی سطح پر اداروں کو ماحول دوست بنا کر کاروبار میں بھی اضافہ کیا جاسکے۔ تقریب سیکاٹی قائمہ کمیٹی کے چیئرمین سلیم الزماں، پروفیسر ڈاکٹر ہما بقائی و دیگر نے بھی خطاب کیا، جبکہ کائیٹ لمیٹڈ کے سی ای او زاہد سعید نے ملیر ایکسپریس وے پر اربن فاریسٹ پروجیکٹ کی بریفنگ دی۔