نئی دہلی: بھارتی بلے بازوں شیکھر دھون ،روہت شرما اور مرلی وجے نے اوپننگ بلے باز گوتم گھمبیر کے لئے ٹیم میں واپسی مشکل کردی ۔ نئے کھلاڑی مسلسل بہترین کارکردگی دکھارہے ہیں جس کے باعث گوتم گھمبیر کی ٹیم میں واپسی کے چانس کم ہوتے جارہے ہیں ۔ گوتم گھمبیر ٹیم میں دوبارہ جگہ بنانے کے لئے ڈومیسٹک کرکٹ میں سخت محنت کررہے ہیں ۔ان کا کہنا ہے کہ جس وقت انہوں نے محسوس کیا کہ اب وہ مزید انٹرنیشنل کرکٹ نہیں کھیل سکتے وہ اسی روز کرکٹ کو خیر باد کہہ دیں گے

لاہور: بھارت میں چھ دسمبر سے شیڈول کبڈی ورلڈ کپ کی تیاریوں کے لئے جاری قومی ٹیم کے ممکنہ کھلاڑیوں کے تربیتی کیمپ میں پریکٹس میچوں کا آغاز کردیا گیا ۔ پنجاب اسٹیڈیم میں جاری تربیتی کیمپ میں گزشتہ روز پریکٹس میچ کھیلا گیا ،جس میں کھلاڑیوں نے بھر پور زور آزمائی کا مظاہر ہ کیا ۔ کوچ غلام عباس نے کھلاڑیوں کو میچ کے دوران کی جانے والی غلطیوں سے آگاہ کیا اور انہیں دور کرنے کے لئے خصوصی پریکٹس کرائی ۔کبڈی ورلڈ کپ کے لئے قومی ٹیم کا اعلان 27نومبر کو کیا جائے گا ۔

لاہور: انجری کے شکار شعیب ملک اور عبدا لرزاق جوہانسبرگ سے وطن واپس پہنچ گئے، اسٹارآل راونڈرز کا کہنا ہے قومی کرکٹ ٹیم کا مورال بلند ہے۔ایک عرصے بعد ٹیم میں جگہ پانے والے اسٹار آل راونڈرز شعیب ملک اور عبدالرزاق ان فٹ ہونے کے باعث جنوبی افریقہ میں ٹی 20 سیریز سے باہر ہو گئے تھے۔ لاہورایئر پورٹ پہنچنے پر میڈیا سے گفتگو میں عبدالرزاق کا کہنا تھاکہ ٹیم کا مورال بلند ہے، کھلاڑی ہی ان فٹ ہوتے ہیں۔ شعیب ملک کا کہنا تھا کہ کھلاڑیوں کو لمبی اننگز کھیلنے میں مشکلات کا سامنا ہے۔ مگر لڑکے بھرپور محنت کر رہے ہیں۔ شعیب ملک نے کہا کہ ڈاکٹرز نے ٹانکے کھلنے تک آرام کا مشورہ دیا ہے، جب انہیں محسوس ہو گا کہ کارکردگی بہتر نہیں تو کرکٹ چھوڑ دیں گے۔

کراچی: کراچی میں جاری چوتھی رینکنگ اسنوکر چیمپئن شپ میں محمد آصف نے دوسری کامیابی حاصل کر لی۔رینکنگ اسنوکر چیمئن شپ کے دوسرے روز محمد آصف نے پنجاب کے محسن عظیم کو چار ایک سے شکست دی۔ دیگر میچوں میں محمد ماجد نے امجد اقبال کو چار دو سے ہرا کر اپ سیٹ کر دیا جبکہ بابر وسیم نے شاہد آفتاب کو چار ایک سے زیر کیا۔ محمد سجاد ، خرم اعظم اور محمد یوسف نے بھی اپنے میچز جیت لیے۔ چیمپئن شپ میں شریک تمام کھلاڑی محمد آصف کو انعامی رقم نہ ملنے پر بازووں پر سیاہ پٹیاں باندھ کر میچز میں شرکت کر رہے ہیں۔

پشاور: پاکستان کی قومی سائیکلنگ ٹیم 27 سال کے بعد ٹور دی شارجہ انٹرنیشنل سائیکل ریس میں شرکت کے لئے روانہ ہو گئی۔ کھلاڑیوں کے اعزاز میں پشاور میں ایک تقریب ہوئی۔ خیبر پختونخوا اولمپک ایسوسی ایشن نے بین الاقوامی سائیکل ریس میں حصہ لینے والی پاکستان سائیکلنگ فیڈریشن کی ٹیم کے اعزاز میں تقریب کا اہتمام کیا گیا۔ ریس کے لئے منتخب ہونے والے چھ سائیکلسٹس میں سے زاہد گلفام، محمد صابر اور نثار احمد کاسی پاکستان واپڈا، نعمت علی اور حبیب اللہ کا تعلق سوئی ناردرن گیس سے جبکہ غلام عباس کا تعلق پاکستان آرمی سے ہے۔ پاکستان نے ٹور ڈی شارجہ انٹرنیشنل سائیکل ریس میں پہلی مرتبہ 1986میں شرکت کی تھی۔ ٹیم کے ساتھ چار آفیشل بھی جائیں گے۔ 22 سے 25 نومبر تک ہونے والی شارجہ سائیکل ریس میں 20 ممالک کے سائیکلسٹ حصہ لے رہے ہیں۔

برسبین:  ایشز سیریز کے پہلے ٹیسٹ میچ کے پہلے روز آسٹریلیا نے آٹھ وکٹوں کے نقصان پر 273رنز بنا لئے، بریڈ ہیڈن78 رنز کے ساتھ کریز پر موجود ہیں۔ انگلینڈ اورآسٹریلیا کے درمیان پانچ میچوں پر مشتمل ایشز سیریز کا پہلا ٹیسٹ برسبین میں کھیلا جا رہا ہے۔ میچ کا ٹاس آسٹریلیا نے جیت کر پہلے بیٹنگ کرنے کا فیصلہ کیا۔ آسٹریلیا کی اننگز کا آغاز اچھا نہ رہا اور صرف12 رنز پر کرس راجرز ایک رن بنا کر اسٹورٹ براڈ کی گیند پر کیچ آوٹ ہو کر پویلین لوٹ گئے۔ اسٹورٹ براڈ نے تباہ کن بولنگ کراتے ہوئے آسٹریلین بلے بازوں کو کریز پر زیادہ دیر نہ ٹکنے دیا۔ ایک وقت پر آسٹریلیا کے132رنز پر چھ کھلاڑی آوٹ ہو چکے تھے کہ ٹیم کی باگ ڈور مچل جانسن اور بریڈ ہیڈن نے سنبھالی اور ذمہ دارانہ بیٹنگ کرتے ہوئے ٹیم کے مجموعے کو246 تک پہنچا دیا۔ دونوں بیٹسمینوں نے ساتویں وکٹ کی شراکت میں114 رنز جوڑے۔ بالآخر اسٹورٹ براڈ نے آسٹریلوی بلے بازوں کی پارٹنر شپ کو توڑا اور جوہنسن کو بولڈ کر دیا۔ جوہنسن نے 64رنز اسکور کئے۔ پہلے دن کے کھیل کے اختتام تک آسٹریلیا نے آٹھ وکٹوں کے نقصان پر273 رنز بنا لئے ہیں۔ بریڈ ہیڈن 78 اور ریان ہیرس چار رنز کے ساتھ کریز پر موجود ہیں۔ انگلینڈ کی جانب سے اسٹورٹ براڈ نے پانچ اور اینڈرسن نے دو کھلاڑیوں کو آوٹ کیا۔