بیونس آئرس: اسپین کے عالمی نمبر ایک ٹینس اسٹار رافیل نڈال ارجنٹائن پہنچ گئے، بیونس آئرس کے مئیر نے ان کا خصوصی استقبال کیا۔رافیل نڈال ان دنوں دورہ جنوبی امریکہ پر ہیں جس میں وہ ارجنٹائن پہنچے تو بیونس آئرس کے مئیر نے ان کا خصوصی استقبال کیا۔اس موقع پر میڈیا سے بات کرتے ہوئے ورلڈ چیمپئن کا کہنا تھا کہ وہ سیزن کے پہلے گرینڈ سلیم آسٹریلین اوپن کی تیاری کر رہے ہیں۔رافیل نڈال ارجنٹائن میں ڈیوڈ نیلبینڈین سے دوستانہ میچ کھیلیں گے جس کے بعد چلی میں ان کا سربین سٹار نوواک جوکووچ سے بھی فرینڈلی میچ شیڈول ہے۔

لاہور: پاکستان ون ڈے اور ٹیسٹ کرکٹ ٹیم کے کپتان مصباح الحق نے کہا ہے کہ کپتان بدلنے سے مسائل حل نہیں ہونگے۔ چار پانچ کھلاڑیوں کی عدم کارکردگی کے باعث ٹیم مشکلات کا شکار ہے، آرام کا مشورہ دینے کی باتیں محض قیاس آرائیاں ہیں۔ جنوبی افریقہ روانگی سے قبل لاہور ائرپورٹ پر میڈیا سے گفتگو کرتے ہوئے مصباح الحق کا کہنا تھا کہ قومی ٹیم کم بیک کی پوری صلاحیت رکھتی ہے اور ہمیں فاسٹ باﺅلر محمد عرفان کی کمی محسوس ہوگی۔ رنز نہ کرنے والے چار سے پانچ بیٹسمین شکست کا سبب بن رہے ہیں امید ہے جلد اپنی خامیوں پر قابو پا کر بیٹنگ لائن کلک کرے گی اور بہترین پرفارمنس پیش کرے گی۔ ایک سوال کے جواب میں انہوں نے کہا کہ شکست کی ذمہ داری کپتان پر نہیں ڈالی جاسکتی کرکٹ کے اصل مسائل حل کرنے چاہیے۔ کپتان بدلنے سے مسائل حل نہیں ہوتے انہوں نے کہا کہ آرام کا مشورہ دینے کی باتیں محض قیاس آرائیاں ہیں ان میں کوئی حقیقت نہیں تھیں۔

لاہور: پاکستان ہاکی فیڈریشن کے انتخابات آخری مراحل میں داخل ہو گئے ۔ لاہور ریجن کے انتخابات میں بابر اشرف صدر اور حسن اختر سیکرٹری منتخب ہو گئے۔ نیشنل ہاکی اسٹیڈیم میں ہونے والے انتخابات سے قبل لاہور ریجن کی خواتین اور مردوں کے ووٹر کلبز اور سکولز و کالجز کی ٹیموں کی سکروٹنی کی گئی۔ جس کے بعد انتخابات کا عمل مکمل کیا گیا۔بابر اشرف لاہور ریجن ہاکی ایسوسی ایشن کے متفقہ طور پر صدر اور حسن اختر سیکرٹری منتخب ہوئے۔ جبکہ خواجہ جنید، ارشد چوہدری اور خواجہ اویس پنجاب کے لئے نمائندے منتخب ہوئے۔ لاہور ریجن خواتین ہاکی ایسوی ایشن کے انتخابات میں پروین گل گروپ نے ثمن رشید گروپ کو شکست دی۔ شاہدہ خانم صدر اور روبینہ نسرین تینتس ووٹ حاصل کرکے سیکرٹری منتخب ہوئیں۔ پنجاب خواتین ہاکی ایسوسی ایشن کے انتخابات کل لاہور میں ہوں گے۔

لاہور: قومی کرکٹ ٹیم کے فاسٹ بولر محمد عرفان دبئی میں منعقدہ جنوبی افریقا کے خلاف کرکٹ سیریز میں شرکت کے بعد وطن واپس پہنچ گئے ۔ محمد عرفان ایمریٹس ایئر لائن کی پرواز 622کے ذریعے لاہور پہنچے ۔ محمد عرفان دبئی میں کھیلے جانے والے دوسرے ٹی 20میچ میں بولنگ کرواتے ہوئے انجری کا شکار ہوگئے تھے جس کی وجہ سے وہ دورئہ جنوبی افریقا سے باہر ہوگئے ہیں ۔

قاہرہ: آئندہ برس برازیل میںہونے والے فیفا ورلڈ کپ 2014کی ٹرافی مصر میں پہنچ گئی ۔ فٹ بال شائقین کی بڑی تعداد نے ٹرافی دیکھنے کے لئے اہرام مصر کا رخ کیا۔مصر میں اپنا سفر مکمل کرنے کے بعد ٹرافی تیونس روانہ ہوجائے گی ۔فیفا ورلڈکپ ٹرافی ٍ267دنوں میں دنیا کے مختلف ممالک کا سفر کرکے برازیل پہنچے گی ۔

کراچی: قومی کرکٹ ٹیم کے کپتان مصباح الحق رواں سال چار مرتبہ مین آف دی میچ قرار پائے ۔ سری لنکا کے تلکارتنے دلشان نے سب سے زیادہ پانچ مرتبہ میچ کے بہترین کھلاڑی ہونے کا اعزاز حاصل کیا جبکہ وہ دو مرتبہ میں آف دی سیریز بھی رہے ۔ بھارت کے ویرا ت کوہلی نے بھی چار مرتبہ مین آف دی میچ کا ایوارڈ حاصل کیا ۔مصباح الحق نے رواں برس سب سے زیادہ رنز بنانے کا اعزاز بھی حاصل کیا ہے ۔اس فہرست میں ویرات کوہلی تیسرت اور تلکارتنے پانچویں نمبر پر ہیں ۔