سڈنی: آسٹریلوی آل راﺅنڈر شین واٹسن نے کہا ہے کہ انگلینڈ کے خلاف پہلے ٹیسٹ میں شرکت کے لیے پر امید ہوں ۔ شین واٹسن بھارت کے خلا ف ایک روزہ سیریز میں شرکت کے بعد پیر کی صبح سڈنی پہنچ گئے ،سڈنی ائر پورٹ پر صحافیوں سے بات چیت کر تے ہوئے واٹسن نے کہا کہ میں اب کافی بہتر ہوں اور میری فٹنس باﺅلنگ کے لحاظ سے بہتر ہو رہی ہے ،انھوں نے کہاکہ یہ کوئی تشویش ناک انجری نہیں تھی بلکہ ایک بدقست جھٹکا تھا،اب ایک یا دو ہفتوں کے آرام سے میں تازہ دم ہو کر انگلینڈ کے خلا ف پہلے ٹیسٹ میں حصہ لو ں گا، یاد رہے ایشنر سیریز کا پہلا ٹیسٹ 21نومبر سے برسبین میں کھیلا جائے گا ،واٹسن نے کہا کہ میں نے کبھی یہ نہیں کہا کہ تشویش کی کوئی بات نہیں ہے لیکن میں پچھلے آٹھ نو ماہ سے ایسی صورت حال کا سامنا کرتا رہا ہوں اور میں ایسے صور ت حال سے باہر آنے کا راستہ جانتا ہوں اور یہی چیز مجھے یہاں بھی مدد دے گی،میں پر امید ہو ں کہ اگلے چند دنوں میں مکمل طور پر صحت یاب ہو کر ایشنر میںحصہ لوں گا۔ شین واٹسن بھارت کے خلاف ایک روزہ سیریز کے آخری میچ میں ہمسٹرنگ کا شکار ہو گئے تھے جہاں آسٹریلیاکو بھارت کے ہاتھوں شکست کا سامنا کرنا پڑا تھا ۔

بلغراد: سربیا کے دارلحکومت بلغراد میں فٹبال میچ آتش بازی کی نذر ہوگیا۔بلغراد میں ریڈ اسٹار اور پارٹیزن کی ٹیموں کے درمیان مقابلہ جاری تھا کہ دوسرے ہاف کے آغاز کے ساتھ ہی اچانک شائقین کی جانب سے آتش بازی شروع کی گئی،دونوں ٹیموں کے حامیوں کی جانب سے ایک دوسرے پر فلئیرز پھینکے گئے جبکہ شائقین نے ایتھلیٹک ٹریک پر آگ بھی لگادی جس سے ہنگامی صورت حال بگڑ گئی،حالات کو قابو کر نے کے لیے انتظامیہ کو پولیس بلانا پڑاجبکہ گراونڈ کے اندر موجود کھلاڑی اسٹیڈیم میں لگی آگ دیکھ کر پریشان ہوگئے،اس دوران میچ کو دس منٹ کے لئے روک دیا گیا،پولیس نے صورت حال کو قابو کر لیا اور میچ دوبارہ شروع کرایا گیا۔

پیرس: عالمی نمبر ایک ٹینس سٹار رافیل نڈال اور روجر فیڈرر کو پیرس ماسٹرز ٹینس ٹورنامنٹ میں شکست ہو گئی،سربین سٹار نوواک جوکووچ اور سپین کے ڈیوڈ فیریر فائنل کھیلیں گے۔پیرس میں جاری اے ٹی پی سنگلز ایونٹ کے سیمی فائنلز کھیلے گئے جن میں ورلڈ نمبر ون سپینش سٹار رافیل نڈال کو ڈیوڈ فیریر سے اپ سیٹ شکست ہوئی۔دفاعی چیمپئن ڈیوڈ فیریر نے شاندار کھیل کا مظاہرہ کرتے ہوئے ہم وطن حریف کو زیر کیا۔ڈیوڈ فیریر کی سٹریٹ سیٹس میں فتح کا سکور چھ تین اور سات پانچ رہا۔دوسری جانب رواں سال اے ٹی پی رینکنگ میں بدترین ساتویں پوزیشن پر موجود سوئس سٹار روجر فیڈرر،عالمی نمبر دو نوواک جوکووچ کے خلاف ٹینس کورٹ میں اترے۔دونوں کھلاڑیوں نے دو گھنٹے کے مقابلے میں جارحانہ سٹروکس کھیل کر میچ کو دلچسپ بنایا۔سربین سٹار نوواک جوکووچ نے پہلا سیٹ ہارنے کے بعد شاندار کم بیک کیا اور چار چھ ، چھ تین اور چھ دو سے فتح اپنے نام کی۔

ایمسٹرڈیم: ارجنٹائن فٹ بال لیگ میں نیوویلز اولڈ بوائز اور کولون کے درمیان میچ برابر ہو گیا، جبکہ ڈچ فٹ بال لیگ میں ویٹیسی کی ٹیم نے آئی ایکس کو سخت مقابلے کے بعد شکست دیدی۔ارجنٹائن فٹ بال لیگ میں نمبر ون ٹیم اولڈ بوائز اور کولون کے درمیان کھیلا گیا میچ سنسنی خیز مقابلے کے بعد دو دو گول سے برابر ہوا۔اولڈ بوائز ٹیم کے لیے دونوں گول فرانسیسی سٹار کھلاڑی ڈیوڈ نے سکور کیے۔اس شاندار پرفارمنس کے بعد ڈیوڈ نے کیرئیر میں گولز کی تعداد بھی تین سو ایک کر لی ہے جبکہ میچ ڈرا ہونے کی وجہ سے اولڈ بوائز کی ٹیم نے لیگ میں اٹھائیس پوائنٹس کے ساتھ اپنی ٹاپ پوزیشن مستحکم بنا لی۔دوسری جانب ڈچ فٹ بال لیگ میں ویٹیسی کی ٹیم نے آئی ایکس کو صفر کے مقابلے میں ایک گول سے شکست دی۔ایمسٹرڈیم میں کھیلے گئے میچ میں دونوں ٹیموں کے درمیان میچ بغیر کسی گول کے برابر تھا لیکن کھیل کے آخری منٹ میں ویٹیسی کے فارورڈ نے شاندار ِکک لگا کر گیند جال میں پھینکی اور گول سکور کر کے ٹیم کی فتح میں اہم کردار ادا کیا۔

دبئی: آئی سی سی نے تازہ ون ڈے رینکنگ جاری کر دی،پیپلز چوائس ایوارڈ کی فہرست سے محروم پاکستانی کھلاڑیوں نے باﺅلنگ اور آل راونڈ کیٹیگری میں ٹاپ پوزیشنز پر قبضہ جما لیا۔ انٹرنیشنل کرکٹ کونسل کی جانب سے جاری کردہ ون ڈے رینکنگ میں پاکستانی کھلاڑیوں کو جنوبی افریقہ کے خلاف پرفارمنس دکھانے کا صلہ مل گیا،پاکستان کے آف سپنر سعید اجمل دو درجے ترقی کر کے نمبر ایک بولر بن گئے۔بولنگ فہرست میں محمد حفیظ کی دسویں پوزیشن ہے لیکن آل راونڈرز کی فہرست میں پاکستانی محمد حفیظ نے ٹاپ پوزیشن پر قبضہ جما لیا۔بوم بوم شاہد آفریدی کا ساتواں نمبر ہے۔بیٹنگ سائیڈ میں بھارت کے ویرات کوہلی نے جنوبی افریقی بیٹسمین ہاشم آملہ سے پہلی پوزیشن چھین لی ہے۔اس سے پہلے پیپلز چوائس ایوارڈ کے لیے پانچ رکنی منتخب فہرست میں کسی بھی پاکستانی کھلاڑی کو شامل کرنے کی زحمت گوارا نہیں کی گئی تھی۔ایوارڈ کے لیے شارٹ لسٹڈ کھلاڑیوں میں بھارت کے مہندرا سنگھ دھونی، ویرات کوہلی ، آسٹریلیا کے مائیکل کلارک ، انگلینڈ کے الیسٹر کک اور جنوبی افریقہ کے اے بی ڈویلیئرز کو نامزد کیا گیا ہے۔