اسلام آباد (پی پی آئی) سابق وزیر اعلی پنجاب چوہدری پرویزالٰہی سے ان کے اہلخانہ نے  اڈیالہ جیل میں ملاقات کی۔اہلخانہ کی جانب سے چوہدری پرویز الہی سے خیریت دریافت کی گئی۔پی پی آئی کے مطابق چوہدری پرویز الہٰی سے اہلخانہ کی ملاقات عدالتی حکم پر کروائی گئی۔

 اسلام آباد (پی پی آئی)ترجمان تحریک انصاف کا کہنا ہے کہ نگران حکومت اداروں کی کارکردگی بہتر بنا کر نقصانات کو کم کرنے کی کوشش کرے۔ پی پی آئی کے مطابق ترجمان تحریک انصاف رؤف حسن نے نگران حکومت کی جانب سے قومی اداروں کی نجکاری پر ردِعمل دیتے ہوئے کہا ہے کہ نجکاری کا اختیار صرف عوام کی منتخب حکومت کے پاس ہے۔ نگران حکومت کے پاس ایسا کرنے کا اختیار موجود نہیں،نجکاری پر توجہ مرکوز کرنا نگران حکومت کے ارادوں میں شکوک و شبہات کو جنم دیتا ہے۔انکا کہنا تھا کہ عبوری حکومت کی مدت مختصر اور بنیادی اختیار انتخابات کا انعقاد ہے،عبوری حکومت کو چاہیے کہ وہ انتخابی عمل تیز کرے اور 90 روز میں انتخابات کا انعقاد یقینی بنائے۔ رؤف حسن نے کہا کہ نگران حکومت اداروں کی کارکردگی بہتر بنا کر نقصانات کو کم کرنے کی کوشش کرے۔اگر نجکاری کی گئی تو اس طرح سرگرمیوں کو قانون چارہ جوئی کا سامنا بھی کرنا پڑے گا،نجکاری کمیشن حصص کی اسٹریٹجک فروخت کے ذریعے عمل کو آگے بڑھائے

لاہور(پی پی آئی)انسداد دہشتگردی عدالت لاہور نے ن لیگ کی رہنما مریم اورنگزیب اور جاوید لطیف کو اشتعال انگیز تقاریر کرنے کے کیس میں 30 ستمبر کو طلب کر لیا۔پی پی آئی کے مطابق مریم اورنگزیب اور میاں جاوید لطیف کیخلاف کیس کی سماعت انسداد دہشتگردی عدالت کی جج عبہر گل خان نے کی۔عدالت نے پولیس کی جانب سے مقدمہ سے دہشتگردی کی دفعات ختم کرنے پر اعتراض لگایا تھا، ملزمہ مریم اورنگزیب اور جاوید لطیف پر تھانہ گرین ٹاؤن میں مقدمہ درج ہے۔

پاکپتن/لاہور(پی پی آئی) استحکام پاکستان پارٹی کے پیٹرن انچیف جہانگیر خان ترین نے کہا ہے کہ عوام کی خدمت کرنا میرا شوق ہے، عوامی خدمت کا موقع ضائع نہیں کریں گے۔سیلاب متاثرین میں امدادی سامان تقسیم کرنے کے اجتماع سے خطاب کرتے ہوئے پیٹرن انچیف استحکام پاکستان پارٹی جہانگیر ترین نے کہا کہ عوام کی خدمت کرنا میرا شوق ہے، یہ بات میر ے دل سے نکلتی ہے، اللہ نے ہمیں بہت نوازا ہے۔انہوں نے کہا کہ ہمارا فرض ہے کہ مستحق لوگوں کی خدمت کریں، ہمارا فرض ہے کہ عوام کے حالات ٹھیک کریں، ہماری پرانی پارٹی میں کچھ ایسے لوگ آگئے کہ ہم عوام کی خدمت نہیں کرسکے، اب دوسری بار ہمیں موقع ملا ہے، اسے ضائع نہیں کریں گے۔جہانگیر ترین نے کہا کہ عوام کا یہ حق ہے کہ حکومت وقت ان کے مسائل حل کرے، ہم پاکستان کو طاقتور بنانے کیلئے کام کر رہے ہیں، جب عوام کے حالات ٹھیک ہوں تو ملک مضبوط ہو گا، اللہ نے موقع دیا تو ہم مل کر ایسا کام کریں گے کہ عوام کے مسائل حل ہوں۔ان کا کہنا تھا کہ 75 سال گزر گئے، ایسا نہیں ہونا چاہیے تھا کہ عوام صحت اور بنیادی سہولتوں سے محروم رہتے، اگر عوام کو یہ سہولتیں نہیں ملیں تو اس کے ذمہ دار وہ لوگ ہیں جو اقتدار میں رہے، دعا کریں کہ ہم دنیا میں جا کر ان کے مسائل کے حل کیلئے اپنا حصہ ڈالیں، ہماری پارٹی کو صرف عوام کا خیال ہے۔