نئی دہلی: جرمنی کے شہرہ آفاق مڈفیلڈر توبیاس ہاک نے فیڈریشن آف انٹرنیشنل ہاکی پلیئر آف دی ائیر 2013کا ایوارڈ جیت لیا ۔ اس سے قبل 2012میں بھی جرمنی کے ہی ایک کھلاڑی مورٹز فریسٹ نے یہ اعزاز حاصل کیا تھا ۔ ایف آئی ایچ کی طرف سے جاری کردہ بیان کردہ بیان کے مطابق سالانہ ایوارڈ ز کی تقریب بھارت کے شہر نئی دہلی میں منعقد ہوئی ،جس میں سال کے دوران غیر معمولی کارکردگی دکھانے والے کھلاڑیوں کو ایوارڈ ز سے نوازا گیا ۔

ابو ظہبی: انٹرنیشنل پریمیئر ٹینس لیگ (آئی پی ٹی ایل ) نے پہلی پانچ ٹیموں کے ناموں کا اعلان کردیا ۔کھلاڑیوں کی ڈرافٹ کی تقریب 2مارچ کو متحدہ عرب امارات میںمنعقد ہوگی ۔ آئی پی ٹی ایل کے کوفاﺅنڈ ر مہیش بھوپاتی کے مطابق لیگ کے میچوں کیلئے شہروں میں ممبئی سمیت بنکاک ،سنگاپور اور کوالالمپور شامل ہیں جبکہ ایک اور سٹی کا انتخاب مڈل ایسٹ سے کیا جائے گا ۔

موہالی: بھارتی کرکٹر اور پنجاب ٹیم کے کپتان ہربھجن سنگھ پر ضابطہ اخلاق کی خلاف ورزی کرنے پر میچ فیس کا جرمانہ عائد کردیا گیا ۔ بھارت کے ڈومیسٹک ٹورنامنٹ رانجی ٹرافی میں کرناٹکا کے خلاف سیمی فائنل میچ کے دوران ہربھجن سنگھ نے حریف ٹیم کے بلے بازوں کے خلاف ضرورت سے زیادہ جارحانہ انداز میں اپیل کی جس پر میچ ریفری سنجے پٹیل نے ان پر میچ فیس کا 25فیصد جرمانہ عائد کردیا ہے۔

کراچی: پاکستان کے طاہر جمیل خانزادہ رواں برس شیڈول کامن ویلتھ گیمز میں اسکواش ایونٹ میں ریفری کے فرائض انجام دیں گے ۔ میگا ایونٹ 23جولائی سے 3اگست تک اسکاٹ لینڈ میں کھیلا جائے گا ۔ ورلڈ اسکواش فیڈریشن نے طاہر جمیل کو ایونٹ کے لئے ریفری نامزد کیا ہے ۔ طاہر جمیل سندھ اسکواش ایسوسی ایشن کے صدر ہیں اور 2004سے ریفری کے فرائض سرانجام دے رہے ہیں ۔خانزادہ اس سے قبل بھی کئی انٹرنیشنل ایونٹس میں ریفری کی ذمہ داریاں سرانجام دے چکے ہیں ۔

کراچی: پاکستان ائیر فورس کے زیر اہتمام پاکستان گالف فیڈریشن کی اجازت سے ہونے والی 33ویں چیف آف ائیر اسٹاف اوپن گالف چیمپئن شپ کا 30جنوری سے کراچی میں آغاز ہوگا ۔ گالف چیمپئن شپ میں ملک بھر کے 350ٹاپ گالفرز حصہ لیں گے ۔

نئی دہلی: ہاکی انڈیا لیگ کے لئے اڑھائی کروڑ کی خطیر انعامی رقم کا اعلان کردیا گیا ۔ہاکی لیگ کا آغاز 25جنوری سے ہوگا ۔ فاتح ٹیم کو ایک کروڑ 25لاکھ جبکہ رنر اپ کو 75لاکھ روپے ملیں گے ۔ ایونٹ کے بہترین کھلاڑی کو 25لاکھ روپے انعام دیا جائے گا ۔ لیگ میں چھ ٹیمیں حصہ لیں گی جن میں عالمی کھلاڑی شامل ہیں تاہم پاکستانی کھلاڑیوں کو نظر انداز کردیا گیا ہے ۔ لیگ کے میچ لکھنو،ممبئی ،نئی دہلی ،موہالی ،رانچی اور بھوبھنیشور میں کھیلے جائیں گے ۔