ساﺅتھ افریکا: ساﺅتھ افریکا کے سلیکٹرانڈریوسن نے کہا ہے کہ جیک کیلس جولائی میںکھیلے جانے والے سری لنکا کے خلاف ون ڈے انٹرنیشنل ٹیم کا حصہ ہوں گے ۔ان کا کہنا تھا کہ جیک کیلس نے پچھلے برس ٹیسٹ کرکٹ سے ریٹائیرمنٹ لی تھی تاہم 2015کے ورلڈ کپ تک اپنی ٹیم کے لیے ون ڈے انٹرنیشنل کھلیں گے ،کیلس فروری 2012اور نومبر2013میں ٹیم سے دور رہے پر پاکستان اور بھارت کے خلاف ہوم سریز کے لیے ٹیم کا حصہ ہوں گے ،

کراچی: تین ملکی اسنوکرٹورنامنٹ آئندہ ماہ کراچی میں منعقدہوگا۔ پاکستان ، ایران اور تھائی لینڈ کی ٹیمیں ٹورنامنٹ میں حصہ لینے کراچی آئیں گی۔ پاکستان بلیئرڈ اینڈ اسنوکر فیڈریشن کے صدرعالم گیرشیخ کا کہنا ہے کہ تین ملکی ٹورنامنٹ کے انتظامات کی تیاریاں شروع کردی گئی ہیں۔ انھوں نے بتایا کہ ایران نے ایونٹ میں حصہ لینے پر رضا مندی ظاہر کی ہے جبکہ تھائی لینڈ کو بھی شرکت کے لیے مدعو کیا گیا ہے۔ عالم گیر شیخ نے بتایا کہ آئندہ سال ایشیئن اسنوکر چیمپیئن شپ ملائشیا میں کرائی جائے گی۔ اس بات کا فیصلہ ایشیئن بلیئرڈ اینڈ اسنوکر کنفیڈریشن کے اجلاس میں کیا گیا جس میں ایشیا کے 32 ممالک کے ارکان نے شرکت کی جس میں عالم گیر شیخ کو کنفیڈریشن کانائب صدر بھی منتخب کیا گیا۔

انقرہ: ٹور آف ترکی سائیکلنگ کا182کلومیٹر پر مشتمل چھٹا مرحلہ برطانوی سائیکلسٹ ایڈم یاٹس نے جیت لیا۔ اس جیت کے ساتھ ہی انھوں نے ریس میں مجموعی برتری بھی حاصل کرلی۔182کلومیٹر ریس کے چھٹے مرحلے میں گرین ایج ٹیم کے اکیس سالہ برطانوی سائیکلسٹ ایڈم یاٹس نے مقررہ فاصلہ4 گھنٹے، 11 منٹ اور46سیکنڈ میں طے کرکے پہلی پوزیشن حاصل کرلی،دو سیکنڈ کے فرق سے اٹلی کے ڈیوڈے فورمولو دوسرے نمبر پر آگئے، اٹلی ہی کے ڈیوڈے ربیلین نے تیسری پوزیشن حاصل کی۔ روئن تارامے سات سیکنڈ کے فرق سے چوتھی اور کروشیا کے کرائسجن ڈیورسیک پانچویں نمبر پر آگئے۔ایڈم یاٹس نے تارامے پرمحض ایک سیکنڈ کی برتری سے ریس کے اختتام سے دو روز قبل مجموعی برتری بھی حاصل کرلی۔ ایڈم یاٹسچوبیس گھنٹے،46منٹ اور57 سیکنڈ ٹائم کے ساتھ مجموعی برتری میں پہلے نمبر، روئن تارامے ایک اعشاریہ صفر تین سیکنڈ کے فرق سے دوسرے نمبر، فرانس کے رومین ہارڈی 39سیکنڈکے فرق سے تیسرے نمبر موجود ہیں۔

میڈرڈ: اسپین موٹوجی پی پری سیزن کی چوتھی پری گراںریس میں مقامی رائیڈڑ الیکس اسپارگیرو نے تیز ترین رائیڈر کا ریکارڑ توڑدیا۔دوہزارچودہ موٹوجی پی سیزن کی پہلی تینوں ریسیں اکیس سالہ ہنڈا رائیڈر اور دفاعی چیمپئن مارک مرکوئز نے جیتی ہیں۔ مارک مرکوئزاسپینش گراں پری کے ساتھ کیریئر گراں پری کی سنچری مکمل کرلیں گے۔گراں پری ریس میں ان کے ہم وطن رائیڈراسپارگیروایک منٹ 39 اعشاریہ3 پانچ سات سیکنڈکے فرق سے تیز ترین ثابت ہوئے۔ مارک مرکوئز اعشاریہ دوسیکنڈ کے فرق سے دوسرے نمبر پر رہے،ڈکوٹی رائیڈر اٹلی کے ایندریا ڈوویزیسو تیسرے نمبر اور چوتھی پوزیشن سات مرتبہ کے چیمپئن اٹلی کے ویلنٹینو روسو نے حاصل کی۔

اسلام آباد: ایشین گیمزکی تیاریوں کے لئے پاکستان ہاکی ٹیم کا تربیتی کیمپ آج سے (اتوار)سے نصیر بندہ ہاکی اسٹیڈیم اسلام آباد میں شروع ہوگا۔ایک ماہ پر مشتمل تربیتی کیمپ کے لئے منتخب کھلاڑی دوپہر تک چیف کوچ شہنازشیخ کو رپورٹ کریں گے۔ رات کو کھلاڑیوں اور ٹیم انتظامیہ کا ن اجلاس ہوگا،جس کے بعد خصوصی عشائیہ دیا جائے گا۔ کیمپ کا باقاعدہ آغاز پیر سے دو سیشنز میں ہوگا۔ پہلے روز کھلاڑیوں کے فٹنس ٹیسٹ لئے جائیں گے، ٹیم انتظامیہ نے کیمپ میں پلیئرز کا ہر ہفتے فٹنس ٹیسٹ کرانے کا فیصلہ کیا ہے۔ کھلاڑیوں کی فٹنس کے علاوہ مسنگ کی خامی پرقابوپانے کی کوشش کی جائے گی۔پاکستان ہاکی فیڈریشن نے ملک بھر میں اوپن ٹرائلز کے بعد ایشین گیمز کے لئے37کھلاڑیوں کو منتخب کیا ہے۔ ان میں گول کیپرز عمران شاہ، عمران بٹ، مظہر عباس، عدنان شکور اور محمد اقبال، محمد عمران، محمد خالد، عباس علی، عبدالستار، زاہد اللہ اور اسد عزیز، ہاف بیک رضوان جونیئر، محمد توثیق، راشد محمود، فرید احمد، تصورعباس، عثمان حنیف، محمد شعیب اور ایم بلال اور فارورڈز ولیدحمید ، حماد، علی حسین، شفقت رسول، حسیم خان، علی شان، عمر بھٹہ، رضوان سینئر، محمد دلبر، اسفند سینئر، لیاقت رسول، شاہ جی، اصفر، شہباز احمد، شکیل عباسی، ذیشان اکرم، ارسلان قادر، خرم شہزاد شامل ہیں۔

لاہور: پاکستان اوپن ٹینس چیمپیئن شپ میں عقیل خان نے مینز اور سارہ منصور نے ویمنز ٹائٹل جیت لئے۔ باغ جناح لاہور میںکھیلی جانے والی پانچ روزہ چیمپیئن شپ کے مینز سنگل کے فائنل میں عقیل خان نے اپنے چھوٹے بھائی یاسر خان کو 6-1اور7-5 سے شکست دی جبکہ ویمنزفائنل میں سارہ منصور نے ردا خالد کو7-6اور6-2سے زیر کیا۔انڈر18 میں سید نوفل کلیم،انڈر14میں برکت اللہ اور انڈر12میں صہیب خان فاتح رہے۔ منتظمین نے شدید گرمی کے باوجود چیمپیئن شپ میں کھلاڑیوں کی شرکت کو سراہا اورامید ظاہر کی کہ ایسے ایونٹس کے انعقاد سے ہی نوجوان کھلاڑی سامنے آئیں گے۔ اختتامی تقریب میں فاتح اور رنرز اپ کھلاڑیوں میں انعامات تقسیم کیے گئے