سڈنی: آسٹریلوی کرکٹ ٹیم کے بولنگ کوچ کریگ میک ڈرموٹ کے معاہدے میں دو سال کی توسیع کردی گئی ۔49سالہ میک ڈرموٹ ایشز سیریز سے قبل آسٹریلوی ٹیسٹ ٹیم کے بولنگ کوچ مقرر کیے گئے تھے جس کے بعد آسٹریلیا نے ایشز سیریز میں 5-0سے اورورلڈ نمبر ون جنوبی افریقہ کو اسی کے ملک میں 2-1سے شکست دی تھی۔ اپنی نئی ذمہ داریوں میں مک ڈرموٹ ٹیسٹ ٹیم کے ساتھ ون ڈے ٹیم کے بولرز کی بھی کوچنگ کریں گے۔مک ڈرموٹ کا کہنا ہے کہ وہ بولرز کے ساتھ اچھا کمبینشن بنانے کی کوشش کریں گے اوربھارت کے خلاف ہوم سیریزاور ورلڈ کپ میںبولرز کو تعاون فراہم کریں گے۔آسٹریلوی کرکٹ ٹیم کی تعریف کرتے ہوئے ان کا کہنا تھا کہ اس وقت ٹیم ایک گروپ کی حیثیت میں کام کررہی ہے ،ہیڈ کوچ ڈیرن لیمن،بیٹنگ کوچ مائیکل ڈی وینوتو اور کپتان مائیکل کلارک اپنی ذمہ داریاں بخوبی نبھا رہے ہیں۔

اسلام آباد: دنیا پولیو وائرس کے خاتمے کے قریب پہنچ گئی ہے، لیکن پاکستان میں صورت حال تشویشناک ہوتی جارہی ہے۔ رواں سال اس وائرس میں سات سو فیصد اضافہ ہوا ہےاور 2014میں59بچے عمر بھر کے لئے معذور ہوچکے ہیں۔ پولیو وائرس کا خاتمہ دنیا بھر کی اولین ترجیح بن چکا ہے، لیکن پاکستان کا شمار دنیا کے ان تین ملکوں میں ہوتا ہے جہاں پولیو وائرس مستقبل کے معماروں کو اپاہج بنارہا ہے۔ اقوام متحدہ کے عالمی ادارہ صحت کے مطابق نائیجیریا اور افغانستان کے بعد پولیو کیسزسب سے زیادہ پاکستان میں رپورٹ ہورہے ہیں۔ رواں سال ان کی تعداد میں سات سو فیصد اضافہ ہوا ہے اوراب تک59 کیس رپورٹ ہوچکے ہیں۔ محکمہ صحت کے مطابق فاٹا میں45 ،پشاور میں4، بنوںمیں 6 اور کراچی میں 4 کیسز سامنے ائے ہیں۔ملک میں امن و امان کی خراب صورت حال اور رضا کاروں پر حملوں کو اس موذی وائرس کے پھیلا و کی وجہ قرار دیا جارہا ہے۔

ریوڈی جنیرو: برازیل کے شہر ساﺅ پالو میں شہریوں نے فٹبال ورلڈ کپ کے لیے بنائے گئے اسٹیڈیم کے نزدیک کچی آبادی قا ئم کردی ۔ سیکڑوں بے گھر افراد نے ساﺅ پالو اسٹیڈیم کے اطراف ڈیرے ڈال دیئے اور رہائش اختیار کرلی ۔ لینڈ لیس ورکرز مومنٹ کے تحت ہونے والے انو کھے احتجاج کا مقصد حکام کی توجہ حا صل کر نا ہے ۔ لوگو ں کا کہنا ہے کہ حکومت بے زمین لوگوں کو رہائشی سہولیات دے تو قبضہ ختم کردیا جائے گا۔ اس کارروائی سے ساﺅ پالو میں میچر کا انعقاد خطرے میں پڑ سکتا ہے۔