لاہور(پی پی آ ئی)پنجاب حکومت نے مقررہ ڈیڈ لائن کے بعد غیر قانونی مقیم تارکین وطن کے خلاف بلا امتیاز کریک ڈاؤن کا اعلان کر دیا۔نگران وزیراعلیٰ پنجاب محسن نقوی کی زیر صدارت اہم اجلاس ہوا جس میں پنجاب میں یکم نومبر سے غیر قانونی مقیم غیرملکیوں کے خلاف کارروائی کے حوالے سے اقدامات کا جائزہ لیا گیا۔پنجاب حکومت نے غیر قانونی مقیم غیر ملکیوں کو 31 اکتوبر تک پنجاب چھوڑنے کا حکم دے دیا۔تمام متعلقہ اداروں اور ایجنسیوں کو اس حوالے سے ضروری اہداف سونپ دیئے گئے، اجلاس میں 9 مئی کے واقعات میں ملوث ملزمان کے خلاف درج کیسز کے چالان کے حوالے سے پیش رفت کا بھی جائزہ لیا گیا۔اجلاس میں چیف سیکرٹری، آئی جی پولیس، ایڈیشنل چیف سیکرٹری، سیکرٹری قانون سمیت متعلقہ حکام شریک ہوئے، کمشنرز اور آرپی اوز ویڈیو لنک کے ذریعے اجلاس میں موجود تھے۔

لاہور(پی پی آ ئی)وزیراعلیٰ محسن نقوی کا ایگریکلچر،فوڈ اینڈ ڈرگ اتھارٹی کے ہیڈ آفس کا دورہ کیا اور پوری عمارت کا 100فیصدکام 31دسمبر تک مکمل کرنے کی ڈیڈ لائن دے دی۔ وزیراعلیٰ محسن نقوی مختلف فلور پر گئے اور قائم شعبوں میں فنشنگ کے کاموں کامعائنہ کیا، لیبز کیلئے خریدے گئے آلات دیکھے،  آڈیٹوریم اور عمارت کے تمام فلور کاجائزہ لیا اور عمارت کے سول ورک کو اعلیٰ معیار کے ساتھ مکمل کرنے کی ہدایت کی۔وزیراعلیٰ محسن نقوی کی زیر صدارت اتھارٹی کے ہیڈ آفس میں اجلاس ہوا، اتھارٹی کیلئے ہیومن ریسورس و مشینری کی خریداری کے امور بارے بریفنگ دی گئی، سیکرٹری تعمیرات ومواصلات نے وزیراعلیٰ محسن نقوی کو سول ورک بارے بریفنگ دی۔ وزیراعلیٰ پنجاب نے چیئرمین پلاننگ اینڈ ڈویلپمنٹ بورڈ کی سربراہی میں کمیٹی تشکیل دینے کی ہدایت کی گئی، کمیٹی اتھارٹی کے امور کے حل کے حوالے سے فوری اقدامات کرے گی۔

 کرا چی(پی پی آ ئی)ٹروپیکل سائیکلون وارننگ سینٹر نے طوفان تیج کا پانچواں الرٹ جاری کردیا ہے۔  سمندری طوفان تیج تیزی سے یمن کے ساحلی علاقوں کی جانب بڑھ رہا ہے  تاہم طوفان سے پاکستان کی کسی بھی ساحلی پٹی کو کوئی خطرہ نہیں۔  الرٹ کے مطابق سلالہ سے جنوب مشرق 530کلومیٹر کے فاصلے پر، گوادر کے جنوب مغرب میں 1600 کلومیٹر اور کراچی کے جنوب مغرب میں 1830 کلومیٹر کے فاصلے پر ہے جبکہ طوفان کے گرد ہوائیں 150 سے 160 فی گھنٹے کی رفتار سے چل رہی ہیں۔  سمندری طوفان  یمن کے ساحلی علاقوں سے ٹکرائے گا۔ عمان اور یمن کے ساحلی علاقوں میں 4 روز کے دوران شدید بارشوں اور سیلابی صورتحال کا سامنا ہوسکتا ہے۔ چیف میٹرولوجسٹ سردار سرفراز کا کہنا ہے کہ طوفان کا نام تیج رکھا گیا ہے، تیج بھارت کا تجویز کردہ نام ہے جس کا مطلب ”رفتار“ ہے۔

اسلام آباد(پی پی آ ئی)چیئرمین سینیٹ محمد صادق سنجرانی، چینی وزیر خارجہ کی خصوصی دعوت پر بیجنگ میں چین کے سفارت کاری کے اصولوں پر بین الاقوامی سمپوزیم میں شرکت کریں گے۔چیئرمین سینیٹ سفارت کاری کے اصولوں پر بین الاقوامی سمپوزیم میں بطور ”مہمان خصوصی” شرکت کریں گے۔سینٹ میڈیا ڈائریکٹوریٹ سے جاری پریس ریلیز کے مطابق یہ سمپوزیم چین کی ہمسایہ ممالک سے متعلق خارجہ پالیسی پر تبادلہ خیال اور غور کیلئے منعقد کیا جا رہا ہے۔ڈپلومیسی سمپوزیم کیلئے بیجنگ میں متعدد عالمی رہنما اکٹھے ہونگے۔چیئرمین سینیٹ 24 اکتوبر کو چین کے سفارت کاری کے اصولوں کے حوالے سے منعقدہ سمپوزیم سے خطاب کریں گے۔اپنے خطاب میں چیئرمین سینیٹ چین کے سفارت کاری فورم پر پاکستان کے کردار کو اجاگر کریں گے۔دورے کے دوران چیئرمین سینیٹ چین میں اپنے ہم منصب نیشنل پیپلز کانگریس کی سٹینڈنگ کمیٹی کے چیئرمین سے بھی ملاقات کریں گے اور مختلف چینی سرکاری کمپنیوں کے سربراہان جس میں مائننگ کمپنی کے سربراہ اور چائنہ ایڈ کے حکام بھی شامل ہیں، سے ملاقاتیں کریں گے۔سمپوزیم میں چیئرمین سینیٹ کو مدعو کرنا اور خطاب پاک چین سفارتی تعلقات کی مضبوطی کا مظہر ہے۔