کراچی: پاکستان اولمپک ایسوسی ایشن کے صدرسید عارف حسن کا کہنا ہے کہ پی ایچ ایف نے باضابطہ رابطہ نہیں کیا ، اب بھی وقت ہے ایشین گیمز میں انٹری بھیجی جاسکتی ہے۔ کراچی میں خصوصی گفتگو کرتے ہوئے عارف حسن کا کہنا تھا کہ انٹرنیشنل اولمپک کمیٹی نے وفاقی حکومت پر واضح کردیا ہے کہ پاکستان اولمپک ایسوسی ایشن کے معاملا ت میں مداخلت کا انجام ٹھیک نہیں ہوگا۔ اورآئی او سی نے پاکستان اسپورٹس بورڈ کواپنا رویہ درست کرنے کے لیے اکتیس جنوری تک کا وقت دیا ہے۔ ایک سوال کے جواب میں عارف حسن نے بتایا کہ پاکستان ہاکی فیڈریشن نے ان سے کوئی باضابطہ رابطہ نہیں کیا۔ عارف حسن نے مزید بتایا کہ پاکستان میں کھیلوں کے فروغ کے لیے فیڈریشن کے باہمی اختلافات کا خاتمہ انتہائی ضروری ہے۔

جوہانسبرگ: جنوبی افریقا ون ڈے ٹیم کے کپتان اور مایہ ناز بلے باز اے بی ڈی ویلیئرز ہاتھ کی سرجری کے باعث ایک ماہ تک کرکٹ کے میدانوں سے دور ہوگئے ۔توقع کی جارہی ہے کہ وہ فروری میں آسٹریلیا کے خلاف شیڈول سیریز سے قبل مکمل فٹ ہوجائیں گے ۔ڈویلیئرز 2011میں انڈین پریمیئر لیگ کے دوران ہاتھ کی انجری میں مبتلا ہوگئے تھے اور ان کے ہاتھ میں پلیٹ ڈالی گئی تھی ۔ ٹیم کے منیجر محمد موسٰی جی کے مطابق ڈویلیئرز کے ہاتھ میں رکھی پلیٹ دوبارہ ان کے لئے تکلیف کا باعث بن رہی جس کے لئے ڈاکٹر ز نے آپریشن تجویز کیا ہے ۔

کراچی: کراچی ڈولفن کے کپتان آصف ذاکر نے فیصل بینک قومی ریجنل ون ڈے کپ میں مسلسل دو ناقابل شکست سنچریاں بناکر پی سی بی سلیکشن کمیٹی کی توجہ اپنی طرف مبذول کرالی ۔خصوصی بات چیت میں ان کا کہنا تھا کہ سخت محنت کے باعث ان کی بیٹنگ میں بہتری آئی ہے ،اگر قومی کرکٹ ٹیم کے لئے منتخب کیا گیا تو سلیکٹرز کو مایوس نہیں کروں گا۔ واضح رہے کہ آصف ذاکر اچی کے زون ون میں شامل ایئر پورٹ جمخانہ سے کلب کرکٹ کھیلتے ہیں اور انگلینڈ میں لیگ کرکٹ میں بھی شرکت کرتے رہتے ہیں ۔

ڈربن: جنوبی افریقی کرکٹر اے بی ڈویلیئرز ٹیسٹ سیریز میں وکٹوں کے پیچھے سب سے زیادہ شکار کرنے والے پہلے وکٹ کیپر بن گئے ۔ڈی ویلیئرز نے زیادہ مین آف دی سیریز ایوارڈز جیتنے کا ایڈم گلکرسٹ کا ریکارڈ بھی برابر کردیا ۔بھارت اور جنوبی افریقا کے درمیان کھیلی جانے والی باہمی ٹیسٹ میچوں کی سیریز میں ڈی ویلیئرز نے 14کیچ پکڑے ۔باہمی ٹیسٹ میچوں کی سیریز میں وکٹوں کے پیچھے سب سے زیادہ شکار کرنے کا اعزاز پاکستانی وکٹ کیپر کامران اکمل کو حاصل ہے ۔ انہوں نے 2005میں ویسٹ انڈیز کے خلاف سیریز میں 16کھلاڑی شکار کیے ۔

ڈربن: جنوبی افریقی آل راﺅنڈر جیک کیلس انٹرنیشنل ٹیسٹ کرکٹ میں سب سے زیادہ رنز بنا کر بھارتی بلے باز ڈریوڈ سے تیسری پوزیشن چھین لی۔ الوداعی مقابلے کو سنچری سے یادگار بنانے والے چوتھے پروٹیز کرکٹر بن گئے۔ جنوبی افریقہ کے سٹار آل راﺅنڈر جیک کیلس نے اپنے آخری ٹیسٹ میچ کو کئی ریکارڈز ایک ساتھ جڑ کر یادگار بنا لیا ہے۔ انھوں نے بھارت کے خلاف ڈربن میں جاری مقابلے میں 115 رنز سکور کئے۔ اس طرح انھوں نے بھارت کے سابق کپتان راہول ڈریوڈ سے ٹیسٹ کرکٹ میں تیسرے سب سے بڑے سکورر کا ریکارڈ چھین لیا ہے۔ ان کے مجموعی رنز کی تعداد اب 13289 ہو گئی ہے۔ اس فہرست میں ٹاپ پر سچن ٹنڈولکر ہیں جنھوں نے ریٹائرمنٹ سے قبل 15921 رنز بنائے جبکہ دوسرے نمبر پر رکی پونٹنگ 13378 رنز کے ساتھ موجود ہیں۔ جیک کیلس اپنے الوداعی ٹیسٹ میں سنچری سکور کرنے والے چوتھے پروٹیز کرکٹر بن گئے ہیں۔ ان سے قبل بیری رچرڈز، پی جی وی وان ڈیر بجل اور بی ایل ایئروائن یہ اعزاز حاصل کر چکے ہیں۔ یہ کیلس کی 45 ویں ٹیسٹ سنچری تھی۔ اس فارمیٹ میں وہ سب سے زیادہ سنچریاں سکور کرنے والے دوسرے کرکٹر ہیں۔ ٹاپ پر 51 تھری فیگر اننگز کے ساتھ سچن ٹنڈولکر موجود ہیں۔ 100 سے زائد ٹیسٹ میچز کھیلنے والوں میں الوداعی میچ میں سنچری جڑنے والے کیلس پہلے کرکٹر ہیں۔