اسلام آباد(پی پی آئی)اسلام آباد ہائیکورٹ کے چیف جسٹس عامر فاروق نے سابق وزیر اعظم اور چیئرمین تحریک انصاف عمران خان کو اٹک جیل سے راولپنڈی کی اڈیالہ جیل منتقل کرنے کا حکم دیا ہے۔پی پی آئی کے مطابق اسلام اباد ہائیکورٹ میں چیئرمین پی ٹی آئی کی اٹک سے اڈیالہ جیل منتقلی کی درخواست پر سماعت ہوئی، چیف جسٹس اسلام آباد ہائیکورٹ نے کہاکہ چیئرمین پی ٹی آئی کی سزا کا سٹیٹس تبدیل ہو چکا ہے،اسلام آباد کے تمام انڈر ٹرائل قیدی اڈیالہ جیل میں ہیں،چیئرمین پی ٹی آئی ابھی تک اٹک کیوں ہیں؟ اڈیالیہ جیل کیوں نہیں؟چیف جسٹس اسلام آباد ہائیکورٹ کے ریماکس دیئے کہ چیئرمین پی ٹی آئی کو اڈیالہ جیل شفٹ کریں۔عدالت نے ایڈیشنل اٹارنی جنرل منور اقبال دوگل سے جواب طلب کرلیا،عدالت نے استفسار کیا کل اگر آپ رحیم یار خان کی جیل میں بھیج دیں تو وہاں جیل ٹرائل کریں گے؟وکیل نے استدعا کی کہ چیئرمین پی ٹی آئی سپورٹس مین ہیں انہیں ایکسرسائز مشین فراہم کی جائے۔چیف جسٹس نے کہا کہ جیل رولز کے مطابق وہ جن چیزوں کے حقدار ہیں ملنی چاہئیں، حق تلفی نہ ہو۔

جدہ(پی پی آئی) سابق وفاقی وزیر اور مسلم لیگ ن کے مرکزی سکریٹری جنرل احسن اقبال نے جو ادائیگی عمرہ کیلئے یہاں آئے ہوئے ہیں نے کہا ہے کہ میاں نواز شریف جلد پاکستان آئیں گے اور الیکشن میں حصہ لیں گے، چوتھی دفعہ وزیراعظم بن کر معیشت کی بہتری کے لئے اپنا کردار ادا کریں گے۔پی پی آئی کے مطابق  احسن اقبال نے کہا کہ ن لیگ  کے قائد نواز شریف پاکستان آئیں گے اور اپنی پہلی تقریر کریں گے تو اس میں بیانیہ بھی  ہوگااور پاکستان کے موجودہ مسائل کا حل اور وجہ بھی۔

 اسلام آباد (پی پی آئی)سپریم کورٹ نے شہری کی تنخواہ ہڑپ کرنے والے ملزمان کی درخواست ضمانت خارج کردی۔پی پی آئی کے مطابق محکمہ تعلیم کے دو ملازمین نے اینٹی کرپشن کے مقدمہ میں ضمانت کیلئے درخواست دائر کی تھی،سپریم کورٹ کے جسٹس سردار طارق مسعود اور جسٹس مسرت ہلالی نے سماعت کی۔جسٹس مسرت ہلالی نے کہاکہ افسوس ہے کہ محکمہ تعلیم پنجاب کا یہ حال ہے،جسٹس سردار طارق مسعود نے کہاکہ غریب سے زیادتی ہوئی، سیلری ہڑپ کرلی پھر مزید پیسے بھی لے لئے، سرکاری وکیل نے کہاکہ ملزم نے مدعی کو سرکاری سکول میں چوکیدار کی نوکری دلوائی،ایک سال ملزم اس چوکیدار کی سیلری اپنے اکاونٹ میں ٹرانسفر کرواتا رہا،ساتھی ملزم کے ساتھ ملکر سیلری دلوانے کیلئے مزید70ہزار روپے مانگے،چوکیدار نے بیوی کا زیور بیچ کر مزید رقم ملزمان کو دے دی،نئی پرنسپل نے تحقیقات کروائیں تو پتہ چلا ملزم کے اکاونٹ میں سیلری آتی رہی۔عدالت نے شہری کی تنخواہ ہڑپ کرنے والے ملزمان کی درخواست ضمانت خارج  کردی، ایک ملزم کی درخواست ضمانت عدم پیروی پر دوسرے کی وکلا کے دلائل کے بعد خارج  ہوئی۔یاد رہے کہ  ملزمان کیخلاف اینٹی کرپشن پنجاب نے فراڈ کا مقدمہ درج کررکھا ہے۔

اسلام آباد (پی پی آئی)سپریم کورٹ میں ایک آنکھ سے معذور سرکاری افسر کیخلاف درخواست پر جسٹس اعجازالاحسن  برہم ہو گئے۔پی پی آئیکے مطابق سپریم کورٹ میں ایک آنکھ سے معذور سرکاری افسر کیخلاف دائر درخواست پر سماعت ہوئی،جسٹس اعجازالاحسن نے معذور افسر کی تعیناتی کیخلاف درخواست اظہار برہمی کیا۔جسٹس اعجازالاحسن نے کہاکہ محمد ساجد ایک آنکھ سے معذور ہے اور سب واضح ہے،جب تقرری میرٹ پر کی گئی تو مسئلہ کیا ہے؟وکیل سوشل ویلفیئرڈپارٹمنٹ نے کہاکہ بیان حلفی کے مطابق متاثرہ فریق کوکوئی معذوری نہیں،جسٹس اعجازالاحسن نے کہاکہ بیان حلفی میں بھی کوئی تکنیکی غلط ہو سکتی ہے،ریکارڈ کے مطابق تقرری میرٹ پر کی گئی، انٹرویو بورڈ نے بھی معائنہ بھی کیا، معذور افراد کے کوٹہ پر ان کی حق تلفی نہیں ہونی چاہئے،دو اداروں نے انہیں معذور قراردیا ہے۔ پی پی آئی کے مطابق محمد ساجد کو سوشل ویلفیئر ڈپارٹمنٹ پشاور میں سیکشن آفیسر تعینات کیا گیا تھا،سوشل ویلفیئرڈپارٹمنٹ نے تعیناتی کیخلاف عدالت سے رجوع کر رکھا ہے۔