ہالہ(پی پی آئی) جماعت اسلامی پاکستان کے امیرسراج الحق اتوار22اکتوبر سے سندھ کا دوروزہ دورہ کریں گے، صوبائی ترجمان مجاہد چنا کے مطابق وہ 22اکتوبر کو شام سندھ کی معروف دینی درسگاہ جامعہ منصورہ ہالا میں رابطہ اخوان سندھ کے کنونشن سے خطاب اور23اکتوبر کو سندھ کے معروف آبادگار زرعی ماہراور سندھ آبادگار بورڈ کے صدر رئیس عبدالمجید نظامانی کی وفات پر ان کے گوٹھ باقر نظامانی پہنچ کر لواحقین سے تعزیت کریں گے جبکہ ہالا، حیدرآباد،ٹنڈومحمد خان،ٹھٹہ اور کراچی میں بھی مختلف دعوتی،تنظیمی عوامی اجتماعات سے خطاب اور میڈیا سے بات چیت بھی شیڈول میں شامل ہے۔صوبائی امیرمحمد حسین محنتی ودیگرمرکزی صوبائی ومقامی رہنما بھی انکے ساتھ ہوں گے۔

راجن پور (پی پی آئی) روحانی بزرگ اور سرائیکی زبان کے صوفی شاعر حضرت خواجہ غلام فرید کا 127واں تین روزہ عرس 21، 22، 23 اکتوبر بمطابق 5، 6، اور 7ربیع الثانی کو منعقد ہو گا، انتظامات کو حتمی شکل دینے کے لیے ڈپٹی کمشنر کی زیر صدارت اجلاس منعقد ہوا، پی پی آئی کے مطابق ڈی سی نے زائرین کی سہولت کے لیے انتظامات مکمل کرنے، داخلی اور خارجی راستوں پر سکیورٹی انتظامات، ڈاکٹرز اور پیرا میڈیکل سٹاف کی 24 گھنٹے موجود رہنے کی ہدایات دیں، عرس کے آغاز پر مزار پر چادر پوشی کی جائے گی اور عرق گلاب سے غسل دیا جائے گا علاوہ ازیں حضرت خواجہ غلام فریدؒکے عرس مبارک کے آخری روز راجن پور میں پیر 23 اکتوبر کو چھٹی کا اعلان کیا گیا ہے۔ ڈپٹی کمشنر راجن پور ڈاکٹرمنصوربلوچ نے نوٹیفکیشن بھی جاری کردیا،پی پی آئی کے مطابق نوٹیفکیشن کے مطابق چھٹی کا اطلاق امتحانی ڈیوٹی، ایمرجنسی اور عرس ڈیوٹی کے عملے پر نہیں ہوگا۔ واضح رہے کہ پیر 23 اکتوبر کو تعطیل کے باعث ضلع کے سرکاری ملازمین کو ایک ہفتے میں تین چھٹیو ں کا موقع مل گیا، ہفتہ اور اتوار کو سرکاری جبکہ پیرکو مقامی چھٹی ہونے کے باعث وہ3 چھٹیوں سے لطف اندوز ہو سکیں گے۔

اسلام آباد(پی پی آئی) سابق وفاقی وزیر اور مسلم لیگ ن کے مرکزی سکریٹری جنرل احسن اقبال نے کہا ہے کہ میاں نواز شریفالیکشن میں حصہ لیں گے، چوتھی دفعہ وزیراعظم بن کر معیشت کی بہتری کے لئے اپنا کردار ادا کریں گے۔پی پی آئی کے مطابق احسن اقبال نے کہا کہ ن لیگ کے قائد نواز شریف اپنی پہلی تقریر کریں گے تو اس میں بیانیہ بھی ہوگااور پاکستان کے موجودہ مسائل کا حل اور وجہ بھی۔