سینچورین: جنوبی افریقہ کرکٹ ٹیم کے بولر ڈیل اسٹین نے انجری کی مات دیکر آسٹریلیا کیخلاف تین ٹیسٹ میچز پر مشتمل سیریز کیلئے تیاری شروع کر دی ۔ جنوبی افریقی بولر اسٹین کو ریڑھ کی ہڈی کی انجری کا سامنا تھا لیکن گزشتہ روز انہوں نے ڈومیسٹک ٹی 20 کرکٹ ٹورنامنٹ میں شرکت کر کے اپنی فٹنس ثابت کر دی ہے۔ جنوبی افریقہ کے کرکٹ بورڈ نے انہیں آسٹریلیا کیخلاف کھیلی جانے والی ٹیسٹ سیریز کیلئے ٹیم میں شامل کیا ہے۔ اس حوالے سے ٹیم کی انتظامیہ کا کہنا ہے کہ اسٹین کو معلوم ہے ان کا جسم کیا چاہتا ہے اور وہ اسی کے مطابق کھیلتے ہیں وہ یہ بھی جانتے ہیں کہ آسٹریلیا کیخلاف ٹیسٹ سیریز میں شروع ہونے میں کتنے دن باقی رہ گئے ہیں۔ ذرائع کا کہنا ہے کہ آسٹریلیا کیخلاف ٹیسٹ سیریز میں اسٹین کا کردار انتہائی اہم ہوگا اور جنوبی افریقہ کا بولنگ اٹیک انہی پر انحصار کرے گا۔

بلغراد: عالمی چیمپئن ٹینس اسٹار نوواک جوکووچ نے گھر بسانے کا فیصلہ کر لیا۔ ایک ٹی وی شو کے دوران سربیا سے تعلق رکھنے والے جوکووچ نے ساتھ ہی موجود اپنی منگیتر کو مخاطب کرتے ہوئے کہا کہ تمہارے پاس اپنے موجودہ نام کے ساتھ زندگی گزارنے کے لیے دو ماہ ہیں میں بہت جلد تمہارا نام یلینا رسٹک سے یلینا جوکووچ کردوں گا۔ جواب میں رسٹک نے مسکرا کر ہاں کردی۔ آسٹریلین اوپن ٹینس چیمپئن شپ کے کوارٹر فائنلز میں غیر متوقع شکست کے بعد سے جوکووچ اپنے وطن میں فرصت کے دن گزار رہے ہیں۔ یلینا اپنے منگیتر کی جانب سے چلائے جانے والے بہبود کے منصوبوں کی دیکھ بھال کرتی ہیں۔

لاہور: بھارت کے خلاف ٹی ٹوئنٹی سیریزکیلئے 15رکنی قومی بلائنڈ کرکٹ ٹیم کا اعلان کر دیا گیا۔ تین میچزکی سیریزکا آغاز15 فروری سے ہوگا۔پاکستان بلائنڈ کرکٹ کونسل نے بھارت کے خلاف ہوم سیریز کے لیے پندرہ رکنی قومی ٹی ٹوئنٹی اسکواڈ کا اعلان کر دیا۔ ٹیم کی قیادت ذیشان عباسی کر یں گئے۔ جبکہ دیگر کھلاڑیوں میں عامر اسحاق، محمد توفیق، محمد ظفر، محمد ادریس سلیم،ساجد نواز، انیس جاوید، نثارعلی، محمد ہارون، اسرار الحسن، عرفان مجید، محمد جمیل، محمد اکرم، زاہد محمود اور طارق سیمیول شامل ہیں۔ پاکستان اوربھارت کیدرمیان تین ٹی ٹوئنٹی اورتین ون ڈے پرمشتمل سیریزکھیلی جائیگی۔ ٹی ٹوئنٹی سیریزکا پہلا میچ 15 فروری کوباغ جناح لاہور میں کھیلا جائے گا، دوسرا اور تیسرا ٹی ٹوئنٹی فیصل آباد میں ہو گا۔ بھارت کے خلاف شیڈول ون ڈے سیریز کیلئے ٹیم کا اعلان بعد میں کیا جائے گا۔

کراچی: قومی انڈر23 باسکٹ بال ٹورنامنٹ کاکراچی میں آغاز ہوگیا ، کھلاڑیوں اورآفیشلزکا کہنا ہے کہ حکومت سرپرستی کرے تو عالمی سطح پر ملک کا نام روشن کرسکتے ہیں۔ شہر قائد میں ٹورنامنٹ کے پہلے روزدو میچوں کے فیصلے ہوئے۔ پہلے میچ میں آرام باغ کلب نے منوڑہ کلب کودلچسپ مقابلے کے بعد 39-35پوائنٹس سے شکست دی۔ دوسرے میچ میں ڈاو کلب نے باونس کلب کے خلاف 31-47 سے کامیابی حاصل کی۔ اس سے پہلے مہمان خصوصی تسلیم احمد نے ایونٹ کا افتتاح کیا۔ ان کا کہنا تھا کہ کھیلوں کو فروغ دے کرشہرقائد اورپاکستان کا مثبت تصوراجاگرکیا جاسکتا ہے۔ چیمپئن شپ میں شریک کھلاڑیوں کا کہنا تھا کہ محدود وسائل کے باوجود وہ ملک میں ٹیلنٹ کی کمی نہیں۔ پانچ روزہ مقابلوں میں شہر بھر سے آٹھ ٹیمیں حصہ لے رہی ہیں ایونٹ کا فائنل اتوار کو کھیلا جائے گا۔